ଭୁବନେଶ୍ୱର,୨୨।୨(ବ୍ୟୁରୋ): ଭୁବନେଶ୍ୱର ମଧ୍ୟଦେଇ ଯାଇଥିବା ୧୬ ନଂ. ଜାତୀୟ ରାଜପଥ ସହରବାସୀଙ୍କ ପାଇଁ ଏବେ ବଡ଼ ସମସ୍ୟା ପାଲଟିଛି। ବାରମ୍ବାର ଦୁର୍ଘଟଣା ଜୀବନ ନେଉଥିବାବେଳେ ଏବେ ବିଭିନ୍ନ ସ୍ଥାନରେ ଟ୍ରାଫିକ ଜାମ୍ ଅଣନିଃଶ୍ୱାସୀ କରିଦେଉଛି। ଖଣ୍ଡଗିରିଠାରୁ ଖୋର୍ଦ୍ଧା ପର୍ଯ୍ୟନ୍ତ ବିଭିନ୍ନ ସ୍ଥାନର ଓଭରବ୍ରିଜ୍ ନିର୍ମାଣ ଚାଲିଥିବାରୁ ଗାଡ଼ିମୋଟର ଚଳାଚଳ ଗୁରୁତର ବାଧାପ୍ରାପ୍ତ ହୋଇଛି। ବିଶେଷକରି ଖଣ୍ଡଗିରି ଛକ ଓ ଆଖପାଖ ଜାତୀୟ ରାଜପଥ ପାର୍ଶ୍ୱରେ ବସ୍ ଓ ଟ୍ରକ୍ ପାର୍କିଂ କରାଯାଉଥିବାରୁ ଜଟିଳ ପରିସ୍ଥିତି ସୃଷ୍ଟି ହେଉଛି। ପୋଲିସ, ରାଜପଥ କର୍ତ୍ତୃପକ୍ଷ ଓ ବ୍ରିଜ୍ ନିର୍ମାଣ କରୁଥିବା ସଂସ୍ଥା ସମସ୍ୟା ସମାଧାନ ଉପରେ ଗୁରୁତ୍ୱ ଦେଉ ନ ଥିବାରୁ ଦିନକୁ ଦିନ ଯନ୍ତ୍ରଣା ବଢ଼ୁଛି।
୮ଟାରୁ ବିଳମ୍ବିତ ରାତି ପର୍ଯ୍ୟନ୍ତ ଟ୍ରାଫିକ୍ ଜାମ୍ ଲାଗି ରହୁଛି। ଦିନଠାରୁ ରାତି ସମସ୍ୟା ସବୁଠୁ ବଳିଯାଉଛି। ଖଣ୍ଡଗିରି ଓ ଉଦୟଗିରିକୁ ପର୍ଯ୍ୟଟକଙ୍କ ଆଗମନ ଲାଗି ରହୁଛି। ଏଥିସହ ସ୍ଥାନୀୟ ଅଞ୍ଚଳରେ ଥିବା ହସ୍ପିଟାଲ, ଶିଳ୍ପାନୁଷ୍ଠାନ, ବଜାର ଓ କଲୋନୀକୁ ଖଣ୍ଡଗିରି ଛକଦେଇ ଲୋକେ ଯାତାୟାତ କରୁଛନ୍ତି। ଜାତୀୟ ରାଜପଥ ହୋଇଥିବାରୁ ଏହି ବାଟଦେଇ ପ୍ରତିଦିନ ଅସଂଖ୍ୟ ଗାଡ଼ିମୋଟର ଚଳାଚଳ କରୁଛି। ଟ୍ରାଫିକ ପୋଷ୍ଟରେ ଟ୍ରାଫିକ ପୋଲିସ ଜଗୁଥିଲେ ମଧ୍ୟ ଭିଡ ସମ୍ଭାଳିବା ତାଙ୍କ ପକ୍ଷେ ସମ୍ଭବ ହେଉନାହିଁ। ରାତି ସମୟରେ ଶ୍ରମିକ ମାନେ ଓଭରବ୍ରିଜ୍ କାର୍ଯ୍ୟ କରୁଥିବାରୁ କମିଶନରେଟ୍ ପୋଲିସ ପକ୍ଷରୁ ଗାଡି ଚଳାଚଳ ଉପରେ କିଛି ପ୍ରତିବନ୍ଧକ ଲଗାଯାଇଛି। କୋଳଥିଆରୁ ବରମୁଣ୍ଡା ଓଭରବ୍ରିଜ ଆରମ୍ଭ ଯାଏ ଓ୍ବାନ୍ ଓ୍ବେ କରାଯାଉଛି। ଏହା ସାଙ୍ଗକୁ ବେଆଇନ ପାର୍କିଂ ବୋଝ ଉପରେ ନଳିତା ବିଡା ସଦୃଶ ହେଉଛି। ରମାମଣୀ ପେଟ୍ରୋଲ ପମ୍ପ ସାମ୍ନା ରାସ୍ତାର ଦୁଇ ପାର୍ଶ୍ୱରେ ଅନେକ ବସ୍ ପାର୍କିଂ ହୋଇ ରହୁଛି। ଦିନରେ ବିଭିନ୍ନ ସ୍ଥାନରୁ ଆସିଥିବା ବସ୍ ରାତି ସମୟରେ ଏହିଠାରେ ତେଲ ପକାଇବା ସହ ଗାଡିକୁ ରାସ୍ତା ପାର୍ଶ୍ୱରେ ପାର୍କିଂ କରି ରଖୁଛନ୍ତି। ରାସ୍ତା ଦୁଇ ପାର୍ଶ୍ୱର ଅଧାରୁ ଅଧିକ ଜାଗା ଏହି ବେଆଇନ ବସ୍ ପାର୍କିଂରେ ଯାଉଛି। ରାତି ସମୟରେ ଭୁବନେଶ୍ୱରରୁ ଦୂର ସ୍ଥାନକୁ ବସ୍ ଓ ଟ୍ରକ୍ ଚଳାଚଳ କରୁଛି। ଏମିତିକି ଅସଂଖ୍ୟ ମାଲବାହୀ ଟ୍ରକ୍ , କଣ୍ଟେନର ଆସୁଛି। ତେଣୁ ରାତି ୯ଟା ପରେ ଟ୍ରାଫିକ ଜାମ୍ ଅସମ୍ଭାଳ ହୋଇପଡୁଛି। ଜାତୀୟ ରାଜପଥ ଉପରେ ବସ୍, ଟ୍ରକ୍, କାର୍ ବହୁ ସମୟ ଧରି ଲମ୍ବା ଲାଇନରେ ଛିଡା ହୋଇ ରହୁଥିବାରୁ ଦୀର୍ଘ ସମୟ ଟ୍ରାଫିକ ଜାମ୍ ହେଉଛି। ସାଧାରଣ ଲୋକଙ୍କଠାରୁ ଆମ୍ବୁଲାନ୍ସ ମଧ୍ୟ ଘଣ୍ଟା ଘଣ୍ଟା ଧରି ଜାମ୍ରେ ଫସି ରହୁଥିବା ଦେଖିବାକୁ ମିଳୁଛି।