ବାଲିମେଳା/କୋରୁକୋଣ୍ଡା,୧୦ା୪ (ଡ଼ି.ଏନ.ଏ.): ମାଲକାନଗିରି ଜିଲା ବାଲିମେଳା ବିଜ୍ଞାନ ବୈଷୟିକ ମହାବିଦ୍ୟାଳୟ ଛାତ୍ରୀ ନିବାସରେ ରବିବାର ଏକ ଅଭାବନୀୟ ଘଟଣା ଘଟିଛି। ବିଷାକ୍ତ ଖାଦ୍ୟ ଖାଇ ଛାତ୍ରୀନିବାସର ୧୫ ଅନ୍ତେବାସୀ ଗୁରୁତର ହୋଇପଡିବା ଦେଖିବାକୁ ମିଳିଛି। ଏହି ଖବର ଜଣାପଡିବା ପରେ ସ୍ଥାନୀୟ ଅଞ୍ଚଳରେ ଉତ୍ତେଜନା ପ୍ରକାଶ ପାଇଛି। ଖାଦ୍ୟ କିପରି ବିଷାକ୍ତ ହେଲା ଏବଂ ତାହା ଖାଇବାକୁ ଛାତ୍ରୀମାନଙ୍କୁ କିଏ ଦେଲା ଏହାର ଉଚ୍ଚସ୍ତରୀୟ ତଦନ୍ତ ଦାବି କରିଛନ୍ତି ଅଞ୍ଚଳବାସୀ।
ଖବରରୁ ଜଣାପଡିଛି, ମହାବିଦ୍ୟାଳୟର ଛାତ୍ରୀନିବାସରେ ଏହି ଛାତ୍ରୀମାନେ ରହି ଅଧ୍ୟୟନ କରନ୍ତି। ରବିବାର ଛାତ୍ରୀମାନଙ୍କୁ ଛାତ୍ରୀନିବାସ ପକ୍ଷରୁ ସକାଳେ ଉପମା, ଚକୁଳି ତରକାରି ପ୍ରଦାନ କରାଯାଇଥିଲା। ସେମାନେ ଏହି ଖାଦ୍ୟ ଖାଇବାର କିଛି ସମୟ ପରେ ବାନ୍ତି କରି ଗୁରୁତର ଅସୁସ୍ଥ ହୋଇପଡିଥିଲେ। ଏ ସମ୍ପର୍କରେ ସୂଚନା ପାଇ କଲେଜ ଅଧ୍ୟକ୍ଷ ଅମୂଲ୍ୟ ପ୍ରଧାନ ତୁରନ୍ତ ଛାତ୍ରୀନିବାସରେ ପହଞ୍ଚତ୍ଥିଲେ। ମାଟ୍ରନ ଅନିତା ପଡ଼ିଆମୀ, ଛାତ୍ରୀନିବାସ ସୁପରିଣ୍ଟେଣ୍ଡେଣ୍ଟ ରଞ୍ଜିତା ତପୋ ଓ କେତେଜଣ ଅଧ୍ୟାପକ ସମ୍ପୃକ୍ତା ଛାତ୍ରୀମାନଙ୍କୁ ଚିକିତ୍ସା ଲାଗି ବାଲିମେଳା ଆଞ୍ଚଳିକ ସ୍ବାସ୍ଥ୍ୟକେନ୍ଦ୍ରକୁ ନେଇଥିଲେ। ସେଠାରେ ଛାତ୍ରୀମାନଙ୍କ ଚିକିତ୍ସା ଜାରି ରହିଛି। ତେବେ ଚିକିତ୍ସାଧୀନ ଛାତ୍ରୀମାନଙ୍କ ମଧ୍ୟରୁ କେତେ ଜଣ ଛାତ୍ରୀ ସୁସ୍ଥ ହୋଇଥିବା ବେଳେ ଅନ୍ୟମାନଙ୍କ ଚିକିତ୍ସା ଚାଲିଥିବା ଡାକ୍ତର ଦେବବ୍ରତ ନାୟକ କହିଛନ୍ତି। ଅନ୍ୟପକ୍ଷରେ ଛାତ୍ରୀମାନେ ଖାଦ୍ୟ ଖାଇବା ପରେ କେଉଁ କାରଣରୁ ହଠାତ ଅସୁସ୍ଥ ହୋଇପଡିଲେ ତାହାର କାରଣ ଏଯାଏ ସ୍ପଷ୍ଟ ହୋଇପାରିନାହିଁ। ଏନେଇ ଅଧ୍ୟକ୍ଷ ପ୍ରଧାନଙ୍କୁ ପଚାରିବାରୁ ସେ ପ୍ରସଙ୍ଗକୁ ଏଡାଇ ଦେବାକୁ ଚେଷ୍ଟା କରିଥିଲେ। ଶେଷରେ ଡିହାଇଡ୍ରେସନ ହେତୁ ଏପରି ପରିସ୍ଥିତି ଉପୁଜିଥିବା କହିଥିଲେ। ବିଷାକ୍ତ ଖାଦ୍ୟ ଖାଇଥିବା ହେତୁ ଏପରି ଘଟଣା ଘଟିଥାଇପାରେ ଅନୁମାନ କରାଯାଉଛି ବୋଲି ଡାକ୍ତର ନାୟକ କହିିଥିଲେ। ଅନ୍ୟପକ୍ଷରେ ହଷ୍ଟେଲ ସୁପରିଣ୍ଟେଣ୍ଡେଣ୍ଟ ତପୋ ଏବଂ ମାଟ୍ରନ ପଡ଼ିଆମୀଙ୍କ ପରିଚାଳନାଗତ ତ୍ରୁଟି ଯୋଗୁ ଏଭଳି ପରିସ୍ଥିତି ଉପୁଜିଲା ବୋଲି ଅଭିଯୋଗ ହେଉଛି। ଏ ସମ୍ପର୍କରେ ସୁପରିଣ୍ଟେଣ୍ଡେଣ୍ଟ ତପୋଙ୍କୁ ଫୋନ ଯୋଗେ ପଚାରିବାରୁ ସେ କୌଣସି ଉତ୍ତର ନ ଦେଇ ଫୋନ କାଟି ଦେଇଥିଲେ। ତୁରନ୍ତ ଜିଲା ପ୍ରଶାସନ ଘଟଣାର ନିରପେକ୍ଷ ତଦନ୍ତ କରି ଦୋଷୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଅଞ୍ଚଳବାସୀ ଦାବି କରିଛନ୍ତି।