ଯାଜପୁର ଅଫିସ,୨୫।୧୨: ବ୍ୟାସନଗର ତହସିଲ ଅଧୀନ ସାଆଁଳାଠାରୁ ଦଶରଥପୁର ତହସିଲର ଧରମପୁର ପର୍ଯ୍ୟନ୍ତ ବୈତରଣୀ ନଦୀପଠାରୁ ବେଆଇନ ବାଲି ଉତ୍ତୋଳନ ସୀମା ଲଂଘିଛି। ଏପରିକି ବୈତରଣୀ ନଦୀବନ୍ଧକୁ କାଟି ବାଲି ପରିବହନ ହେଉଥିବାରୁ ବନ୍ୟା ପ୍ରଭାବିତ ଅଞ୍ଚଳବାସୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି। ତହସିଲ ପ୍ରଶାସନ ପକ୍ଷରୁ ବାଲି ଉତ୍ତୋଳନ ପାଇଁ ମାନୁଆଲ ଅନୁମତି ମିଳିଥିବାବେଳେ ସମସ୍ତ ବାଲିଘାଟରେ ମେଶନ ବ୍ୟବହାର ହେଉଥିବା ଦେଖିବାକୁ ମିଳୁଛି। ଶାସକ ଦଳର ଜଣେ ନେତାଙ୍କ ସୁରକ୍ଷାରେ ଲିଜ୍ଧାରୀମାନେ ଅନୁମୋଦନଠାରୁ ବହୁ ଅଧିକ ପରିମାଣ ବାଲି ପ୍ରୋକଲିନ ମେଶିନରେ ଉତ୍ତୋଳନ କରି ବିନା ଟ୍ରାନଜିଟ ଫର୍ମରେ ପରିବହନ ଓ ବିକ୍ରି କରୁଛନ୍ତି। ଫଳରେ ତହସିଲ ପ୍ରଶାସନ ସମ୍ପୃକ୍ତ ଲିଜ୍ଧାରୀମାନଙ୍କ ବିରୋଧରେ ଲିଜ୍ ରଦ୍ଦ, ବେଆଇନ ଚାଲାଣ କରୁଥିବା ଗାଡି ଜବତ, ଜରିମାନା ଆଦାୟ ଆଦି କରିପାରୁନାହିଁ। ଅନ୍ୟପକ୍ଷେ ଓଭରଲୋଡିଂ ବାଲି ପରିବହନ ଯୋଗୁ ଆଖପାଖ ଗ୍ରାମର ରାସ୍ତାଗୁଡିକ ନଷ୍ଟ ହେବା ସହ ଗମନାଗମନ ଅନୁପଯୋଗ ହୋଇପଡୁଛି। ଏନେଇ ଗ୍ରାମ୍ୟ ନିର୍ମାଣ ଏବଂ ପୂର୍ତ୍ତ ବିଭାଗ ପକ୍ଷରୁ ପଦକ୍ଷେପ ନେବାକୁ ନିର୍ଦ୍ଦେଶ ହୋଇଥିଲେ ହେଁ କିଛି ସୁଫଳ ମିଳିପାରୁନାହିଁ।
ବ୍ୟାସନଗର ତହସିଲ ଅଧୀନ ବୈତରଣୀ ନଦୀରେ ୬ଟି ବାଲିଘାଟକୁ ୫ ବର୍ଷିଆ ଲିଜ୍ ଦିଆଯାଇଛି। ଏଥିରେ ସାଆଁଳା-୨ ବାଲିଘାଟରୁ ୨୮,୪୩୦ ଘନମିଟର, ମୁକୁନ୍ଦପୁର-୧ ବାଲିଘାଟରୁ ୧୦,୦୪୦ ଘନମିଟର, ସାଲବା ବାଲିଘାଟରୁ ୧୬,୭୩୦ ଘନମିଟର, ରଣପାଳ ବାଲିଘାଟରୁ ୫,୫୨୦ ଘନମିଟର, ଧନତ୍ରୀ ବାଲିଘାଟରୁ ୯,୬୮୦ ଘନମିଟର ଓ ନିଶଙ୍ଖପୁର ବାଲିଘାଟରୁ ୨୪,୭୯୫ ଘନମିଟର ବାଲି ଉତ୍ତୋଳନ କରିବାକୁ ଅନୁମତି ମିଳିଛି। ଅନୁମତି ପତ୍ରରେ ପ୍ରୋକଲିନ ମେଶିନ ବ୍ୟବହାର ହୋଇ ପାରିବ ନାହିଁ ଏବଂ ମାନୁଆଲ ଭାବେ ଉତ୍ତୋଳନ କରାଯିବାକୁ ନିର୍ଦ୍ଦେଶ ହୋଇଛି। ହେଲେ ଏହି ନିର୍ଦ୍ଦେଶକୁ କେହି ମାନୁନାହାନ୍ତି। ବୈତରଣୀ ନଦୀର ଦକ୍ଷିଣ ପାର୍ଶ୍ୱ ସାଆଁଳାଠାରୁ ମୂଳାପାଳ ପର୍ଯ୍ୟନ୍ତ ଜନବସତି ଦେଇ ଭାରିଯାନ ଚଳାଚଳ ଯୋଗୁ ରାସ୍ତା