ଲଣ୍ଡନ,୩୦।୧ : ମରିବା ନୁହେଁ ତୋଠାରୁ ଅଲଗା ହେବାକୁ ମତେ ଭୟ ଲାଗୁଛିରେ ମୋ ଧନ। ଏହା ହେଉଛି ଚଣେ କ୍ୟାନସର ପୀଡ଼ିତା ମା‘ଙ୍କର ପୁଅ ପାଖକୁ ଶେଷ ଚିଠି। ଏହି ଚିଠି ଏବେ ସୋସିଆଲ ମିଡ଼ିଆରେ ଭାଇରାଲ ହେବାରେ ଲାଗିଛି।
ମା’ଙ୍କର କ୍ୟାନସର ଯୋଗୁ ମୃତ୍ୟୁ ଘଟିଛି। ତାଙ୍କୁ ଔଷଧ ଦିଆଗଲା। ଶ୍ରେଷ୍ଠ ଚିକିତ୍ସା ମିଳିଲା, ସର୍ବୋତ୍ତମ ଡାକ୍ତରଙ୍କ ସହିତ ପରାମର୍ଶ କରାଗଲା, କିନ୍ତୁ ଶେଷରେ କ୍ୟାନସର ତାଙ୍କ ଜୀବନ ନେଲା।
ଜଣେ ବ୍ୟକ୍ତି ନିଜର ହୃଦୟର ଦୁଃଖ ଅନ୍ୟମାନଙ୍କ ସହ ବାଣ୍ଟିବା ପାଇଁ ତାଙ୍କ ମା’ଙ୍କ ଏଭଳି ଏକ ଭାବୁକ ଶେଷ ଚିଠିକୁ ପୋଷ୍ଟ କରିଛନ୍ତି। ଏହି ଚିଠି ପଢ଼ିବା ପରେ ବହୁ ୟୁଜରଙ୍କ ଆଖିରେ ଲୁହ ଆସିଯାଇଛି। ଚିଠିରେ ଲେଖାଯାଇଥିବା ଶବ୍ଦଗୁଡ଼ିକ ବେଶ ହୃଦୟ ସ୍ପର୍ଶୀ।
ମା’ ତାଙ୍କ ପୁଅ ମ୍ୟାଟଙ୍କ ପାଇଁ ଏହି ଚିଠି ଲେଖିଥିଲେ। ମହିଳାଙ୍କର ମୃତ୍ୟୁ ହୋଇଛି, କିନ୍ତୁ ମୃତ୍ୟୁ ପୂର୍ବରୁ ସେ ମ୍ୟାଟଙ୍କୁ ଦୁନିଆର ସର୍ବୋତ୍ତମ ପୁଅ ବୋଲି କହିଛନ୍ତି। ସେ ଚିଠିରେ ଲେଖିଛନ୍ତି ଧନରେ ତୁ ମୋର ଯତ୍ନ ନେଇଛୁ, ମୁଁ ଏଥିପାଇଁ ତୋ ପାଖରେ କୃତଜ୍ଞ। ତୁ ମୋ ପାଇଁ ଦେଇଥିବା ବଳିଦାନ ପାଇଁ ମୁଁ କୃତଜ୍ଞତା ଜଣାଉଛି।
ତୁ ଦୁନିଆର ସର୍ବୋତ୍ତମ ପୁଅ। ଭାବ ନାହିଁ ମୁଁ ତୋ ସହିତ ନାହିଁ। ମୁଁ ଯେଉଁଆଡ଼େ ଗଲେ ମଧ୍ୟ ସେଠାରୁ ତୋ ଉପରେ ନଜର ରଖିବି। କ୍ୟାନସର ହେବା ଦିନଠାରୁ, ମରିବାର ଭୟ ନ ଥିଲା, କିନ୍ତୁ ତୋତେ ଛାଡିବାର ଭୟ ଥିଲା। ଏହି ଭୟ ମୋତେ ଭିତରୁ ଭିତରୁ ଖାଉଥିଲା। କିନ୍ତୁ କ୍ୟାନସରକୁ ତ କେହି ନିୟନ୍ତ୍ରଣ କରିପାରିବେ ନାହିଁ ।
ମ୍ୟାଟ ଏହି ପୋଷ୍ଟରେ ଲେଖିଛନ୍ତି ତାଙ୍କ ମା’ଙ୍କ ମୃତ୍ୟୁ ପରେ ସେ ଏହି ଚିଠିକୁ ତାଙ୍କ ଆଲମାରୀରୁ ପାଇଥିଲେ ଏବଂ ଯେତେବେଳେ ସେ ଏହାକୁ ପଢ଼଼ିଲେ ସେତେବେଳେ ସେ କାନ୍ଦୁଥିଲେ, କିନ୍ତୁ ବର୍ତ୍ତମାନ ମୁଁ ତାଙ୍କୁ ପ୍ରତିଦିନ ମନେ ରଖିଛି। ମୁଁ ତାଙ୍କ ସହିତ ବିତାଇଥିବା ମୁହୂର୍ତ୍ତଗୁଡ଼ିକୁ ମନେ ପକାଇ ପ୍ରତିଟି ସମୟ ତାଙ୍କୁ ଅନୁଭବ କରୁଛି।
ମ୍ୟାଟ ଲେଖିଛନ୍ତି ମୁଁ ଏହି ଚିଠିକୁ ସୋସିଆଲ ମିଡିଆରେ ପୋଷ୍ଟ କରିଛି ଯାହା ଦ୍ୱାରା ଲୋକମାନେ ଅନୁଭବ କରିବେ ଜଣେ ମା’ଙ୍କର ଗୁରୁତ୍ୱ ଆମ ପାଇଁ କେତେ ମହତ୍ତ୍ୱପୂର୍ଣ୍ଣ।