ସଇଁତଳା, ୨୩ା୨(ଡି.ଏନ.ଏ.): ବଲାଙ୍ଗୀର ଜିଲା ସଇଁତଳା ତହସିଲ ଅଞ୍ଚଳରେ ସରକାରୀ ଜମିରେ ବେଆଇନ ଇଟାଭାଟିମାନ ଗଢି ଉଠିଛି। ସଇଁତଳା ବ୍ଲକର ଟିକ୍ରାପଡ଼ା, ଝିଙ୍କିଡୁଙ୍ଗୁରୀ, କରମତଲା, ଧରପଗଡ଼, କୁମ୍ଭାରୀ, ଡ଼େଙ୍ଗ, ଭଦ୍ରା, ଡୁଙ୍ଗୁରୀପାଲି ଓ ଆମ୍ବପାଲି ପଞ୍ଚାୟତ ଦେଇ ପ୍ରବାହିତ ହୋଇଛି ଲାନ୍ଥନଦୀ । ଏହି ନଦୀକୂଳରେ ଥିବା ଧରପଗଡ଼ ପଞ୍ଚାୟତର ପେଣ୍ଡରାମାଲ, କରମତଲା ପଞ୍ଚାୟତର ଛନଛଡ଼ା, ଭଦ୍ରାର ମହଗାଁ, ଡ଼େଙ୍ଗ ପଞ୍ଚାୟତର ଡ଼େଙ୍ଗ, ଡୁଙ୍ଗୁରିପାଲିର ଡ଼ଙ୍ଗରମୁଣ୍ଡା ଆଦି ଅଞ୍ଚଳରେ ବେଧଡକଭାବେ ଇଟାଭାଟିମାନ ଗଢି ଉଠିଛି। ରାଜସ୍ବ ବିଭାଗର କେତେକ କର୍ମଚାରୀଙ୍କୁ ହାତକରି ଇଟାଭାଟି କରାଯାଇଥିବା ଅଭିଯୋଗ ହେଉଛି। ଏପରିକି ଧରପଗଡ଼ ପଞ୍ଚାୟତର ଗୋଏଲଭାଡ଼ି ଓ ମାକ୍ରି ଗ୍ରାମ ନିକଟ ସଂରକ୍ଷିତ ଜଙ୍ଗଲରେ ଇଟାଭାଟି ନିର୍ମାଣ ହୋଇଛି। ସଂରକ୍ଷିତ ଜଙ୍ଗଲରୁ ଗଛକାଟି ଇଟା ପୋଡା ଯାଉଛି। ଇଟାଭାଟି ପୋଡ଼ାଯାଉଥିବା ଯୋଗୁଁ ଅଞ୍ଚଳରେ ସ୍ବାଭାବିକଠାରୁ ଅଧିକ ତାପମାତ୍ରା ଦେଖାଦେଲାଣି। ଇଟା ପୋଡ଼ିବା ପାଇଁ ଜଙ୍ଗଲରୁ ଗଛ କଟାଯାଉଥିବାରୁ ଜଙ୍ଗଲ ବି ପଦା ହେଉଛି। ଏ ସମ୍ପର୍କରେ ତହସିଲଦାର ମନ୍ସଫିଲ କେରକେଟାଙ୍କୁ ପଚାରିବାରୁ ମାସେରୁ ଉଦ୍ଦର୍ବହେଲା ରାଜସ୍ବ ନିରୀକ୍ଷକମାନଙ୍କୁ ତଦନ୍ତ କରି ରିପୋର୍ଟ ଦେବାକୁ ଚିଠି କରାଯାଇଛି। ରିପୋର୍ଟ ମିଳିବା ପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କହିଥିଲେ।