ଛତ୍ରପୁର,୧୭ା୩: ଗଞ୍ଜାମ ଜିଲାରେ ପୁଣି କରୋନା ସଂକ୍ରମଣ ବଢିବା ସମ୍ଭାବନା ରହିଥିବାରୁ ଜିଲାବାସୀଙ୍କୁ ସତର୍କ ରହିବାକୁ ହେବ ବୋଲି ଜିଲାପାଳ ବିଜୟ ଅମୃତା କୁଲାଙ୍ଗେ ବୁଧବାର ଭର୍ଚୁଆଲ ବୈଠକରେ ଅବଗତ କରାଇଛନ୍ତି। ଜିଲାରେ ଆଗକୁ ଦୋଳଯାତ୍ରା, ତାରାତାରିଣୀଙ୍କ ଯାତ୍ରା ଓ ଦଣ୍ଡଯାତ୍ରା ଓ ବୁଢ଼ୀ ଠାକୁରାଣୀ ଯାତ୍ରା ହେବ। ଯାତ୍ରାରେ ଗହଳି ହେବାର ସମ୍ଭାବନା ରହିଛି । ସତର୍କତା ଅବଲମ୍ବନ ନ କଲେ କରୋନା ସଂକ୍ରମଣ ପୁଣି ବୃଦ୍ଧି ପାଇବ। ଅନ୍ୟପକ୍ଷେ ସମସ୍ତ କାର୍ଯ୍ୟାଳୟରେ ପୂର୍ବଭଳି କୋଭିଡ୍ ନିୟମ ପାଳନ କରିବା ଆବଶ୍ୟକ ହୋଇପଡ଼ିଛି। ମାସ୍କ ପରିଧାନ, ସାମାଜିକ ଦୁରତ୍ୱ ଓ ହାତଧୂଆ ଭଳି ନିୟମ କର୍ଯ୍ୟାଳୟରେ କଡାକଡି ପାଳନ କରିବାକୁ ନିର୍ଦ୍ଦେଶ ଦିଆଯାଇଛି । ବର୍ତ୍ତମାନ ଦୈନିକ ୧ ହଜାର ଲୋକଙ୍କ ଟେଷ୍ଟ କରାଯାଉଛି। ଗତ କିଛିଦିନ ମଧ୍ୟରେ ଜିଲାରେ ସକ୍ରିୟ ସଂକ୍ରମିତଙ୍କ ସଂଖ୍ୟା ଶୂନ ରହିଥିଲା। ବର୍ତ୍ତମାନ ୧୧ ଜଣ ଆକ୍ରାନ୍ତ ଚିହ୍ନଟ କରାଯାଇ ସେମାନଙ୍କର ଚିକିତ୍ସା କରାଯାଉଛି। ଲକ୍ଷଣ ଥିବା ବ୍ୟକ୍ତି ଚିହ୍ନଟ ହେଲେ ସେମାନଙ୍କ କଣ୍ଚାକ୍ଟଟ୍ରେସିଂ କରାଯାଇ ହୋମ ଆଇସୋଲେଶନରେ ରଖାଯାଉଛି। ଜିଲାରେ ଯାତ୍ରା ପାଳନ କରିବାକୁ ପ୍ରବାସୀମାନେ ନ ଆସିବାକୁ ଅନୁରୋଧ କରାଯାଇଛି। କେବଳ ସ୍ଥାନୀୟ କଳାକାରଙ୍କୁ ନେଇ ଯାତ୍ରାରେ ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରିପାରିବେ ବୋଲି ଜିଲାପାଳ କହିଛନ୍ତି। ଦଣ୍ଡନାଚରେ ଭୋଜିଭାତ ହେବ ନାହିଁ । କେବଳ ଦଣ୍ଡୁଆମାନଙ୍କ ପ୍ରସାଦ ସେବନ ପାଇଁ ଅନୁମତି ଦିଆଯାଇଛି। ମ୍ୟୁଜିକ, ଡିଜେ, ଡ୍ୟାନ୍ସ ଆଦିକୁ ସମ୍ପୂର୍ଣ୍ଣ ବାରଣ କରାଯାଇଛି। ଯେଉଁମାନେ କୋଭିଡ ନିୟମ ଉଲ୍ଲଂଘନ କରିବେ ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