ଅବସ୍ଥା ଖରାପ ହେଉଥିବା ନେଇ ଗ୍ରାମ୍ୟ ନିର୍ମାଣ ବିଭାଗ ପକ୍ଷରୁ ଗତ ଅକ୍ଟୋବରରେ ଯାଜପୁର ଆଞ୍ଚଳିକ ପରିବହନ ଅଧିକାରୀ (ଆରଟିଓ)ଙ୍କ ସହାୟତା ଲୋଡ଼ାଯାଇଥିଲା। ତେବେ ଉପରୋକ୍ତ ସରକାରୀ ପତ୍ର ଏବଂ ସ୍ଥାନୀୟ ଲୋକଙ୍କ ଚେତାବନୀ କିଛି କାମରେ ଲାଗି ନାହିଁ। ବରଂ ବେଆଇନ ଉତ୍ତୋଳନ ଏବଂ ପରିବହନ ବଢ଼ିଛି ବୋଲି ଅଞ୍ଚଳବାସୀ ପ୍ରକାଶ କରିଛନ୍ତି।
ଦଶରଥପୁର ବ୍ଲକ କସପା ପଞ୍ଚାୟତ ଅଧୀନ ବୈତରଣୀ ନଦୀର ପଲ୍ଲାସାହି ଘାଟରେ ଦୈନିକ ଶହ ଶହ ଟ୍ରିପ୍ ବାଲି ଲୁଟ୍ ହେଉଛି। ଦଶରଥପୁର ତହସିଲ ପ୍ରଶାସନ ଏ ସମ୍ପର୍କରେ ଜାଣିଥିଲେ ସୁଦ୍ଧା ପାଟି ଖୋଲିପାରୁନାହାନ୍ତି। ଏହାଦ୍ୱାରା ନଦୀବନ୍ଧ ଦୁର୍ବଳ ହେବା ସହିତ ପ୍ରତିବର୍ଷ ବର୍ଷାଦିନେ ଘାଇ ସୃଷ୍ଟି ହୋଇ ଏହି ବ୍ଲକର ଜନସାଧାରଣ ନାହିଁ ନ ଥିବା ସମସ୍ୟା ଭୋଗୁଛନ୍ତି। ଦଶରଥପୁର ବ୍ଲକ୍ କସପା ପଞ୍ଚାୟତର ପଲ୍ଲାସାହୀ ଘାଟ ଓ ଏହାର ଆଖପାଖ ନଦୀଶଯ୍ୟାରୁ ବାଲିମାଫିଆମାନେ ମେଶିନରେ ବାଲି ଉଠାଇ ଚୋରାଚାଲାଣ କରୁଛନ୍ତି। ବୈତରଣୀ ନଦୀର ଉଭୟ ପାର୍ଶ୍ୱ ତଥା ଯାଜପୁର ଓ ଭଦ୍ରକ ଜିଲା ଅଞ୍ଚଳରେ ଶତାଧିକ ଟ୍ରାକ୍ଟର ସହାୟତାରେ ବାଲି ଚାଲାଣ ହେଉଥିବାର ଦେଖାଯାଇଛି। ଏପରି କି ବୈତରଣୀ ନଦୀବନ୍ଧକୁ ଏକାଧିକ ସ୍ଥାନରେ କାଟି ରାସ୍ତା ନିର୍ମାଣ କରିଥିବା ଦେଖାଯାଇଛି। ପଲ୍ଲାସାହି ନିକଟରେ ଥିବା ବୈତରଣୀ ନଦୀର ପଲ୍ଲାସାହି-ହସନାବାଦ ସେତୁର ଅତି ନିକଟସ୍ଥ ଉଭୟ ପାର୍ଶ୍ୱରୁ ବୁ ପରିମାଣରେ ବେଆଇନ ଭାବେ ବାଲି ଉଠାଣ ହେଉଛି। ଫଳରେ ବିପୁଳ ଟଙ୍କା ବ୍ୟୟରେ ନିର୍ମିତ ସେତୁ ପ୍ରତି ବିପଦ ସୃଷ୍ଟି ହେବା ସହିତ ନଦୀବନ୍ଧ ଭାଙ୍ଗିବା ଆଶଙ୍କା ରହିଛି। ନିର୍ଦ୍ଧାରିତ ସମୟ ମଧ୍ୟରେ ସଇରାତ ନିଲାମ ନ ହେବା ଏବଂ ନିଲାମ ସତ୍ତ୍ୱେ ଘାଟ ଖୋଲିବାରେ ବିଳମ୍ବ ହେତୁ ବାଲି ମାଫିଆମାନେ ଘାଟଗୁଡ଼ିକରୁ ବାଲି ଲୁଟ୍ କରିବାର ସୁଯୋଗ ପାଉଛନ୍ତି ବୋଲି ମତପ୍ରକାଶ ପାଇଛି। ଏ ସଂକ୍ରାନ୍ତରେ ଦଶରଥପୁର ତହସିଲଦାର ଅବିନାଶ ବିଶ୍ୱଜିତ ସେଠୀଙ୍କୁ ପଚାରିବାରୁ ସେ କହିଛନ୍ତି, ବେଆଇନ ବାଲି ଉତ୍ତୋଳନ ନେଇ କୌଣସି ଅଭିଯୋଗ ହୋଇନାହିଁ। ତଥାପି ଚଢାଉ କରାଯାଇ ଆବଶ୍ୟକ ପଦକ୍ଷେପ ନିଆଯିବ।