ନୟାଗଡ଼,୩୦।୧୧(ଲୋକନାଥ ମିଶ୍ର)ନୟାଗଡ଼ ବ୍ଲକ୍ ନୋତ୍ତରସ୍ଥିତ ଆଦର୍ଶ ବିଦ୍ୟାଳୟଠାରୁ ୨୦୦ ମିଟର ଦୂର ମୁଣ୍ଡଳମୁଣି ପାହାଡ଼ରେ ଚାଲିଛି ବେଆଇନ ବ୍ଲାଷ୍ଟିଂ। ଜଣେ ଜିଲା ପରିଷଦ ସଭ୍ୟ ଓ ପୂର୍ବତନ ବ୍ଲକ ଅଧ୍ୟକ୍ଷାଙ୍କ ସ୍ବାମୀଙ୍କ ସହାୟତାରେ ଏହି ବ୍ଲାଷ୍ଟିଂ ଚାଲିଛି। ନୟାଗଡ଼ ତହସିଲ ଏ ସଂକ୍ରାନ୍ତରେ ଅବଗତ ଥିଲେ ମଧ୍ୟ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରୁ ନ ଥିବା ଅଭିଯୋଗ ହୋଇଛି ।
ପାହାଡ଼ରେ ବ୍ଲାଷ୍ଟିଂ, ଜେସିବି ଲଗାଇ ପଥର ଭାଙ୍ଗିବା ସମୟରେ ଜୋରରେ ଶଦ୍ଦ ହେଉଛି । ଏହାଦ୍ୱାରା ଉପରୋକ୍ତ ସ୍କୁଲରେ ପାଠପଢ଼ାରେ ବ୍ୟାଘାତ ସୃଷ୍ଟି ହେଉଛି। ସେହିପରି ପଥର ଖଣ୍ଡ ମଧ୍ୟ ସ୍କୁଲ ଓ ଆଖପାଖ ଅଞ୍ଚଳରେ ଛିଟିକି ପଡୁଛି। ଅବଶ୍ୟ ଛାତ୍ରୀଛାତ୍ରଙ୍କ ଉପରେ ପଡିନାହିଁ, ତେବେ କୌଣସି ସମୟରେ ବି ଏହି ପଥରଖଣ୍ଡ ପଡି ଛାତ୍ରୀଛାତ୍ରମାନେ ଆହତ ହୋଇପାରନ୍ତି ବୋଲି ଅଭିଭାବକମାନଙ୍କ ମଧ୍ୟରେ ଆଶଙ୍କା ପ୍ରକାଶ ପାଇଛି। ଦିନବେଳା ପଥର ଭଙ୍ଗା ଯାଉଥିବାରୁ ସେହି ଅଞ୍ଚଳ ପ୍ରଦୂଷିତ ହେଉଛିା ଏହାଦ୍ୱାରା ଛାତ୍ରୀଛାତ୍ରଙ୍କ ପାଠପଢ଼ାରେ ବ୍ୟାଘାତ ସୃଷ୍ଟି ହେଉଛି ା
ପରିବେଶବିତ୍ ଶ୍ରୀଧର ସାହୁ କୁହନ୍ତି, ମୁଣ୍ଡଳମୁଣି ପାହାଡ଼ କାହାକୁ ଲିଜ୍ ଦିଆଯାଇନି । ତେବେ ଜଣେ ଜିଲା ପରିଷଦ ସଭ୍ୟ କିପରି ବେଆଇନ ଭାବେ ପଥରଖନନ କରୁଛନ୍ତି ତାହା ଅନେକଙ୍କୁ ବିସ୍ମିତ କରୁଛି। ପ୍ରଶାସନ ଅବଗତ ଥିଲେ ବି ଜିଲା ପରିଷଦ ସଭ୍ୟଙ୍କ ବେଆଇନ ପଥରଖନନ ଉପରେ ରୋକ୍ ଲଗାଇବାକୁ ସାହସ କରିପାରୁନି। ଏଣୁ ମୁଣ୍ଡିଆ ନଷ୍ଟ ହେବା ସହ ସ୍କୁଲ ଆଖପାଖ ପରିବେଶ ନଷ୍ଟ ହେବା ଆରମ୍ଭ କରିଛି। ଜିଲା ପ୍ରଶାସନ ହସ୍ତକ୍ଷେପ କରି ବେଆଇନ ପଥରଖନନକୁ ବନ୍ଦ କରିବା ଦରକାର। ପରିବେଶବିତ୍ ବିଭୂତି ଦାଶ କୁହନ୍ତି, ସ୍କୁଲ ପାଖରେ ପାହାଡ଼ ଅଛି ମାନେ ତାକୁ ନଷ୍ଟ ନ କରି ବରଂ ତାର ପୁନରୁଦ୍ଧାର କରିବାର ଆବଶ୍ୟକା ରହିଛି । ଜଣେ ଜିଲା ପରିଷଦ ସଭ୍ୟ ଜଙ୍ଗଲର ସୁରକ୍ଷା ଦିଗରେ କାମ କରିବା ଉଚିତ । ଲୋକ ପ୍ରତିନିଧି ହୋଇ ଜଙ୍ଗଲ ଉଜାଡୁଥିବାରୁ ସାଧାରଣରେ ଅସନ୍ତୋଷ ଓ ଉଦ୍ବେଗ ସୃଷ୍ଟି ହେଉଛି । ସ୍କୁଲର ଛାତ୍ରୀଛାତ୍ରଙ୍କ ଭବିଷ୍ୟତକୁ ଆଖି ଆଗରେ ରଖି ମୁଣ୍ଡିଆର ବେଆଇନ ଖନନ ବନ୍ଦ ହେବା ଦରକାର। ସାମାଜିକ କର୍ମୀ ଶାନ୍ତନୁ ବିଶୋଇ କୁହନ୍ତି, କ୍ଷମତାର ଅପବ୍ୟବହାର ଠିକ୍ ନୁହେଁ। ଜିଲା ପରିଷଦ ସଭ୍ୟ ଛାତ୍ରୀଛାତ୍ର, ସ୍କୁଲକୁ ଦେଖି ବେଆଇନ ଖନନ ବନ୍ଦ କରିବା ଉଚିତ। ନଚେତ୍ ସମୟ ଆସିବ ଜିଲା ପରିଷଦ ସଭ୍ୟ ନିଜର ଭୁଲ ସମାଧାନ କରିବାକୁ ସମୟ ପାଇବେନି। ଅନ୍ୟପକ୍ଷେ ଜିଲାପାଳ ଏ ଦିଗରେ ପଦକ୍ଷେପ ନେବା ଜରୁରୀ ବୋଲି ସେ କହିଛନ୍ତି।