ଭୁବନେଶ୍ୱର,୩୦।୪, (ଅନୁରାଧା ମହାରଣା): ଡାଲି ବେଆଇନ ଭାବେ ମହଜୁଦ ରଖୁଥିବା ବ୍ୟବସାୟୀଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଗତ କିଛି ଦିନ ଧରି କେତେକ ରାଜ୍ୟରେ ଲଗାତର ଡାଲି ଦର ବଢ଼ୁଥିବା ହେତୁ କେନ୍ଦ୍ର ସରକାର ଏପରି ପଦକ୍ଷେପ ନେଇଛନ୍ତି। ସୋମବାର ଠାରୁ କେନ୍ଦ୍ର ଏନେଇ ଯାଞ୍ଚ ପ୍ରକ୍ରିୟାକୁ କଡ଼ାକଡ଼ି କରିଛି। ଏହି ପରିପ୍ରେକ୍ଷୀରେ ଗତ ଦୁଇ ସପ୍ତାହ ମଧ୍ୟରେ ସରକାର ରାଜ୍ୟ, ବଡ ଆମଦାନୀକାରୀ, ହୋଲସେଲରଙ୍କ ସହ ଆଲୋଚନା କରିଛନ୍ତି। ଓଡ଼ିଶା, ମହାରାଷ୍ଟ୍ର, ଗୁଜରାଟ ଏବଂ ମଧ୍ୟପ୍ରଦେଶ ସମେତ ଦେଶର ୮ଟି ରାଜ୍ୟରେ ଡାଲିର ମୂଲ୍ୟ କ୍ରମାଗତ ଭାବେ ବୃଦ୍ଧି ପାଉଛି । ହରଡ଼, ମୁଗ ଓ ଚଣା ଡାଲି ମହଜୁଦ ପରିମାଣ ସମ୍ପର୍କରେ https://fcainfoweb.nic.in/psp/ ପୋର୍ଟାଲରେ ସୂଚନା ଦେବାକୁ ନିର୍ଦ୍ଦେଶ ରହିଛି। ଏପ୍ରିଲ ୧୫ରୁ ଏହି ନିର୍ଦ୍ଦେଶକୁ କାର୍ଯ୍ୟକାରୀ କରାଯାଇଛି। ତେବେ ପୋର୍ଟାଲରେ ଦେଇଥିବା ସୂଚନା ଏବଂ ମହଜୁଦ୍ ରଖିଥିବା ଡାଲିର ପରିମାଣ ମେଳ ଖାଉ ନଥିଲେ ସମ୍ପୃକ୍ତ ସଂସ୍ଥା ବିରୋଧରେ କଡ଼ା କାର୍ଯ୍ୟାନୁଷ୍ଠାନ ନିଆଯିବ । ଏଥିପାଇଁ ସ୍ବତନ୍ତ୍ର ଯାଞ୍ଚ ଟିମ୍ ଗଠନ କରାଯାଇଛି।
