କାମାକ୍ଷାନଗର, ୧୬ା୫(ଡି.ଏନ୍.ଏ.): ଜଙ୍ଗଲ ଜମିରେ ବେଆଇନ ଭାବେ ନିର୍ମାଣ ଚାଲିଛି ରାସ୍ତା। ବ୍ୟକ୍ତିଗତ ସ୍ବାର୍ଥ ପାଇଁ ଜଳସେଚନ ଲାଗି ଉଦ୍ଦିଷ୍ଟ କାଡା କେନାଲକୁ ଜେସିବି ସହାୟତାରେ ଭାଙ୍ଗି ଦିଆଯାଇଛି। ଫଳରେ ୨ ପଞ୍ଚାୟତର ଚାଷୀ ଜଳସେଚନରୁ ବଞ୍ଚତ୍ତ ହୋଇଛନ୍ତି। ଢେଙ୍କାନାଳ ଜିଲା କଙ୍କଡ଼ାହାଡ଼ ବ୍ଲକ ହଳଦୀକୁଣ୍ଡି ଗ୍ରାମ୍ୟ ଜଙ୍ଗଲରେ ଚାଲିଥିବା ଏଭଳି ଅବୈଧ ନିର୍ମାଣ ବିରୋଧରେ ଗ୍ରାମବାସୀ ଜିଲାପାଳଙ୍କ ଦ୍ୱାରସ୍ଥ ହୋଇ ଅଭିଯୋଗ କରିଛନ୍ତି।
ଅଭିଯୋଗ ଅନୁଯାୟୀ, କଙ୍କଡ଼ାହାଡ଼ ବ୍ଲକ ବାଟଗଁା ଛକଠାରୁ ୨ କି.ମି. ଦୂର ପୂର୍ତ୍ତ ବିଭାଗ ରାସ୍ତାରୁ ହଳଦୀକୁଣ୍ଡି ଗ୍ରାମ୍ୟ ଜଙ୍ଗଲ ଦେଇ ଏହି ରାସ୍ତା ନିର୍ମାଣ କରାଯାଉଛି। ଏଥିଲାଗି ରାଜସ୍ବ ବିଭାଗ ବିନା ଅନୁମତିରେ ଗୋଚର ଜମିରୁ ଜେସିବି ମେଶିନ ସହାୟତାରେ ମୋରମ ଖନନ କରାଯାଇ ରାସ୍ତା ନିର୍ମାଣରେ ବ୍ୟବହାର କରାଯାଉଛି। ଜଣେ ପ୍ରଭାବଶାଳୀ ବ୍ୟକ୍ତି ଫାର୍ମହାଉସ୍କୁ ଯାତାୟାତ ପାଇଁ ବେଆଇନ ଭାବେ ଏହି ରାସ୍ତା ନିର୍ମାଣ କରୁଥିବା ନେଇ ଗତ ମେ’ ୧ରେ ଅନୁଷ୍ଠିତ ଜନଶୁଣାଣି ଶିବିରରେ ହଳଦୀକୁଣ୍ଡି ଗ୍ରାମବାସୀ ଜିଲାପାଳଙ୍କ ନିକଟରେ ଅଭିଯୋଗ କରିଥିଲେ। କେବଳ ଏତିକି ନୁହେଁ, ଉକ୍ତ ରାସ୍ତା ପାଇଁ କାଡା କେନାଲକୁ ଭାଙ୍ଗି ଦିଆଯାଇଛି। ଫଳରେ ଏହା ଉପରେ ନିର୍ଭରଶୀଳ ବାଟଗଁା ଏବଂ ମକୁଆକାଟେଣୀ ପଞ୍ଚାୟତର ଶତାଧିକ ଚାଷୀଙ୍କ ଜମିକୁ ଜଳସେଚନ ଠପ୍ ହୋଇଯାଇଛି। ଏତେ ସବୁ ସତ୍ତ୍ୱେ ରାଜସ୍ବ ବିଭାଗ ପକ୍ଷରୁ ଏ ଦିଗରେ କୌଣସି ପଦକ୍ଷେପ ନିଆ ନ ଯିବା ପ୍ରଶ୍ନବାଚୀ ସୃଷ୍ଟି କରିଛି। ଏ ନେଇ ସହକାରୀ ନିର୍ବାହୀ ଯନ୍ତ୍ରୀ ହେମନ୍ତ କୁମାର ନାୟକଙ୍କୁ ପଚାରିବାରେ ରାସ୍ତା ନିର୍ମାଣ ପାଇଁ ବ୍ଲକରୁ ଅର୍ଥ ମଞ୍ଜୁର ହୋଇଛି ବୋଲି ପ୍ରଥମେ କହିଥିଲେ। ତେବେ ପରବର୍ତ୍ତୀ ସମୟରେ ମତ ବଦଳାଇ ବ୍ଲକ ପ୍ରଶାସନ ପକ୍ଷରୁ ରାସ୍ତା ପାଇଁ କୌଣସି ଅର୍ଥ ମଞ୍ଜୁର ହୋଇ ନ ଥିବା କହିଥିଲେ। ତେଣୁ କିଏ ଏବଂ କେଉଁ ସ୍ବାର୍ଥରେ ଜନବସତି ବିହୀନ ଜଙ୍ଗଲ ଜମିରେ ଏଭଳି ରାସ୍ତା ନିର୍ମାଣ କରୁଛି, ତାହାର ବିଧିବଦ୍ଧ ତଦନ୍ତ କରି କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଗ୍ରାମବାସୀ ଦାବି କରିଛନ୍ତି।
