ନୂଆପଡ଼ା,୧୭।୪(ଡି.ଏନ୍.ଏ.): କିଛିଦିନ ଧରି ରାଜ୍ୟରେ ପ୍ରଚଣ୍ଡ ରୌଦ୍ରତାପ ଜନଜୀବନକୁ ଅସ୍ତବ୍ୟସ୍ତ କରିପକାଇଛି। ଏଥିରୁ ଜୀବଜନ୍ତୁ ମଧ୍ୟ ବାଦ୍ ପଡ଼ି ନାହାନ୍ତି। ଜଙ୍ଗଲରେ ଆବଶ୍ୟକ ପରିମାଣର ପାଣି ମିଳୁ ନ ଥିବା କାରଣରୁ ଜୀବଜନ୍ତୁ ଅସୁସ୍ଥ ମଧ୍ୟ ହେଉଛନ୍ତି। ନୂଆପଡ଼ା ଜଙ୍ଗଲରେ ଏକ କଲରାପତରିଆ ବାଘକୁ ରବିବାର ବନ ବିଭାଗ ପକ୍ଷରୁ କାବୁ କରାଯାଇଛି। ବାଘଟି ଅସୁସ୍ଥ ଥିବାରୁ ଠିକ୍ ଭାବେ ଚାଲିପାରୁ ନାହିଁ। ତେଣୁ ତା’ର ଚିକିତ୍ସା ଆରମ୍ଭ କରାଯାଇଛି।
ନୂଆପଡ଼ା ସଦର ଫରେଷ୍ଟ ରେଞ୍ଜ ଅନ୍ତର୍ଗତ ଧରମବନ୍ଧା ସେକ୍ସନରେ ଏକ କଲରାପତରିଆ ବାଘକୁ ଉଦ୍ଧାର କରାଯାଇଛି। ପ୍ରଚଣ୍ଡ ରୌଦ୍ରତାପ ଯୋଗୁ ବାଘଟି ଅସୁସ୍ଥ ରହିଛି ଏବଂ ଠିକ୍ଭାବେ ଚାଲିପାରୁ ନ ଥିବା ବନ ବିଭାଗ ପକ୍ଷରୁ କୁହାଯାଉଛି। ସିଳିଆରିବାହାରା ଗ୍ରାମ ନିକଟରେ ବାଘଟିକୁ ଲୋକମାନେ ଦେଖି ଭୟଭୀତ ହେବା ସହ ବନ ବିଭାଗକୁ ଖବର ଦେଇଥିଲେ। ଅତିରିକ୍ତ ବନ ସଂରକ୍ଷକ (ଏସିଏଫ୍) ମହମ୍ମଦ ସଲିହା, ବନଖଣ୍ଡ ଅଧିକାରୀ (ଡିଏଫ୍ଓ) ସୁଶୀଲ କୁମାର ତ୍ରିପାଠୀ ଓ ଅନ୍ୟ ବନବିଭାଗ କର୍ମଚାରୀ ଘଟଣାସ୍ଥଳରେ ପହଞ୍ଚତ୍ଥିଲେ। ଜିଲା ପ୍ରାଣୀଧନ ଚିକିତ୍ସା ଅଧିକାରୀ ସଚ୍ଚିଦାନନ୍ଦ ପଣ୍ଡା ସଦଳବଳ ପହଞ୍ଚତ୍ ବାଘର ପ୍ରାଥମିକ ଚିକିତ୍ସା କରିଥିଲେ। ବାଘକୁ ଅଂଶୁଘାତ ହୋଇଥିବା ସନ୍ଦେହକରି ପାଣି ଫୋପାଡ଼ି ଥିଲେ। ବାଘ ସାମାନ୍ୟ ସୁସ୍ଥ ହେବା ପରେ ଜାଲ ବିଛାଇ ଧରାଯାଇ ନୂଆପଡ଼ା ରେଞ୍ଜ ଅଫିସକୁ ଅଣାଯାଇଥିଲା। ବର୍ତ୍ତମାନ ବାଘର ସ୍ବାସ୍ଥ୍ୟାବସ୍ଥା ଭଲ ଅଛି ବୋଲି ଡିଏଫ୍ଓ ତ୍ରିପାଠୀ କହିଛନ୍ତି। ବାଘର ବୟସ ୮ ମାସରୁ ୧ ବର୍ଷ ମଧ୍ୟରେ ହେବ। ବାଘକୁ ୨ ରୁ ୩ ଦିନ ବନବିଭାଗର ତତ୍ତ୍ୱାବଧାନରେ ରଖାଯାଇ ଚିକିତ୍ସା କରାଯିବ। ସୁସ୍ଥ ହେବା ପରେ ଘଞ୍ଚ ଜଙ୍ଗଲ ମଧ୍ୟରେ ତାକୁ ଛଡ଼ାଯିବ । ବାଘ କୌଣସି ବିଷାକ୍ତ ଖାଦ୍ୟ ଖାଇଥାଇପାରେ କିମ୍ବା ଅତ୍ୟଧିକ ଗରମରେ ଅଂଶୁଘାତ ଯୋଗୁ ବାଘ ଅସୁସ୍ଥ ହୋଇଥିବା ଡିଏଫ୍ଓ କହିଛନ୍ତି।
ସୂଚନାନୁସାରେ ଗତ କିଛି ଦିନ ହେବ ଜଙ୍ଗଲ ସୀମାନ୍ତ ଗ୍ରାମଗୁଡ଼ିକରେ କଲରାପତରିଆ ବାଘର ଆତଙ୍କରେ ଗ୍ରାମବାସୀ ଆତଙ୍କିତ ହୋଇପଡ଼ିଥିଲେ। ଗୃହପାଳିତ ପ୍ରାଣୀକୁ ବାଘ ଖାଇବାର ଅଭିଯୋଗ ହୋଇଆସୁଥିଲା।
