ବାରିପଦା ଅଫିସ,୨୦।୧୦: ମୟୂରଭଞ୍ଜ ଜିଲା ବାରିପଦା ସହରରେ ବେଆଇନ ବାଣ ମହୁଜୁଦ ଓ ବିକ୍ରି ଚାଲିଛି। ଆବଶ୍ୟକ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଉ ନ ଥିବା ବେଳେ ବିପଦସଙ୍କୁଳ ସ୍ଥାନରେ ବାଣ ମହଜୁଦ୍ ରଖାଯାଉଛି। ପ୍ରଶାସନିକ ଅବହେଳାରୁ କୋଟି କୋଟି ଟଙ୍କାର ରାଜସ୍ବ ହରାଉଛନ୍ତି ସରକାର। ଅଘଟଣ ଘଟିବା ପୂର୍ବରୁ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସହରବାସୀ ଦାବି କରିଛନ୍ତି ।
ଆଲୋକର ପର୍ବ ଦୀପାବଳୀରେ ବାଣ ଫୁଟାଇ ମଜା ନେବା ପାଇଁ ବାଣ ଦୋକାନରେ ଲୋକେ ଭିଡ଼ ଜମାଉଛନ୍ତି। ବାରିପଦା ସହର ଉପକଣ୍ଠ ପାଲବଣୀ ବାଇପାସ ସ୍ଥିତ ରିଲାଏନ୍ସ ପେଟ୍ରୋଲ ପମ୍ପ ନିକଟରେ ବେଆଇନ ବାଣ ଓ ଆତସବାଜି ମହଜୁଦ୍ ରଖି ଜଣେ ବ୍ୟବସାୟୀ ବିକ୍ରି ଚଳାଇ ଆସୁଛନ୍ତି। ସେ ଦୀର୍ଘ ଏକ ମାସ ପୂର୍ବରୁ ବାଣ ବିକ୍ରି କରୁଥିଲେ ମଧ୍ୟ ଜିଲା ପ୍ରଶାସନ ପାଖରେ କୌଣସି ସୂଚନା ନ ଥିବା ଜଣାପଡ଼ିଛି। ଗୋଦାମ ପାଇଁ ଗୋଟିଏ ସ୍ଥାନର ଅନୁମତି ଥିବା ବେଳେ ଜନବସତି ଅଞ୍ଚଳରେ ସେ ବାଣ ମହଜୁଦ ରଖିଥିବା ଅଭିଯୋଗ ହେଉଛି। ପୋଲିସ, ଅଗ୍ନିଶମ ଓ ଜିଲା ପ୍ରଶାସନ ପକ୍ଷରୁ ଗ୍ରାମଞ୍ଚଳରେ ଯେଭଳି ଚଢ଼ାଉ କରାଯାଉଛି ସେହିପରି ସହରାଞ୍ଚଳରେ ଚଢ଼ାଉ କରାଯାଉନାହିଁ।
ବାରିପଦା ଓ ରାଇରଙ୍ଗପୁର ମ୍ୟୁନିସିପାଲଟି, କରଞ୍ଜିଆ ଓ ଉଦଳା ପୌରାଞ୍ଚଳ ସମେତ ୨୬ଟି ବ୍ଲକରେ ଥିବା ଛୋଟ ବଡ଼ ବଜାରର ବ୍ୟବସାୟୀମାନେ ଆତସବାଜି ସାମଗ୍ରୀ ଓ ବାଣ କିଣା ଆରମ୍ଭ କରି ବିକ୍ରି ପାଇଁ ଲାଇସେନ୍ସ ଆବେଦନ କରିଛନ୍ତି। ଅଦ୍ୟାବଧି ଜିଲାରେ ୧୪୨ଜଣଙ୍କ ମଧ୍ୟରୁ ୯୦ଜଣ ଲାଇସେନ୍ସ ପାଇଥିବା ବେଳେ ତନ୍ମଧ୍ୟରୁ ବାରିପଦା ସହରରେ ୨୧ଜଣ ବାଣ ବିକ୍ରି ପାଇଁ ଅନୁମତିପତ୍ର ପାଇଛନ୍ତି। ସମସ୍ତେ ଛଉ ପଡ଼ିଆଠାରେ ବାଣି ବିକ୍ରି କରିବାକୁ ନିର୍ଦ୍ଦେଶରେ ଉଲ୍ଲେଖ ରହିଛି।
ତେବେ ଅସାଧୁ ବ୍ୟବସାୟୀ ଜଣକ ଉଦ୍ଦିଷ୍ଟ ସ୍ଥାନରେ ବାଣ ନ ରଖି ଜନବସତି ତଥା ବିପଦପୂର୍ଣ୍ଣ ସ୍ଥାନରେ ମହଜୁଦ ରଖିବାରୁ କୌଣସି ମୁହୂର୍ତ୍ତରେ ଅଘଟଣ ଆଶଙ୍କାକୁ ଏଡ଼ାଇ ଦେଇ ହେବନାହିଁ ବୋଲି ଅଞ୍ଚଳବାସୀ ପ୍ରକାଶ କରିଛନ୍ତି। ଏ ସଂକ୍ରାନ୍ତରେ ଅଗ୍ନିଶମ ବିଭାଗର ଅତିରିକ୍ତ ଫାୟାର ଅଫିସର ଭବେନ୍ଦ୍ର ନାଥ ଦେ କୁହନ୍ତି, ବାଣ ମହଜୁଦ ରଖାଯିବା ନେଇ କୌଣସି ଅନୁମତିପତ୍ର ବିଭାଗର ହସ୍ତଗତ ହୋଇନାହିଁ। ଖୁବ୍ଶୀଘ୍ର ଚଢ଼ାଉ କରାଯାଇ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ବେଆଇନ ବାଣ ବ୍ୟବସାୟୀଙ୍କ ବିରୋଧରେ କୋଠର କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ବିଭାଗୀୟ ଅଧିକାରୀଙ୍କ ସହ ଆଲୋଚନା କରାଯାଇଛି। ମିଳିତ ଭାବେ ଚଢ଼ାଉ କରି ଆବଶ୍ୟକ ପଦକ୍ଷେପ ଗ୍ରହଣ କରାଯିବ ବୋଲି ଅତିରିକ୍ତ ଜିଲାପାଳ ରୁଦ୍ର ନାରାୟଣ ମହାନ୍ତି ପ୍ରକାଶ କରିଛନ୍ତି ା ତେବେ ଜିଲା ପ୍ରଶାସନ ଓ ମ୍ୟୁନସିପାଲିଟି ପକ୍ଷରୁ ଚଢ଼ାଉ କରା ନ ଗଲେ ଆଗାମୀ ଦିନରେ ଏହିଭଳି ବ୍ୟବସାୟୀମାନେ ମନୋମୁଖି ବେପାର ଆରମ୍ଭ କରିବେ ବୋଲି ସାଧାରଣରେ ମତପ୍ରକାଶ ପାଉଛି ା