ମୋରଡା,୯।୬(ଡି.ଏନ.ଏ): ବେଆଇନ ବାଲି ଚୋରା ଚାଲାଣକୁ ଚଢାଉ କରିଛି ମୋରଡା ପ୍ରଶାସନ। ସୂଚନାଅନୁଯାୟୀ, ଗୁରୁବାର ବିଳମ୍ବିତ ରାତିରୁ ଶୁକ୍ରବାର ସକାଳ ଯାଏଁ ଉକ୍ତ ନଦୀଘାଟରେ ୨ଟି ଟ୍ରାକ୍ଟରରେ ବାଲି ଲୋଡିଂ ହେଉଥିଲା। ତେବେ କୌଣସି ସୂତରୁ ଖବର ପାଇ ମୋରଡ଼ା ତହସିଲଦାର ଅନନ୍ତ କୁମାର ହାଁସଦା, ୨ଜଣ ଆରଆଇଙ୍କ ସହିତ ଶୁକ୍ରବାର ଭୋରରୁ ଅଚାନକ ଭାବେ ସେଠାରେ ଚଢ଼ାଉ କରିଥିଲେ। ତହସିଲଦାରଙ୍କୁ ଦେଖି ଅଭିଯୁକ୍ତ ବାଲି ଟ୍ରାକ୍ଟରର ଡ୍ରାଇଭର ବାଲି ଅନଲୋଡ଼ିଂ କରୁଥିବାବେଳେ ଟ୍ରାକ୍ଟର ଛାଡି ଦୌଡ଼ି ପଳାଇଥିଲା ଏବଂ ଅନ୍ୟ ଏକ ଟ୍ରାକ୍ଟର ଡ୍ରାଇଭର ମଧ୍ୟ ଖସି ପଳାଇବାରେ ସମର୍ଥ ହୋଇଥିଲା।
ସୂଚନାଯୋଗ୍ୟ, ମୟୁରଭଞ୍ଜ ଜିଲା ମୋରଡା ତହସିଲ ଅଧୀନ ଶିଳଦା-ପାଟପୁର ନଦୀଘାଟରେ ବେଆଇନ ଭାବେ ଦୈନିକ ବିଳମ୍ବିତ ରାତିରୁ ସକାଳ ଯାଏଁ ଶହ ଶହ ଟ୍ରିପ ବାଲି ଚୋରାରେ ଚାଲାଣ ହେଉଛି। ଏହାର ଖବର ପାଇ ପ୍ରଶାସନ ଶୁକ୍ରବାର ଘଟଣାସ୍ଥଳରେ ଚଢାଉ କରିଛି। ପ୍ରଶାସନ ପକ୍ଷରୁ ଏବେ ପର୍ଯ୍ୟନ୍ତ ଚଢ଼ାଉ ଜାରି ରହିଛି l
ତେବେ ଉପରୋକ୍ତ ଏକ ଟ୍ରାକ୍ଟର(ଓଡି-ୱାଇ-୩୩୩୮)କୁ ଜବତ କରିବାରେ ସକ୍ଷମ ହୋଇଛନ୍ତି ମୋରଡା ତହସିଲଦାର l ଜବତ ଟ୍ରାକ୍ଟରକୁ ଚିତ୍ରଡା ଫାଣ୍ଡିରେ ଜିମା ଦେଇଛନ୍ତି। ଆସନ୍ତା ସୋମବାର ଦିନ ଟ୍ରାକ୍ଟରକୁ ଜରିମାନା କରାଯିବାର ସୂଚନା ଦେଇଛନ୍ତି ତହସିଲଦାର ଅନନ୍ତ କୁମାର ହାଁସଦା l