କୋଣାର୍କ,୧୬।୧୨(ଡି.ଏନ୍.ଏ.):ଅସ୍ତରଙ୍ଗ ଅନ୍ତର୍ଗତ କେଳୁଣୀ ମୁହାଣ ନିକଟ ନିଷିଦ୍ଧାଞ୍ଚଳରୁ ଗୁରୁବାର ଅପରାହ୍ନରେ ଅସ୍ତରଙ୍ଗ ବନ ବିଭାଗ ପକ୍ଷରୁ ଏକ ବେଆଇନ ଟ୍ରଲର ଜବତ କରାଯାଇଛି। ଉକ୍ତ ଟ୍ରଲର ନାମ ମହାଲକ୍ଷ୍ମୀ ହୋଇଥିବା ବେଳେ ଏହା ଅସ୍ତରଙ୍ଗ ନୂଆଗଡ଼ ଅଞ୍ଚଳର ବୋଲି ଜଣାପଡିଛି। ଏଥିସହ କେତେଜଣ ମତ୍ସ୍ୟଜୀବୀଙ୍କୁ ଅଟକ ରଖି ପଚରାଉଚରା କରାଯାଇଛି। ସୂଚନା ଅନୁସାରେ, ବର୍ତ୍ତମାନ ଅଲିଭ କଇଁଛଙ୍କ ଅଣ୍ଡାଦାନ ସମୟ ହୋଇଥିବାରୁ ସମୁଦ୍ର ଭିତରୁ ମାଛ ଧରିବା ପାଇଁ ଟ୍ରଲରଗୁଡିକୁ ବାରଣ କରାଯାଇଥିଲା। ସେଥିପାଇଁ ପ୍ରଶାସନ ପକ୍ଷରୁ ପ୍ରତି ଟ୍ରଲର ପିଛା ୭ହଜାର ଟଙ୍କା ଟ୍ରଲର ମାଲିକଙ୍କୁ ଦିଆଯାଇଥାଏ। କିନ୍ତୁ ଟ୍ରଲର ମାଲିକମାନେ ଟଙ୍କା ନେବା ପରେ ବି ଚୋରାରେ ନିଷିଦ୍ଧାଞ୍ଚଳରୁ ବେଆଇନ ଭାବେ ମାଛ ଧରୁଥିବା ଦେଖିବାକୁ ମିଳୁଛି। ଫଳରେ ଅସ୍ତରଙ୍ଗ ବନ ବିଭାଗ ପାଟ୍ରୋଲିଂ କରୁଥିବା ସମୟରେ ଗୁରୁବାର ଏକ ଟ୍ରଲର ଜବତ କରିବା ସହ ମତ୍ସ୍ୟଜୀବୀଙ୍କୁ ଧରିଛନ୍ତି। ଉକ୍ତ ଟ୍ରଲରକୁ ଆଣି ଚନ୍ଦ୍ରଭାଗା ତେଲୁଗୁ ବସ୍ତି ନିକଟରେ ରଖାଯାଇ କୋଣାର୍କ ମତ୍ସ୍ୟ ବିଭାଗକୁ ହସ୍ତାନ୍ତର କରିଛି। ସେପଟେ ସରକାରୀ ଅଧିକାରୀ ଓ ଟ୍ରଲର ମାଲିକଙ୍କ ମଧ୍ୟରେ ସଲାସୁତରା ଥିବାରୁ ଅଲିଭ କଇଁଛ ବଳିପଡୁଛନ୍ତି। ଯାହା କିଛିଦିନ ପରେ ପୁରୀଠାରୁ ଅସ୍ତରଙ୍ଗ ପର୍ଯ୍ୟନ୍ତ ଅଲିଭ କଇଁଛମଙ୍କର ଅଣ୍ଡା ଦେବା ବନ୍ଦକୁ ନେଇ ଚିନ୍ତାରେ ପରିବେଶବିତ। ତେବେ ଜବତ ଟ୍ରଲରରେ ଥିବା ମାଛକୁ ଶୁକ୍ରବାର ନିଲାମ କରାଯିବ ବୋଲି ଅଧିକାରୀମାନେ ପ୍ରକାଶ କରିଛନ୍ତି।
