ସମ୍ବଲପୁର,୨୧ା୧୨(ବ୍ୟୁରୋ): ପଶ୍ଚିମ ଓଡ଼ିଶାରେ ହାଇକୋର୍ଟ ସ୍ଥାୟୀ ବେଞ୍ଚ ଦାବି ନେଇ ଡିସେମ୍ବର ୧୨ରେ ଆନ୍ଦୋଳନ ଉଗ୍ରରୂପ ଧାରଣ କରିଥିଲା। ସମ୍ବଲପୁର କୋର୍ଟ ପରିସରରେ ଭଙ୍ଗାରୁଜା ଓ ବିଚାରପତିଙ୍କୁ ବାହାର କରିଦେବା ଭଳି ଘଟଣା ପରେ ସ୍ଥିତି ଅଣାୟତ୍ତ ହୋଇପଡିଥିଲା। ସୁପ୍ରିମକୋର୍ଟ ଏଥିରେ ହସ୍ତକ୍ଷେପ କରି କୋର୍ଟ କାର୍ଯ୍ୟ ସ୍ବାଭାବିକ କରିବା ସହ ଲୋକଙ୍କ ସମସ୍ୟା ଯେଭଳି ନ ହେବ ସେ ନେଇ ପଦକ୍ଷେପ ନେବାକୁ କଡା ନିର୍ଦ୍ଦେଶ ଦେଇଥିଲେ। ଏହାକୁ ପାଳନ କରିବାକୁ ଯାଇ କୋର୍ଟ, ଜିଲା ପ୍ରଶାସନ ଓ ପୋଲିସ ପକ୍ଷରୁ ବ୍ୟାପକ ପଦକ୍ଷେପ ଗ୍ରହଣ କରାଯାଉଛି। ଏହା ସତ୍ତ୍ୱେ ମଙ୍ଗଳବାର ଅଚଳାବସ୍ଥା ଜାରି ରହିଥିବା ଦେଖିବାକୁ ମିଳିଛି। ବିଚାରପତି, କର୍ମଚାରୀ ଓ ଅଧିକାରୀମାନେ ଆସି କୋର୍ଟ କାର୍ଯ୍ୟ କରୁଛନ୍ତି। କିନ୍ତୁ ଓକିଲ ନ ଥିବାରୁ ମହକିଲମାନେ ଫେରି ଯାଉଛନ୍ତି। ଏହି ଘଟଣାରେ ଗିରଫ ହୋଇ ଜେଲରେ ଥିବା ଓକିଲମାନଙ୍କ ଜାମିନର ଶୁଣାଣି ଆସନ୍ତା ୨୨ ତାରିଖରେ ହେବାକୁ ସ୍ଥିର ହୋଇଛି। ଏହି ଶୁଣାଣିକୁ ଓକିଲମାନେ ଅପେକ୍ଷା କରିଛନ୍ତି। କେବଳ ଓକିଲ ନୁହନ୍ତି, ଆନ୍ଦୋଳନକୁ ସମର୍ଥନ କରୁଥିବା ବିଭିନ୍ନ ଅନୁଷ୍ଠାନର କର୍ମକର୍ତ୍ତା ମଧ୍ୟ କୋର୍ଟ ରାୟକୁ ଅପେକ୍ଷା କରିଛନ୍ତି।
ଅଭିଯୁକ୍ତ ଓକିଲମାନଙ୍କ ପକ୍ଷରୁ ଆଇନଜୀବୀ ରଞ୍ଜନ ଶର୍ମା କହିଛନ୍ତି, ଏସ୍ଡିଜେଏମ୍ କୋର୍ଟରେ ଜାମିନ ଖାରଜ ହେବା ପରେ ଜିଲାଜଜ୍ କୋର୍ଟରେ ଆବେଦନ କରାଯାଇଛି। ମହକିଲଙ୍କ ପକ୍ଷରୁ ସମସ୍ତ ଦସ୍ତାବିଜ ଦେଇ କୋର୍ଟଙ୍କୁ ଅନୁରୋଧ କରାଯାଇଛି। ଆସନ୍ତା ୨୨ ତାରିଖରେ ଶୁଣାଣି ପାଇଁ ଦିନ ଧାର୍ଯ୍ୟ ହୋଇଛି। ଜାମିନ ଦେବା କୋର୍ଟଙ୍କ ହାତରେ ରହିଥାଏ। ଅନ୍ୟ ୮ ଜଣଙ୍କ ଜାମିନ ମଧ୍ୟ ଏସ୍ଡିଜେଏମ୍ କୋର୍ଟରେ ଖାରଜ ହୋଇଥିଲା। ସେମାନଙ୍କ ଜାମିନ ପାଇଁ ଉପରକୋର୍ଟରେ ଆବେଦନ କରାଯିବ ବୋଲି କହିଥିଲେ। ଅନ୍ୟପଟେ ପୂର୍ବତନ ଜିଲାପାଳଙ୍କୁ ଦୁର୍ବ୍ୟବହାର ମାମଲାରେ ଗିରଫ ହୋଇଥିବା