ରାୟଗଡ଼ା,୬।୧୦ (ଆଶିଷ ରଞ୍ଜନ ପଣ୍ଡା): ରାୟଗଡ଼ା ଜିଲାରେ ପ୍ରବାହିତ ଚିରସ୍ରୋତା ନାଗାବଳୀ ନଦୀରୁ ବେଆଇନ ଭାବେ ବାଲି ଖନନ କରାଯାଇ ପ୍ରତିଦିନ ୫୦ରୁ ୬୦ ଟ୍ରକ୍ ଆନ୍ଧ୍ରପ୍ରଦେଶ ଚାଲାଣ ହେଉଛି। ନଦୀ ଗର୍ଭରେ ବଡ଼ ବଡ଼ ମେଶିନ ଲଗାଇ ବାଲି ଖନନ କରାଯାଉଥିବାରୁ ନାଗାବଳୀ ନଦୀ ଏବେ କୂଳ ଲଂଘିବା ପରିସ୍ଥିତିକୁ ଆସିଗଲାଣି। ରାୟଗଡ଼ା ବ୍ଲକ ଖିଲମିସଗୁଡ଼ାସ୍ଥିତ ନାଗାବଳୀ ନଦୀ ତଟରୁ ବାଲି ଖନନ ବେଳେ ଗୁରୁବାର ରାଜସ୍ବ ବିଭାଗ ପକ୍ଷରୁ ୨ ଟ୍ରକ୍ ଓ ଏକ ଏକ୍ସାଭେଟର ଜବତ କରାଯାଇଛି।
ଖିଲମିସଗୁଡ଼ାସ୍ଥିତ ନାଗାବଳୀ ନଦୀ ତଟରୁ ବାଲି ଖନନ କରାଯାଇ ଆନ୍ଧ୍ରପ୍ରଦେଶର ବିଶାଖାପାଟଣା, ବିଜୟନଗରମ ସହରକୁ ଚାଲାଣ କରାଯାଉଛି। ଖଣି ବିଭାଗର ଅପାରଗତା ଓ ଦୁର୍ନୀତି ମନୋଭାବ ଯୋଗୁ ଆନ୍ଧ୍ରପ୍ରଦେଶର ବାଲି ମାଫିଆମାନେ ଏହି ବେଆଇନ କାରବାର କରୁଥିବା ଅଭିଯୋଗ ହୋଇଛି। ବାଲି ଚୋରା ଚାଲାଣ ହେଉଥିବା ଜିଲାପାଳ ସ୍ବଧାଦେବ ସିଂ ଖବରପାଇବା ପରେ ବୁଧବାର ତହସିଲଦାରଙ୍କୁ ଅନୁଧ୍ୟାନ ପାଇଁ ନିର୍ଦ୍ଦେଶ ଦେଇଥିଲେ ା ତହସିଲଦାର ପ୍ରିୟଦର୍ଶିନୀ ସ୍ବାଇଁ ଓ ଅତିରିକ୍ତ ତହସିଲଦାର ପର୍ଶୁରାମ ଭତରା ଗୁରୁବାର ଖିଲମିସଗୁଡ଼ା ଯାଇ ତଦନ୍ତ କରିଥିଲେ। ୨ଟି ଟ୍ରକ୍ରେ ବାଲି ଚୋରା ଚାଲାଣ ହେଉଥିବାବେଳେ ରାଜସ୍ବ ବିଭାଗ ଧରିଥିଲା। ଗୋଟିଏ ଟ୍ରକ୍ ପାଖରେ ୱାଇ-ଫର୍ମ ରହିଥିବା ବେଳେ ଅନ୍ୟ ଟ୍ରକ୍ ପାଖରେ ୱାଇ ଫର୍ମ ନ ଥିଲାା ତଥାପି ବେନିୟମ ଭାବରେ ବାଲି ଚାଲାଣ କରାଯାଉଥିବାରୁ ୧୦ ହଜାର ଟଙ୍କା ଜରିମାନା ଆଦାୟ କରାଯାଇଛି । ଅନ୍ୟ ଏକ ଟ୍ରକ୍କୁ ଜବତକରି ତହସିଲ କାର୍ଯ୍ୟାଳୟ ଆଣିଥିଲେ। ଏହି ଟ୍ରକ୍କୁ ୧ ଲକ୍ଷ ଟଙ୍କା ଜରିମାନା ପକାଯାଇଥିବା ଅତିରିକ୍ତ ତହସିଲଦାର ଭତରା କହିଛନ୍ତି। ତେବେ ନଦୀ ଗର୍ଭରେ ଖନନ କରୁଥିବା ଏକ ଏକ୍ସାଭେଟର କୁ ମଧ୍ୟ ଜବତ କରାଯାଇଛି। ମେଶିନ ବାବଦରେ ଜରିମାନା ପକାଇବା ପାଇଁ ନିଷ୍ପତ୍ତି ହୋଇ ନାହିଁ। ଏ ବାବଦରେ ସମ୍ପୂର୍ଣ୍ଣ ରିପୋର୍ଟ ଜିଲାପାଳଙ୍କୁ ପ୍ରଦାନ କରାଯିବ ବୋଲି ତହସିଲଦାର ପ୍ରିୟଦର୍ଶିନୀ ସୂଚନା ଦେଇଛନ୍ତି। ତେବେ ବାଲି ଚୋରା ଚାଲାଣ ସମ୍ପୂର୍ଣ୍ଣ ରୋକିବା ଓ ବେଆଇନ ଖନନ ବନ୍ଦ କରିବା ପାଇଁ ଖଣି ବିଭାଗ ବର୍ତ୍ତମାନ ସୁଦ୍ଧା ଏନ୍ଫୋର୍ସମେଣ୍ଟ ଗଠନ କରିନାହିଁ, ଯାହାକି ମାଫିଆମାନଙ୍କୁ ବେଶ୍ ସୁହାଉଛି। ଏହା ପଛରେ ଏକ ବଡଧରଣର ରାକେଟ ଚାଲିଥିବା ଅଭିଯୋଗ ହୋଇଛି।