ଅହମ୍ମଦାବାଦ,୧୩।୫: ଭାରତରେ କରୋନା ମହାମାରୀ ମଧ୍ୟରେ ଗୁଜରାଟରେ ବାତ୍ୟା ଆଶଙ୍କା ରହିଛି। ଆଗାମୀ ଦିନରେ ପୂର୍ବ-କେନ୍ଦ୍ରୀୟ ଆରବ ସାଗରରେ ଏକ ବାତ୍ୟା ସୃଷ୍ଟି ହେବାର ଆଶଙ୍କା ରହିଛି। ମେ ୧୭ ଏବଂ ୧୮ରେ ଗୁଜରାଟରେ ଏହି ବାତ୍ୟା ସୃଷ୍ଟି ହୋଇପାରେ ବୋଲି ଏକ ସମ୍ଭାବନା ଅଛି। ତେବେ ଏହି ଘୂର୍ଣ୍ଣିବଳୟ ପାକିସ୍ତାନର କରାଚି ଉପକୂଳରେ ପଡିପାରେ କିନ୍ତୁ ଗୁଜରାଟର ସମୁଦ୍ର କୂଳରେ ମଧ୍ୟ ଏହାର ପ୍ରଭାବ ପଡିପାରେ। ଗୁଜରାଟରେ ଏଭଳି ବାତ୍ୟା ସମ୍ଭାବାକୁ ଦୃଷ୍ଟିରେ ରଖି ରାଜ୍ୟ ମୁଖ୍ୟମନ୍ତ୍ରୀ ବିଜୟ ରୂପାନୀ ଏକ ବୈଠକ କରି ଉପକୂଳବର୍ତ୍ତୀ ଜିଲାର ଅଧିକାରୀମାନଙ୍କୁ ସଜାଗ ରହିବାକୁ ଏବଂ ଆବଶ୍ୟକ ପଦକ୍ଷେପ ନେବାକୁ ନିର୍ଦ୍ଦେଶ ଦେଇଛନ୍ତି। ପୂର୍ବ-ମଧ୍ୟ ଆରବ ସାଗରରେ ଘୂର୍ଣ୍ଣିବଳୟ ଯୋଗୁ ଗୁଜରାଟର ଉପକୂଳବର୍ତ୍ତୀ ଅଞ୍ଚଳରେ ବଜ୍ରପାତ ହୋଇପାରେ ବୋଲି ଅଧିକାରୀମାନେ ପୂର୍ବାନୁମାନ କରିଛନ୍ତି। ତେବେ ଏହି ଘୂର୍ଣ୍ଣିବଳୟ ଗୁଜରାଟକୁ ପ୍ରଭାବିତ କରିବ ବୋଲି ଚେତାବନୀ ନାହିଁ। ଗୃହମନ୍ତ୍ରୀ ପ୍ରଦିପ ସିଂ ଜାଡେଜା ଗାନ୍ଧୀନଗରରେ ଗଣମାଧ୍ୟମକୁ କହିଛନ୍ତି ଯେ, ତାଉକ୍ତାଏ ବାତ୍ୟାକୁ ଦୃଷ୍ଟିରେ ରଖି ମୁଖ୍ୟମନ୍ତ୍ରୀ ଅଧିକାରୀମାନଙ୍କୁ ଆବଶ୍ୟକ ନିର୍ଦ୍ଦେଶ ଦେଇଛନ୍ତି। ସେ କହିଛନ୍ତି ଯେ, ଅନୁମାନ କରାଯାଉଛି ଯେ, ଯଦି ଘୂର୍ଣ୍ଣିବଳୟ ଘଟେ ତେବେ ଏହା ଗୁଜରାଟର ସୌରାଷ୍ଟ୍ର ଏବଂ କୁଚ ଅଞ୍ଚଳ ଉପରେ ପ୍ରଭାବ ପକାଇବ, ଏଭଳି ପରିସ୍ଥିତିରେ ଲୋକଙ୍କ ସୁରକ୍ଷା ପାଇଁ ସମସ୍ତ ପଦକ୍ଷେପ ନେବାକୁ ସେ ନିର୍ଦ୍ଦେଶ ଦେଇଛନ୍ତି।
ପାଣିପାଗ ବିଭାଗ କହିଛି ଯେ, ମେ ୧୪ ସକାଳେ ଦକ୍ଷିଣ ଆରବ ସାଗରରେ ଏକ ନିମ୍ନ ଚାପ ସୃଷ୍ଟି ହୋଇପାରେ ଏବଂ ଏହା ଉତ୍ତର-ଉତ୍ତର-ପଶ୍ଚିମ ଦିଗକୁ ଏବଂ ଦକ୍ଷିଣ-ପୂର୍ବ ଆରବ ସାଗରରେ ଲାକ୍ଷାଦ୍ୱୀପ ଆଡକୁ ଗତି କରିବାର ସମ୍ଭାବନା ରହିଛି। ମେ ୧୬ରେ ପୂର୍ବ-କେନ୍ଦ୍ରୀୟ ଆରବ ସାଗରରେ ଏକ ଘୂର୍ଣ୍ଣିବଳୟ ସୃଷ୍ଟି ହୋଇପାରେ।