ଯୋଡ଼ା,୨୬ା୬(ମାନସ ମହାନ୍ତି): କେନ୍ଦୁଝର ଜିଲା ଯୋଡ଼ା ବ୍ଲକ୍ ଅନ୍ତର୍ଗତ ବଡ଼କାଳିମାଟି ପଞ୍ଚାୟତର କାଳିମାଟି- ଦବୁନା ରାସ୍ତା ବିପର୍ଯ୍ୟସ୍ତ ହୋଇପଡ଼ିଛି। ରାସ୍ତାରେ ବଡ଼ ଖାଲ ହୋଇ ଅଣ୍ଟା ଉଚ୍ଚରେ ପାଣି ଜମୁଛି। ରାସ୍ତା ବିପର୍ଯ୍ୟସ୍ତ କାରଣରୁ ସ୍କୁଲ ବସ୍ ଯାଉପାରୁ ନ ଥିବା ବେଳେ ଟ୍ରକ୍ ଚକା ପର୍ଯ୍ୟନ୍ତ ବୁଡ଼ିଯାଉଛି। ସାଧାରଣରେ ଯାତାୟାତ ଏକ ପ୍ରକାର ଠପ୍ ହୋଇଯାଇଛି। ପ୍ରଶାସନ ଏଥିପ୍ରତି ଦୃଷ୍ଟି ଦେଉ ନ ଥିବାରୁ ସାଧାରଣରେ ଅସନ୍ତୋଷ ବୃଦ୍ଧି ପାଉଛି।
ସୂଚନା ଅନୁଯାୟୀ, କାଳିମାଟିଠାରୁ ଦବୁନା ପ୍ରାୟ ୩ କି.ମି. ରାସ୍ତା ଦେଇ ବିଭିନ୍ନ ଖଣି କମ୍ପାନୀ ଖଣିଜ ପରିବହନ କରୁଛନ୍ତି। ଦୈନିକ ହଜାର ହଜାର ଖଣିଜ ବୋଝେଇ ଟ୍ରକ୍ ଯାତାୟାତ ଦ୍ୱାରା ଉକ୍ତ ରାସ୍ତାରେ ବିରାଟ ଗର୍ତ୍ତ ସୃଷ୍ଟି ହୋଇଛି। ମରାମତି କରା ନ ଯାଇ ବିପର୍ଯ୍ୟସ୍ତ ରାସ୍ତାରେ ପରିବହନ କରାଯାଉଥିବାରୁ ରାସ୍ତା ଏବେ ମରଣଯନ୍ତାରେ ପରିଣତ ହୋଇଛି। ବଡ଼ ଗର୍ତ୍ତ, ଖାଲଖମାରେ ବର୍ଷାପାଣି ଜମି ଏକ ପ୍ରକାର ପୋଖରୀର ଭ୍ରମ ସୃଷ୍ଟି ହେଉଛି। ଟ୍ରକ୍ଗୁଡ଼ିକ ରାସ୍ତାରେ ପରିବହନ କରିବା ବେଳେ ଚକା ପର୍ଯ୍ୟନ୍ତ ବୁଡ଼ିଯାଉଥିବା ବେଳେ ଅନେକ ସମୟରେ ଗାଡ଼ିର ଯନ୍ତ୍ରାଂଶ ଭାଙ୍ଗିଯାଉଛି। ସ୍ଥାନୀୟ ଅଞ୍ଚଳର ବିପିନ ପଲେଇ, ରଞ୍ଜିତ ବାରିକ, ଦେବବ୍ରତ ବାରିକ, ପରମେଶ୍ବର ନାଏକ କହିଛନ୍ତି, ଉକ୍ତ ରାସ୍ତା ଉପରେ ବଡ଼କାଳିମାଟି ଓ ବସନ୍ତପୁର ପଞ୍ଚାୟତର ପ୍ରାୟ ୧୫ ହଜାର ଲୋକ ନିର୍ଭର କରିଥାଆନ୍ତି। କାଳିମାଟିଠାରେ ଥିବା ସରକାରୀ ଡାକ୍ତରଖାନାକୁ ଆସିବାକୁ ଲୋକେ ନାହିଁ ନ ଥିବା ଦୁର୍ଦ୍ଦଶା ଭୋଗୁଛନ୍ତି। ରାସ୍ତାରେ ଲୋକେ ପାଦରେ ଚାଲିଚାଲି ଯିବା ବି ଅନୁପଯୋଗୀ ହୋଇଯାଇଛି। ସ୍ଥାନୀୟ କମ୍ପାନୀ ପରିବହନ କରି ଲାଭବାନ୍ ହେଉଛନ୍ତି, ଅଥଚ ମରାମତି କରୁନାହାନ୍ତି। ଦୁଇ ଦିନ ହେଲା ସ୍କୁଲ ଖୋଲିଥିବା ବେଳେ ରାସ୍ତା ଖରାପ ଯୋଗୁ ସ୍କୁଲ ବସ୍ ଯାତାୟାତ କରିପାରୁନି। ଯେଉଁ ବସ୍ ଯାଉଛି ତାହା ଦିନ ୧୧ଟା, ୧୨ଟାରେ ସ୍କୁଲ୍ରେ ପହଞ୍ଚୁଥିବା ସେମାନେ କହିଛନ୍ତି। ଛାତ୍ରୀଛାତ୍ର ୩ କି.ମି ଦୂର ପରିବର୍ତ୍ତେ ପ୍ରାୟ ୮ରୁ ୧୦ କି.ମି ବସ୍ରେ ଅତିକ୍ରମ କରିବା ପରେ ଘରେ ପହଞ୍ଚୁଛନ୍ତି। ବର୍ତ୍ତମାନ ବର୍ଷାଦିନ ଥିବାରୁ ସମସ୍ୟା ଆହୁରି ଜଟିଳ ହେବ। ଏଣୁ ଏହି ରାସ୍ତା ମରାମତି ଦିଗରେ ପ୍ରଶାସନ ଦୃଷ୍ଟି ଦେବାକୁ ଅଞ୍ଚଳବାସୀ ଦାବି କରିଛନ୍ତି। ଏନେଇ ଯୋଡ଼ା ବିଡିଓ ଜଗନ୍ନାଥ ହନୁମାନଙ୍କୁ ପଚରାଯିବାରୁ ସେ କୌଣସି ପ୍ରତିକ୍ରିୟା ଦେଇ ନ ଥିଲେ।
