ରାଉରକେଲା,୧୯।୬: (ବିପ୍ଳବ ରଞ୍ଜନ ଦାଶ): ରାଉରକେଲା ତହସିଲ ଅଧୀନ ତୁମକେଲା ଓ ଲଇକେରା ଘାଟରୁ ପ୍ରତିଦିନ ଶହ ଶହ ଗାଡ଼ିରେ ବେଆଇନ ଭାବେ ବାଲି ଉଠାଯାଉଛି। ଫଳରେ ସରକାରଙ୍କ ବିପୁଳ ରାଜସ୍ବ ହାନି ହେଉଛି। ଏ ଦିଗରେ ବିଭାଗ ପକ୍ଷରୁ କୌଣସି ଦୃଷ୍ଟାନ୍ତମୂଳକ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ ନ ଥିବାରୁ ବାଲି ମାଫିଆ ସକ୍ରିୟ ହୋଇପଡିଥିବା ଆଲୋଚନା ହେଉଛି।
ସୂଚନା ଅନୁସାରେ, ରାଉରକେଲା ତହସିଲ ଅଧୀନରେ ୭ ବାଲିଘାଟ ରହିଛି। ଏହି ବାଲିଘାଟରୁ ପ୍ରତିବର୍ଷ ଖଣିଜ ରାଜସ୍ବ ଆକାରରେ ୪କୋଟିରୁ ଉର୍ଦ୍ଧ୍ୱ ରାଜସ୍ବ ସରକାରଙ୍କ ତହବିଲକୁ ଯାଇଥାଏ। ତନ୍ମଧ୍ୟରୁ ୧୬ ନମ୍ବର ତୁମକେଲା ଓ ଲଇକେରା ବାଲିଘାଟରୁ ବାଲି ଉଠାଣ ପାଇଁ ଏପର୍ଯ୍ୟନ୍ତ ରାଜସ୍ବ ବିଭାଗ ପକ୍ଷରୁ ଅନୁମତି ଦିଆଯାଇନାହିଁ। ଏହାସତ୍ତ୍ୱେ ଉକ୍ତ ବାଲିଘାଟରୁ ସକାଳୁ ସନ୍ଧ୍ୟା ପର୍ଯ୍ୟନ୍ତ ଶହ ଶହ ଗାଡ଼ି ଯୋଗେ ବେଆଇନ ଭାବେ ବାଲି ଉଠାଣ କରାଯାଉଛି। ସେହିପରି ସହରର ତାପମାତ୍ରା ୪୪ ଡିଗ୍ରୀ ରହୁଥିବା ବେଳେ ଶ୍ରମିକମାନଙ୍କୁ ଦିନତମାମ ଟାଣଖରାରେ ବାଲି ଉତ୍ତୋଳନ କାମରେ ନିୟୋଜିତ କରାଯାଉଥିବା ଦେଖିବାକୁ ମିଳୁଛି। ଅନ୍ୟପକ୍ଷେ ବାଲିଘାଟ ଲିଜ୍ଧାରୀଙ୍କ ନାଁରେ ରହିଥିବା କୋଟି କୋଟି ଟଙ୍କା ବକେୟା ରାଜସ୍ବ ଖଜଣା ଆଦାୟ ହେଉନାହିଁ। ସେହିପରି ମାସ ମାସ ଧରି ବାଲିଘାଟ ଗୁଡିକ ନିଲାମ ହେଉ ନ ଥିବାରୁ ଏହା ମାଫିଆଙ୍କୁ ସୁହାଉଛି। ଏ ସମ୍ପର୍କରେ ରାଉରକେଲା ତହସିଲଦାର ଚନ୍ଦ୍ରକାନ୍ତ ମଲ୍ଲିକଙ୍କୁ ପଚାରିବାରୁ ସେ କହିଲେ, ରାଉରକେଲା ତହସିଲ ଅଧୀନ ବିଭିନ୍ନ ବାଲିଘାଟ ନିଲାମ ହୋଇଛି। କେବଳ ୧୬ ନମ୍ବର ବାଲଘାଟ ନିଲାମ ହୋଇନାହିଁ। ଉକ୍ତ ବାଲିଘାଟରୁ ବେଆଇନ ବାଲି ଉତ୍ତୋଳନ ଉପରେ ନଜର ରଖାଯାଇଛି।