ନିମାପଡ଼ା,୨୨।୨(ଡି.ଏନ୍.ଏ.): ନିମାପଡ଼ା ବ୍ଲକର ଡେଣୁଅଁ, ମିଟେଇପୁର, ଭୋଗ୍ରଶାଳଦା, ଭିଲିଗ୍ରାମ, ସଲଙ୍ଗ, ବାମନାଳ, ହରିପୁର, ତମାଳୋ, ତୁଳସୀପୁର, ବାହାରେଣା, ଭୋଦର, କଳାପାଞ୍ଚଣ, ଛଣିଜଙ୍ଗ, ଅରିଷଣ୍ଢ ସମେତ ୩୨ ପଞ୍ଚାୟତ ଓ ଏନ୍ଏସିର ପାଟପୁର, ହାଟସାହି, ନୂଆରକରି, ଦିପିରେଣ୍ଟା, ଅଳନ୍ଧା, ଭୁବନପୁର, ତଳଅଣ୍ଢିଆ, ଅଣ୍ଡିଆସାହି ସମେତ ବିଭିନ୍ନ ଗ୍ରାମରେ ଛତୁଫୁଟିଲା ଭଳି ଚାଲିଛି ବେଆଇନ ଇଟାଭାଟି। ସରକାର ପ୍ରାୟ ୩ବର୍ଷ ହେଲା ଦେଶୀ ମାଟି ଇଟାକୁ ଅସିଦ୍ଧ(ବ୍ୟାନ୍) ଘୋଷଣା କରିଥିବାବେଳେ ବ୍ଲକର ବିଭିନ୍ନ ପଞ୍ଚାୟତ ଓ ଏନ୍ଏସି ଅଞ୍ଚଳରେ ବେଆଇନ ଭାବେ ୬ଶହରୁ ଊର୍ଦ୍ଧ୍ୱ ଇଟାଭାଟି ଚାଲିଥିବା ଦୁର୍ଭାଗ୍ୟଜନକ। ଅନ୍ୟପଟେ ଏହି ବେଆଇନ ଇଟାଭାଟି ନିର୍ମାଣ ବଢ଼ିଚାଲିଥିବାରୁ ସରକାରଙ୍କ ରାଜସ୍ବ ବିଭାଗର ବାର୍ଷିକ କୋଟି କୋଟି ଟଙ୍କା ରାଜସ୍ବ ହାନି ଘଟୁଛି। ହେଲେ ଏ ଦିଗରେ ନିମାପଡ଼ା ରାଜସ୍ବ ବିଭାଗର ସାମାନ୍ୟତମ ଦୃଷ୍ଟି ନାହିଁ। ଗଁା, ସାହି, ରାସ୍ତା ନିକଟରେ ଶତାଧିକ ସଂଖ୍ୟାରେ ଦିବାରାତ୍ର ଇଟାଭାଟି ଲାଗିରହୁଥିବାରୁ ରୌଦ୍ରତାପ, ଗ୍ରୀଷ୍ମ ପ୍ରବାହ ହୋଇ ଘରେ ଲୋକେ ରହି ନ ପାରି ଅତିଷ୍ଠ ହୋଇଗଲେଣି। ବେଆଇନ ଭାବେ ଇଟାଭାଟି ଜଳୁଥିବାରୁ ବାୟୁ ପ୍ରଦୂଷଣ ହୋଇ ଲୋକେ ଅଣନିଃଶ୍ୱାସୀ ହୋଇପଡ଼ୁଛନ୍ତି। ଏ ନେଇ ପ୍ରଶାସନ ନିକଟରେ ଅଭିଯୋଗ ହୋଇଥିଲେ ହେଁ କୌଣସି କାର୍ଯ୍ୟାନୁଷ୍ଠାନ ହେଉ ନ ଥିବା ଗ୍ରାମବାସୀ କହିଛନ୍ତି। ଇଟାଭାଟି ମାଲିକ ଓ ରାଜସ୍ବ ବିଭାଗର କର୍ମଚାରୀଙ୍କ କୌଣସି ସଲାସୁତରା ଥିବା ଗ୍ରାମବାସୀ ସନ୍ଦେହ କରୁଛନ୍ତି। ଏପରିକି ଇଟାଭାଟି ମାଲିକମାନଙ୍କୁ ପରୋକ୍ଷ ଭାବେ ରାଜସ୍ବ ବିଭାଗର କର୍ମଚାରୀମାନେ ପ୍ରୋତ୍ସାହନ ଦେଉଥିବା ବିଭିନ୍ନ ମହଲରେ ଅଭିଯୋଗ ହେଉଛି। ଏଥିଯୋଗୁ ମାଲିକମାନେ ନିର୍ଭୀକରେ ଇଟାଭାଟି କାର୍ଯ୍ୟ ଚଲାଇ ଆସୁଛନ୍ତି। ଏହି ବେଆଇନ ଇଟାଭାଟିକୁ ଯଦି ଏବେ ରୋକା ନ ଯିବ ଭାଟିର ନିଆଁ, କୋଇଲା ଧୂଅଁା ଯୋଗୁ ନିମାପଡ଼ା ଅଞ୍ଚଳ ସାରା ପ୍ରଦୂଷଣ ହେବାର ଆଶଙ୍କା ହେଉଥିବାବେଳେ ଲୋକେ ମଧ୍ୟ ନାନା ରୋଗର ସମ୍ମୁଖୀନ ହେବେ। ଏ ସମ୍ପର୍କରେ ତହସିଲଦାର ରାମଚନ୍ଦ୍ର ଜେନା କହିଛନ୍ତି, ଖୁବଶୀଘ୍ର ବେଆଇନ ଇଟାଭାଟିଗୁଡ଼ିକ ଉପରେ ଚଢ଼ାଉ କରାଯିବା ସହ ମାଲିକମାନଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ନିଆଯିବ। ଏ ଦିଗରେ ପୁରୀ ଜିଲାପାଳ, ରାଜସ୍ବ ମନ୍ତ୍ରୀ, ବିଭାଗୀୟ ସଚିବ, ୫-ଟି ସଚିବ ଦୃଷ୍ଟି ଦେଇ ବିହୀତ ପଦକ୍ଷେପ ନେବାକୁ ନିମାପଡ଼ାବାସୀଙ୍କ ପକ୍ଷରୁ ଦାବି ହେଉଛି। ଏହି ବେଆଇନ ଇଟାଭାଟି ତୁରନ୍ତ ବନ୍ଦ କରିବା ପାଇଁ ନିଷ୍ପତ୍ତି ନିଆ ନ ଗଲେ ରାଜରାସ୍ତାକୁ ଓହ୍ଳାଇବାକୁ ନିମାପଡ଼ାବାସୀ ଚେତାବନୀ ଦେଇଛନ୍ତି।