ସମ୍ବଲପୁର,୨୩ା୯(ପ୍ରମୋଦ ବହିଦାର): ଆଇଆଇଏମ୍ ସମ୍ବଲପୁରରେ ବଦଳିବ ଛାତ୍ରଛାତ୍ରୀଙ୍କ ପାଠପଢ଼ା ଶୈଳୀ। ପ୍ରଫେସରଙ୍କ ବଦଳରେ ଛାତ୍ରୀଛାତ୍ରଙ୍କୁ ପାଠ ପଢ଼ାଇବ ଏଆଇ(ଆର୍ଟିଫିସିଆଲ ଇଣ୍ଟେଲିଜେନ୍ସ)। ଯାହା ସମଗ୍ର ଦେଶରେ ପ୍ରଥମ ଭାବେ ଏକ ଉଦାହରଣ ସୃଷ୍ଟି କରିବ ବୋଲି କହିଛନ୍ତି ପ୍ରଫେସର ମହାଦେବ ଜୟସ୍ବାଲ। ଆଇଆଇଏମ ସମ୍ବଲପୁର ଏହାର ଦଶମ ପ୍ରତିଷ୍ଠା ଦିବସ ପାଳନ ଉସତ୍ବରେ ଏକ ଦଶନ୍ଧିର ଉତ୍କର୍ଷତା ଏବଂ ପରିବର୍ତ୍ତନମୂଳକ ଉପଲବ୍ଧିକୁ ବର୍ଣ୍ଣନା କରି ପ୍ରଫେସର ଜୟସ୍ବାଲ ଏହା କହିଛନ୍ତି।
ସେ କହିଛନ୍ତି ଯେ, ଏକ ଦଶନ୍ଧି ଧରି ଏହି ପ୍ରତିଷ୍ଠାନ ଅନେକ ବାଧାବିଘ୍ନ ଓ ପ୍ରତିକୂଳ ପରିସ୍ଥିତ ସତ୍ତ୍ୱେ ଉତ୍କର୍ଷତା ଲକ୍ଷ୍ୟରେ ସଫଳତାର ପ୍ରତି ସୋପାନକୁ ଅତିମ୍ରମ କରି ଚାଲିଛି। ଏହାର ପ୍ରତିଷ୍ଠା ପରଠାରୁ ଜାତୀୟ ଗୁରୁତ୍ୱପୂର୍ଣ୍ଣ ଅନୁଷ୍ଠାନ କାର୍ଯ୍ୟଭିତ୍ତିକ ଗବେଷଣା, ଅନୁଭୂତିମୂଳକ ପ୍ରଶିକ୍ଷଣ ମାଧ୍ୟମରେ ମ୍ୟାନେଜମେଣ୍ଟ ଶିକ୍ଷା ପ୍ରଦାନ କରିବାକୁ ଲକ୍ଷ୍ୟ ରଖିଛି। ଏକଦା ୪୯ ଜଣ ଛାତ୍ରୀଛାତ୍ରଙ୍କୁ ନେଇ ଆରମ୍ଭ ହୋଇଥିବା ଏହି ଶିକ୍ଷା ପ୍ରତିଷ୍ଠାନରେ ବର୍ତ୍ତମାନ ୩ଶହରୁ ଊର୍ଦ୍ଧ୍ୱ ଛାତ୍ରୀଛାତ୍ର ଏଠାରେ ଶିକ୍ଷାଗ୍ରହଣ କରିବା ଏହାର ଉତ୍କୃଷ୍ଟ ଓ ବିଶ୍ୱସ୍ତରୀୟ ଶୈକ୍ଷିକ ପରିବେଶ ଓ ଶୈଳୀକୁ ପ୍ରମାଣିତ କରୁଛି। ଏଠାରେ ବର୍ତ୍ତମାନ ୭୫ ପ୍ରତିଶତ ଛାତ୍ରୀ ଶିକ୍ଷା ଗ୍ରହଣ କରିବା ସମଗ୍ରଦେଶ ପାଇଁ ଉଦାହରଣ ସୃଷ୍ଟି କରିଛି ବୋଲି ସେ କହିଛନ୍ତି।
ତେବେ ଆଗକୁ ଖୁବ ଶୀଘ୍ର ଏହି ପ୍ରତିଷ୍ଠାନକୁ ଏକ ବିଶ୍ୱସ୍ତରୀୟ ପ୍ରତିଷ୍ଠାନରେ ପରିଣତ କରିବାର ଲକ୍ଷ୍ୟ ରଖାଯାଇଛି। ଚଳିତ ବର୍ଷ ଆଇଆଇଏମ୍ ସମ୍ବଲପୁରରେ ତିନୋଟି ସେଣ୍ଟର ଅଫ୍ ଏକ୍ସଲେନ୍ସ ରହିବ। ଯାହା ଏକ ବିବିଧ ଏମବିଏ ପାଠ୍ୟକ୍ରମ, ଅନ୍ତର୍ଜାତୀୟ ମାନ୍ୟତା ଓ ଏନଇପି କେନ୍ଦ୍ରୀଭୂତ କ୍ୟାମ୍ପସ ସମ୍ପ୍ରସାରଣ ବୋଲି କହିଥିଲେ ପ୍ରଫେସର ଜୟସ୍ବାଲ। କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ଯୋଗଦେଇ ଏମ୍ସିଏଲ୍ର ଅଧ୍ୟକ୍ଷ ତଥା ପରିଚାଳନା ନିର୍ଦେଶକ ଉଦୟ କାଓଲେ ଆଇଆଇଏମ୍ ସମ୍ବଲପୁର ହେଉଛି ସବୁଠାରୁ ଜୀବନ୍ତ ଓ ବହୁ ଚର୍ଚ୍ଚିତ ଶିକ୍ଷା ପ୍ରତିଷ୍ଠାନ। ଏଠାରେ ପାଠ ପଢ଼ୁଥିବା ଛାତ୍ରୀଛାତ୍ରମାନେ ଏକ ଉତ୍ତମ ଶୈକ୍ଷିକ ପରିବେଶରେ ରହିଛନ୍ତି। ଆଇଆଇଏମ୍ ସମ୍ବଲପୁରର ଅଦ୍ଭୁତପୂର୍ବ ସଫଳତା ପାଇଁ ସେ ଅଭିନନ୍ଦନ ଜଣାଇଥିଲେ।
ସମ୍ମାନିତ ଅତିଥିଭାବେ ଯୋଗଦେଇ ବିଜନେସ୍ ୱାଲ୍ଡର ମୁଖ୍ୟ ସମ୍ପାଦକ ଡ. ଅନୁରାଗ ବାତ୍ରା କାଯର୍ୟରେ ନିଜର ସ୍ଥାୟୀତ୍ୱ ବଜାୟ ରଖିବା ସହ ସଫଳତା ପ୍ରତି ଆଶାବାଦୀ ହେବାର ଗୁରୁତ୍ୱ ଉପରେ ଆଲୋକପାତ କରିଥିଲେ। ମୁଖ୍ୟ ଭାବେ ନେକ୍ସସ ପାୱାରର ସହ-ପ୍ରତିଷ୍ଠାତା ତଥା ସିଇଓ ନିଶିତା ବଳିଆରସିଂହ ଛାତ୍ରଛାତ୍ରୀଙ୍କୁ ପ୍ରୟାସର ନିରନ୍ତରତା ଏବଂ ନିଜ ପ୍ରତି ସଚ୍ଚୋଟ ରହିବା ବିଷୟରେ କହିଥିଲେ।
