ନୂଆଦିଲ୍ଲୀ,୧୬।୨: ଦିଲ୍ଲୀସ୍ଥିତ ଇଣ୍ଡିଆନ୍ ଇନ୍ଷ୍ଟିଚ୍ୟୁଟ ଅଫ ଟେକ୍ନୋଲୋଜି(ଆଇଆଇଟି)ର ହଷ୍ଟେଲ ରୁମ୍ରୁ ଜଣେ ଏମ୍ଟେକ୍ ଛାତ୍ରଙ୍କ ମୃତଦେହ ପୋଲିସ ଉଦ୍ଧାର କରିଛି। ଛାତ୍ର ଜଣକ ଆତ୍ମହତ୍ୟା କରିଥିବା ପୋଲିସ ସନ୍ଦେହ କରୁଛି। ମୃତ ଛାତ୍ର ଜଣକ ହେଲେ ସଞ୍ଜୟ ନରକର (୨୪)। ତାଙ୍କ ଘର ମହାରାଷ୍ଟ୍ରର ନାଶିକ ଅଞ୍ଚଳରେ। ସଞ୍ଜୟ ଦ୍ରୌଣଚାର୍ଯ୍ୟ ହଷ୍ଟେଲର ୭୫୭ ରୁମ୍ରେ ରହୁଥିଲେ।
ପୋଲିସ ସୂଚନା ମୁତାବକ, ସଞ୍ଜୟଙ୍କ ପରିବାର ଲୋକେ ସଞ୍ଜୟଙ୍କୁ ବାରମ୍ବାର ଫୋନ କରିଥିଲେ। ହେଲେ ସେ କୌଣସି ଉତ୍ତର ଦେଇ ନ ଥିଲେ। ଏନେଇ ପରିବାର ଲୋକେ ହଷ୍ଟେଲରେ ରହୁଥିବା ସଞ୍ଜୟଙ୍କ ଜଣେ ସାଙ୍ଗଙ୍କୁ ଫୋନ କରି ଘଟଣା ସମ୍ପର୍କରେ ପଚାରିଥିଲେ। ପରେ କେତେଜଣ ସାଙ୍ଗ ହେଷ୍ଟଲ ରୁମ୍କୁ ଯାଇଥିଲେ। ହେଲେ ରୁମ୍ କବାଟ ବନ୍ଦ ରହିଥିଲା। ଏନେଇ ସେମାନେ ଓ୍ବାଡେନଙ୍କୁ ଜଣାଇଥିଲେ। ଓ୍ବାଡେନ ଆସି କବାଟ ଭାଙ୍ଗି ଦେଖିଲା ବେଳକୁ ସଞ୍ଜୟଙ୍କ ଝୁଲନ୍ତା ଅବସ୍ଥାରେ ମୃତଦେହ ଦେଖିବାକୁ ମିଳିଥିଲା। ଏନେଇ ସ୍ଥାନୀୟ ପୋଲିସକୁ ଖବର ଦିଆଯାଇଥିଲା। ପୋଲିସ ପହଞ୍ଚି ମୃତଦେହ ଜବତ କରି ବ୍ୟବଚ୍ଛେଦ ପାଇ ପଠାଇଛି। କେଉଁ ପରିସ୍ଥିତିରେ ସଞ୍ଜୟ ଆତ୍ମହତ୍ୟା କଲେ ସେ ନେଇ ପୋଲିସ ଏକ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଛି। ଅନ୍ୟପକ୍ଷେ ପୋଲିସ ପରିବାର ଲୋକଙ୍କୁ ଘଟଣା ସମ୍ପର୍କରେ ଜଣାଇଦେଇଛି।