ସମ୍ବଲପୁର,୨୯ା୧(ବ୍ୟୁରୋ): ସମ୍ବଲପୁରର ଭାରତୀୟ ପ୍ରବନ୍ଧନ ସଂସ୍ଥାନ (ଆଇଆଇଏମ୍)ର ନିଜସ୍ବ ସ୍ଥାୟୀ କ୍ୟାମ୍ପସ ଆସନ୍ତା ମାର୍ଚ୍ଚ ମାସ ସୁଦ୍ଧା କାର୍ଯ୍ୟକ୍ଷମ ହେବ। ଏ ନେଇ ଆଇଆଇଏମ୍ କର୍ତ୍ତୃପକ୍ଷ ସୂଚନା ଦେଇଛନ୍ତି। ୨୦୧୫ରୁ ଅସ୍ଥାୟୀ ଭାବେ ସମ୍ବଲପୁରରେ ପାଠପଢା ହେଉଛି। ନୂତନ ଅତ୍ୟାଧିନିକ କ୍ୟାମ୍ପସ ଲୋକାର୍ପଣ ହେଲେ ପାଠପଢାର ସୁନ୍ଦର ପରିବେଶ ସୃଷ୍ଟି ହେବ ବୋଲି ଆଶା କରାଯାଉଛି।
ସୂଚନାଯୋଗ୍ୟ, ମହାନଦୀ ଅପରପାର୍ଶ୍ୱ ବସନ୍ତପୁରଠାରେ ପ୍ରାୟ ୨ଶହ ଏକର ଜମିରେ ଆଇଆଇଏମ୍-ଏସ୍ର ନିଜସ୍ବ କ୍ୟାମ୍ପସ ନିର୍ମାଣ କାର୍ଯ୍ୟ ଚାଲିଛି। ଏହାର ୯୦ ପ୍ରତିଶତ ସିଭିଲ୍ କାମ ସମ୍ପୂର୍ଣ୍ଣ ହୋଇସାରିଛି। ଅଭ୍ୟନ୍ତରୀଣ ଓ ବୈଦ୍ୟୁତିକ କାମ ତ୍ୱରାନ୍ବିତ କରାଯାଇଛି। ମାର୍ଚ୍ଚ ସୁଦ୍ଧା କ୍ୟାମ୍ପସର ନିର୍ମାଣ କାର୍ଯ୍ୟ ସମ୍ପୂର୍ଣ୍ଣ କରିବାକୁ ଧାର୍ଯ୍ୟ ହୋଇଛି ବୋଲି ଆଇଆଇଏମ୍ ପକ୍ଷରୁ ଠିକା ସଂସ୍ଥାକୁ ତାଗିଦା କରାଯାଇଛି। ପ୍ରସ୍ତାବିତ ନୂତନ କ୍ୟାମ୍ପସରେ ୫ଶହ ଛାତ୍ରୀଛାତ୍ରଙ୍କ ପାଇଁ ହଷ୍ଟେଲ, ଶ୍ରେଣୀ କକ୍ଷ, ପ୍ରଶାସନିକ ଭବନ, ପାଠାଗାର, ପ୍ରେକ୍ଷାଳୟ, ଏକ୍ଜିକ୍ୟୁଟିଭ ପ୍ରବନ୍ଧନ କେନ୍ଦ୍ର, ଇନ୍କ୍ୟୁଭେଶନ କେନ୍ଦ୍ର, ଅଧିକାରୀ-କର୍ମଚାରୀମାନଙ୍କ ପାଇଁ କମ୍ପ୍ଲେକ୍ସ ଜିମ୍ନାସିୟମ୍, କ୍ରୀଡ଼ା କମ୍ପ୍ଲେକ୍ସ ଆଦି ସୁବିଧା ରହିବ। ଏହି ପ୍ରକଳ୍ପ ପାଇଁ କେନ୍ଦ୍ର ସରକାର ୪୦୧ କୋଟି ଟଙ୍କା ମଞ୍ଜୁର କରିଥିଲେ।