ଫୁଲବାଣୀ ଅଫିସ, ୧୧ା୪: ତ୍ରିସ୍ତରୀୟ ପଞ୍ଚାୟତ ନିର୍ବାଚନରେ ଭୋଟ ଗ୍ରହଣ କେନ୍ଦ୍ରରେ ବେଆଇନ କାର୍ଯ୍ୟ କରିବା ୨ ଶିକ୍ଷକଙ୍କୁ ମହଙ୍ଗା ପଡିଛି ା ଜିଲା ନିର୍ବାଚନ ଅଧିକାରୀ ତଥା ଜିଲାପାଳ ଡା.ବୃନ୍ଦା ଡି ସେମାନଙ୍କୁ କାର୍ଯ୍ୟରୁ ନିଲମ୍ବିତ କରିଛନ୍ତି। ନିଲମ୍ବିତ ଶିକ୍ଷକ ହେଲେ ରାଇକିଆ ବ୍ଲକର ପ୍ରଧାନ ଶିକ୍ଷକ ରବୀନ୍ଦ୍ରନାଥ ପାତ୍ର ଓ କ.ନୂଆଗାଁ ବ୍ଲକର ସହକାରୀ ଶିକ୍ଷକ ନବ କିଶୋର ଓଝା। ଗତ ପଞ୍ଚାୟତ ନିର୍ବାଚନରେ ଏହି ଦୁଇଜଣ ଶିକ୍ଷକ ଆଦର୍ଶ ଆଚରଣ ବିଧି ଉଲ୍ଲଂଘନ କରିଥିବା ନେଇ ଅଭିଯୋଗ ହୋଇଥିଲା।
ଅଭିଯୋଗ ଅନୁସାରେ, ସହକାରୀ ଶିକ୍ଷକ ଓଝା ଫୁଲବାଣୀ ବ୍ଲକ ମିଣିଆ ପଞ୍ଚାୟତର ବିଘାପଦର ୧୨ନଂ. ବୁଥ ଓ ପାତ୍ରଙ୍କୁ ମାସାପଦର ୧୩ନଂ ବୁଥ୍ରେ ପ୍ରଥମ ପୋଲିଂ ଅଫିସର ଭାବେ ଦାୟିତ୍ୱ ଦିଆଯାଇଥିଲା। ଉଭୟେ ବୁଥ୍ରେ ସରପଞ୍ଚ ପ୍ରାର୍ଥୀଙ୍କ ବାଲଟ ପେପରକୁ ଉଦ୍ଦେଶ୍ୟମୂଳକ ଭାବେ ଭୁଲ ମୋଡ଼ି ଚିହ୍ନକୁ ଲୁଚାଇଥିଲେ। ଭୋଟ ଦେବାକୁ ଯାଇଥିବା ବେଳେ ସରପଞ୍ଚ ପ୍ରାର୍ଥିନୀ ମାଳତୀ ପ୍ରଧାନ ବୁଥକୁ ଯାଇ ଏହା ଦେଖିଥିଲେ। ଏପରିକି ପୋଲିଂ ଅଧିକାରୀ ତାଙ୍କୁ ଚିହ୍ନି ନ ପାରି ଅନ୍ୟ ଚିହ୍ନରେ ଭୋଟ ଦେବାକୁ କହିବା ସହ ଦୁର୍ବ୍ୟବହାର ପ୍ରଦର୍ଶନ କରିଥିଲେ। ଏ ନେଇ ଅଭିଯୋଗ ହେବାରୁ ନିର୍ବାଚନ ପରିଚାଳନା ଦାୟିତ୍ୱରେ ଥିବା ଉପରିସ୍ଥ ଅଧିକାରୀଙ୍କୁ ଅବଗତ କରିଥିଲେ। ସେକ୍ଟର ଅଫିସର ସୁରେନ୍ଦ୍ର ପାଣିଗ୍ରାହୀ ମଧ୍ୟ ବୁଥ୍ ପରିଦର୍ଶନରେ ଯାଇଥିବା ବେଳେ ବାଲଟ ତ୍ରୁଟି ନଜରକୁ ଆସିଥିଲା। ଏ ନେଇ ସରପଞ୍ଚ ପ୍ରାର୍ଥତ୍ନୀ ମାଳତୀ ପ୍ରଧାନଙ୍କ ଅଭିଯୋଗ କ୍ରମେ ଫୁଲବାଣୀ ବିଡିଓ ତଥା ନିର୍ବାଚନ ଅଧିକାରୀ ସେକ୍ଟର ଅଫିସର ସୁରେନ୍ଦ୍ର ପାଣିଗ୍ରାହୀଙ୍କୁ ଏହାର ତଦନ୍ତ ନିର୍ଦ୍ଦେଶ ଦେଇଥିଲେ। ଘଟଣାରେ ସତ୍ୟତା ଥିବା ନେଇ ତଦନ୍ତ ଅଧିକାରୀ ରିପୋର୍ଟ କରିବା ପରେ ସମ୍ପୃକ୍ତ ଶିକ୍ଷକମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ଫୁଲବାଣୀ ବିଡିଓ ଜିଲାପାଳଙ୍କୁ ସୁପାରିସ କରିଥିଲେ ା ଜିଲାପାଳ ଚିଠି ସଂଖ୍ୟା ୧୪୦୮/୫.୪.୨୨ ଓ ୧୪୧୨/୫.୪.୨୨ କ୍ରମେ ଉଭୟଙ୍କୁ କାର୍ଯ୍ୟରୁ ନିଲମ୍ବନ କରିଛନ୍ତି।