ଜିଲା ଓକିଲସଂଘ ସଭାପତି ସୁରେଶ୍ୱର ମିଶ୍ର ଓ ଜିଲା ସିଏସି ଅଧ୍ୟକ୍ଷ ପ୍ରଦୀପ ବହିଦାରଙ୍କୁ କ୍ରାଇମ୍ ବ୍ରାଞ୍ଚ ପକ୍ଷରୁ କୋର୍ଟରେ ହାଜର କରାଯାଇଥିଲା। ୧୪୪ ଧାରା ଲାଗୁ ହୋଇଥିବାରୁ ମଙ୍ଗଳବାର କୋର୍ଟ ପରିସର ଖାଁ ଖାଁ ଲାଗୁଥିଲା। ପୋଲିସ ଛାଉଣିର ଭୟ ଓ ଓକିଲଙ୍କ ଅନୁପସ୍ଥିତି ଯୋଗୁ ଲୋକମାନେ ଆସୁ ନ ଥିଲେ। ଅଳ୍ପକିଛି ଲୋକ ଆସୁଥିଲେ ମଧ୍ୟ ଫେରି ଯାଉଥିଲେ। ଘଟଣାରେ ଜିଲା ଓକିଲ ସଂଘର ସମସ୍ତ ଆଇନଜୀବୀଙ୍କୁ ବିସିଆଇ ପକ୍ଷରୁ ନିଲମ୍ବନ କରାଯାଇଥିଲା। ପରେ ୫୪ ଜଣଙ୍କୁ ବାଦ୍ଦେଇ ଅନ୍ୟ ଓକିଲମାନଙ୍କ ନିଲମ୍ବନ ଆଦେଶକୁ ଗତ ୧୪ ତାରିଖରେ ପ୍ରତ୍ୟାହୃତ କରାଯାଇଥିଲା। ଏହା ପରେ ମଧ୍ୟ ଜିଲା ଓକିଲ ସଂଘର ଅନ୍ୟ ଓକିଲମାନେ କାର୍ଯ୍ୟରେ ଯୋଗଦାନ କରୁ ନାହାନ୍ତି। ଓକିଲମାନେ ଜେଲରେ ଅଛନ୍ତି। ସେମାନେ ବାହାରକୁ ଆସିବା ପରେ ବୈଠକରେ ଆଲୋଚନା କରି ସ୍ଥିର ନ ହେବା ପର୍ଯ୍ୟନ୍ତ ବାର୍ର କୌଣସି ସଦସ୍ୟ ଯୋଗ ଦେବେ ନାହିିଁ ବୋଲି ସେମାନେ କହୁଛନ୍ତି। ଅନ୍ୟପଟେ ଏହି ଘଟଣାରେ ପୋଲିସ ଏପର୍ଯ୍ୟନ୍ତ ୩୭ ଜଣଙ୍କୁ କୋର୍ଟ ଚାଲାଣ କରିଛି। ସେମାନଙ୍କ ମଧ୍ୟରେ ୮ଜଣ କିନ୍ନର, ଜଣେ ସାଧାରଣ ଲୋକ ଓ ୨୮ଜଣ ଓକିଲ ଅଛନ୍ତି। ଭିଡିଓ ଓ ତଥ୍ୟ ପ୍ରମାଣ ସଂଗ୍ରହ କରି ପୋଲିସ ତାଲିକା ପ୍ରସ୍ତୁତ କରିଛି। ସେମାନଙ୍କୁ ଗିରଫ କରିବା ପାଇଁ ପୋଲିସ ବିଭିନ୍ନ ସ୍ଥାନରେ ଚଢାଉ ଜାରି ରଖିଛି। ସୂଚନାଯୋଗ୍ୟ, ପଶ୍ଚିମ ଓଡ଼ିଶାରେ ହାଇକୋର୍ଟ ସ୍ଥାୟୀ ବେଞ୍ଚ ଦାବି ନେଇ ଡିସେମ୍ବର ୧୨ରେ ସମ୍ବଲପୁର କଚେରି ଛକରେ ଆନ୍ଦୋଳନ ଚାଲିଥିଲା। ବିଚାରପତିମାନେ କୋର୍ଟ ଭିତରେ ଥିବା ଜାଣି ଆନ୍ଦୋଳନକାରୀ ଭିତରକୁ ଧସେଇ ପଶିଥିଲେ। କୋର୍ଟରେ ଭଙ୍ଗାରୁଜା କରିବା, ବିଚାରପତିମାନଙ୍କୁ ବାହାର କରିବା ସହ ପୋଲିସ ସହ ସେମାନଙ୍କର ଧସ୍ତାଧସ୍ତି ହୋଇଥିଲା। ଏହି ଘଟଣାରେ ଟାଉନ ଥାନା ଓ ଧନୁପାଲି ଥାନାରେ କେସ୍ ନଂ.୪୬୦, ୪୮୦, ୭୭୯ ଓ ୮୮୧/୨୨ରେ ମୋଟ ୪ ଗୋଟି ମାମଲା ରୁଜୁ ହୋଇଥିଲା।