ଡେରାଡୁନ,୧୯।୨: ସଦ୍ୟ ଅନୁଷ୍ଠିତ ଉତ୍ତରାଖଣ୍ଡ ବିଧାନସଭା ନିର୍ବାଚନ ଫଳ ନ ଆସୁଣୁ ମୁଖ୍ୟମନ୍ତ୍ରୀ ଚୌକି ପାଇଁ କଂଗ୍ରେସରେ କନ୍ଦଳ ଆରମ୍ଭ ହୋଇଗଲାଣି। ପୂର୍ବତନ ମୁଖ୍ୟମନ୍ତ୍ରୀ ତଥା ଦଳର ବରିଷ୍ଠ ନେତା ହରିଶ୍ ରାଓ୍ବତ୍ ଏନେଇ ପୂର୍ବତନ ପିସିସି ସଭାପତି ପ୍ରୀତମ୍ ସିଂଙ୍କ ସହ ମୁହାଁମୁହିଁ ହୋଇଛନ୍ତି।
ଉତ୍ତରାଖଣ୍ଡ ବିଧାନସଭାର ୭୦ ଆସନ ଲାଗି ଗତ ୧୪ରେ ମତଦାନ ହୋଇଥିଲା। ମାର୍ଚ୍ଚ ୧୦ରେ ଭୋଟ ଗଣତି ପରେ ଫଳାଫଳ ଆସିବ। ହେଲେ ଏହା ପୂର୍ବରୁ ମୁଖ୍ୟମନ୍ତ୍ରୀ ଆଶାୟୀଙ୍କ ମଧ୍ୟରେ ବିବାଦ ଦେଖାଦେଲାଣି। ରାଜ୍ୟରେ କଂଗ୍ରେସ କ୍ଷମତାକୁ ଆସିଲେ କିଏ ମୁଖ୍ୟମନ୍ତ୍ରୀ ହେବେ ବୋଲି ଶୁକ୍ରବାର ଖବରଦାତାମାନେ ହରିଶ ରାଓ୍ବତ୍ଙ୍କୁ ପ୍ରଶ୍ନ କରିଥିଲେ। ରାଓ୍ବତ୍ କହିଥିଲେ, ସେ ମୁଖ୍ୟମନ୍ତ୍ରୀ ହେବେ। ତାଙ୍କୁ ମୁଖ୍ୟମନ୍ତ୍ରୀ କରା ନ ଗଲେ ସେ ଘରେ ବସିରହିବାକୁ ଉଚିତ ମଣିବେ। ପ୍ରୀତମ୍ ସିଂ ଜବାବରେ କହିଛନ୍ତି, କିଏ ମୁଖ୍ୟମନ୍ତ୍ରୀ ହେବେ ତାହା ହାଇକମାଣ୍ଡ ସ୍ଥିର କରିବେ। ପରମ୍ପରା ଅନୁସାରେ ଦଳୀୟ ବିଧାୟକମାନେ ଜଣେ ବ୍ୟକ୍ତିଙ୍କ ସପକ୍ଷରେ ସହମତି ଦେବେ। ପରେ ଦଳୀୟ ନେତୃତ୍ୱ ସେହି ନାମ ଉପରେ ମୋହର ମାରିବେ।