କଟକ ଅଫିସ୍, ୨୯ା୧୧: କଟକ ନୟାସଡ଼କ ଅଞ୍ଚଳରେ ଥିବା ଅର୍ଥ ଲଗାଣକାରୀ ସଂସ୍ଥା ଇଣ୍ଡିଆନ ଇନ୍ଫୋଲାଇନ ଫାଇନାନ୍ସ ଲିମିଟେଡ(ଆଇଆଇଏଫ୍ଏଲ୍) ଶାଖା କାର୍ଯ୍ୟାଳୟରୁ ସୁନା ଲୁଟ ଘଟଣାରେ ଅଭିଯୁକ୍ତଙ୍କ ତାଲିକା ବଢ଼ିବାରେ ଲାଗିଛି। ପୂର୍ବରୁ ଏହି ମାମଲାରେ ୮ଜଣଙ୍କୁ ଗିରଫ କରାଯାଇଥିବାବେଳେ ଶନିବାର ଆଉ ୨ଜଣ ଗହଣା ଦୋକାନୀଙ୍କୁ ଗିରଫ କରାଯାଇଛି। ଗିରଫ ଅଭିଯୁକ୍ତଙ୍କ ସଂଖ୍ୟା ୧୦ରେ ପହଞ୍ଚତ୍ଥିବାବେଳେ ଅନ୍ୟଜଣଙ୍କୁ ଅଟକ ରଖି ପୋଲିସ ପଚରାଉଚରା ଜାରି ରଖିଛି। ଶନିବାର ଗିରଫ ହୋଇଥିବା ଅଭିଯୁକ୍ତଦ୍ୱୟ ହେଲେ ଆଲାମଚାନ୍ଦ ବଜାରର ଲଳିତ ସୋନୀ(୪୫) ଓ ମଙ୍ଗଳାବାଗର ସରୋଜ ପୃଷ୍ଟି(୨୫) । ଆଇଆଇଏଫ୍ଏଲ୍ ବ୍ୟତୀତ ସହରର ଅନ୍ୟ କେତେକ ଅର୍ଥ ଲଗାଣକାରୀ ସଂସ୍ଥାରେ ମଧ୍ୟ ସମାନ ଶୈଳୀରେ ଅନିୟମିତତା କରାଯାଉଥିବା ଜଣାପଡ଼ିଛି। ୩ଦିନିଆ ରିମାଣ୍ଡରେ ଆସିଥିବା ୫ଅଭିଯୁକ୍ତଙ୍କୁ ଜେରା ସମୟରେ ପୋଲିସ ଏଭଳି ଅନେକ କିଛି ତଥ୍ୟ ପାଇଛି।
ଅପରପକ୍ଷରେ ଲୁଟ ଘଟଣାର ମୁଖ୍ୟ ସୂତ୍ରଧର କୁହାଯାଉଥିବା ଅଭିଯୁକ୍ତ ଲାଲା ଅମ୍ରିତ ରାୟ ବିଭିନ୍ନ ସୁନା ଋଣ ପ୍ରଦାନକାରୀ ସଂସ୍ଥାରେ ଜାଲିଆତି କରି ଏକାଧିକ ଆକାଉଣ୍ଟ ଖୋଲୁଥିଲେ। ଆଉ ସେହି ବେନାମୀ ଆକାଉଣ୍ଟରେ ଲାଲା ଆଇଆଇଏଫ୍ଏଲ୍ ସଂସ୍ଥାରୁ ସୁନା ନେଇ ବନ୍ଧକ ରଖି କୋଟି କୋଟି ଟଙ୍କା ହଡ଼ପ କରୁଥିଲେ। ଏପରି କି ଏଥିପାଇଁ ଆଇଆଇଏଫ୍ଏଲ୍ ସଂସ୍ଥାର କର୍ମଚାରୀଙ୍କ ସହ ଅନ୍ୟ କିଛି ସଂସ୍ଥାର କର୍ମଚାରୀମାନେ ମଧ୍ୟ ସାମିଲ ଥିଲେ। ସେମାନେ ଲାଲା ବନ୍ଧକ ରଖୁଥିବା ସୁନା ବାବଦରେ ଦାଖଲ କରୁଥିବା ନକଲି ପ୍ରମାଣପତ୍ରକୁ ଅସଲି ଭାବେ ଦର୍ଶାଉଥିଲେ। ଆଉ ଏଥିପାଇଁ ସେମାନଙ୍କୁ ଲକ୍ଷାଧିକ ଟଙ୍କାର କମିଶନି ଦିଆଯାଉଥିଲା ବୋଲି ପୋଲିସ ତଦନ୍ତରୁ ଜାଣିବାକୁ ପାଇଛି ।