ନୂଆଦିଲ୍ଲୀ,୨୩ ।୯: ଦିଲ୍ଲୀ-ଏନସିଆରରେ ଗତ ୩ ଦିନ ହେବ ବର୍ଷା ଲାଗି ରହିବା ଫଳରେ ସାଧାରଣ ଜୀବନ ଯାତ୍ରା ଅସ୍ତବ୍ୟସ୍ତ ହୋଇପଡିଛି । ଦିଲ୍ଲୀ-ଏନିଆରର ଭିନ୍ନ ଭିନ୍ନ ସ୍ଥାନରେ ଜଳ ପ୍ରଳୟ ଦେଖାଦେଇଛି । ଫଳରେ ଲୋକଙ୍କ ସାଧାରଣ ଜୀବନ ଯାତ୍ରା ବାଧାପ୍ରାପ୍ତ ହୋଇଛି । ଭାରତୀୟ ପାଣିପାଗ ବିଭାଗ(ଆଇଏମଡି)ର ସୂଚନା ଅନୁଯାୟୀ, ଶୁକ୍ରବାର ବି ବର୍ଷା ଜାରି ରହିବ । ଏହାକୁ ଦୃଷ୍ଟିରେ ରଖି ପାଣିପାଗ ବିଭାଗ ପକ୍ଷରୁ ୟେଲୋ ଆଲର୍ଟ ଜାରି କରାଯାଇଛି ।
ପାଣିପାଗ ବିଭାଗର ସୂଚନା ଅନୁଯାୟୀ, ୨୬ ସେପ୍ଟେମ୍ବର ପର୍ଯ୍ୟନ୍ତ ଦିଲ୍ଲୀରେ ହାଲୁକାରୁ ମଧ୍ୟମ ଧରଣର ବର୍ଷା ଲାଗି ରହିବାର ସମ୍ଭାବନା ରହିଛି । ଏହାପରେ ପାଗରେ ପରିବର୍ତ୍ତନ ହୋଇପାରେ । ହେଲେ ଆକାଶରେ ବାଦଲ ଦେଖାଯିବ । ଏହାସହ ଗୁରୁଗ୍ରାମ ଓ ନଏଡାରେ ବି ଦିଲ୍ଲୀ ଭଳି ପାଣିପାଗ ରହିବ ବୋଲି ଅନୁମାନ କରିଛି ପାଣିପାଗ ବିଭାଗ । ଲଗାଣ ବର୍ଷା ଯୋଗୁ ଦିଲ୍ଲୀର ତାପମାତ୍ରା ବି କମ ହୋଇଯାଇଛି ।
ପାଣିପାଗ ବିଭାଗର ପୂର୍ବାନୁମାନ ଅନୁଯାୟୀ, ଆସନ୍ତା ୨୮-୨୯ ସେପ୍ଟେମ୍ବରରେ ମୌସୁମୀ ଦିଲ୍ଲୀ-ଏନସିଆରରୁ ବିଦାୟ ନେଇପାରେ । ଅନ୍ୟପଟେ ଶୁକ୍ରବାର ବର୍ଷାର ସମ୍ଭାବନାକୁ ଦେଖି ଗୁରୁଗ୍ରାମ, ନଏଡା, ଗ୍ରେଟର-ନଏଡା, ଗାଜିଆବାଦ ଓ ଫରିଦାବାଦରେ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ସମସ୍ତ ସ୍କୁଲକୁ ବନ୍ଦ କରି ଦିଆଯାଇଛି । ଏହାସହ ଶୁକ୍ରବାର ବର୍ଷାର ସମ୍ଭାବନାକୁ ଦେଖି ସମସ୍ତ କର୍ପୋରେଟ ଅଫିସ ଓ ଘରୋଇ କମ୍ପାନୀର କର୍ମଚାରୀଙ୍କୁ ଘରେ ରହି କାମ କରିବାକୁ ପରାମର୍ଶ ଦିଆଯାଇଛି । ଏହାସହ ଦିଲ୍ଲୀ ପୋଲିସ ଆଡଭାଇଜରୀ ଜାରି କରି କିଛି ରାସ୍ତା ଦେଇ ଯାତାୟତ ନ କରିବାକୁ ପରାମର୍ଶ ଦେଇଛି ।