![](https://www.dharitri.com/wp-content/uploads/2024/02/DD-7.jpg)
ଚଣ୍ଡିଖୋଲ,୨୩ା୨(ପ୍ରଦୀପ୍ତ କୁମାର ପୃଷ୍ଟି):ଯାଜପୁର ଜିଲାର ବଡ଼ଚଣା ବିଧାନସଭା କ୍ଷେତ୍ରରୁ କିଏ କେଉଁ ଦଳରୁ ଟିକେଟ ପାଇବେ ତାହାକୁ ନେଇ ଅଙ୍କକଷା ଚାଲିଛି। କାରଣ ୩ ପ୍ରମୁଖ ଦଳ ବିଜେଡି, ଭାଜପା ଓ କଂଗ୍ରେସରେ ଆଶାୟୀଙ୍କ ସଂଖ୍ୟା ବୃଦ୍ଧି ପାଉଛି। ସେଥିମଧ୍ୟରୁ ବିଜେଡି ଟିକେଟ ପାଇଁ ବେଶି ଧାଉଁଛନ୍ତି। ବର୍ତ୍ତମାନ ବିଧାୟକ ଅଛନ୍ତି ବିଜେଡିର ଅମର ପ୍ରସାଦ ଶତପଥୀ। ସେ ୧୯୯୦, ୧୯୯୫, ୨୦୦୦, ୨୦୦୯, ୨୦୧୪ ଓ ୨୦୧୯ରେ ନିର୍ବାଚିତ ହୋଇ ୬ ଥର ବିଧାୟକ ହେବାର ରେକର୍ଡ ସୃଷ୍ଟି କରିଛନ୍ତି। ଉଲ୍ଲେଖଯୋଗ୍ୟ, ପୂର୍ବତନ ବିଧାୟକ ସୀତାକାନ୍ତ ମହାପାତ୍ର ୧୯୮୦, ୧୯୮୫ ଏବଂ ପରେ ୨୦୦୪ରେ କଂଗ୍ରେସରୁ ନିର୍ବାଚିତ ହୋଇଥିଲେ।
ନବକୃଷ୍ଣ ଚୌଧୁରୀ ପ୍ରଥମେ ଏହି ବିଧାନସଭା କ୍ଷେତ୍ରରୁ ନିର୍ବାଚିତ ହୋଇ ମୁଖ୍ୟମନ୍ତ୍ରୀ ହୋଇଥିଲେ। ସୀତାକାନ୍ତ ମହାପାତ୍ର ମଧ୍ୟ ମନ୍ତ୍ରିମଣ୍ଡଳରେ ସ୍ଥାନ ପାଇ ସ୍ବାସ୍ଥ୍ୟମନ୍ତ୍ରୀ ହୋଇଥିଲେ। ବର୍ତ୍ତମାନର ବିଧାୟକ ଅମର ପ୍ରସାଦ ଶତପଥୀ ୨୦୦୦ରେ ନବୀନ ପଟ୍ଟନାୟକଙ୍କ ପ୍ରଥମ ପାଳିରେ କୃଷି ମନ୍ତ୍ରୀ ଓ ପରେ ମୁଖ୍ୟ ସଚେତକ ପଦବୀ ମଣ୍ଡନ କରିଥିଲେ। ଆଗମୀ ନିର୍ବାଚନ ପାଇଁ ବର୍ତ୍ତମାନର ବିଧାୟକ ଶତପଥୀ ବିଜେଡି ଟିକେଟ ଲବିରେ ରହିଥିବା ବେଳେ ତାଙ୍କ ପୁଅ ତଥା ‘ଟିମ୍ ବଡ଼ଚଣା’ର ସଭାପତି ଅଦ୍ୱିତୀୟ ଶତପଥୀ ମଧ୍ୟ ଯୁବ ନେତୃତ୍ୱ ଭାବରେ ଆଶାୟୀ ଥିବା ଜଣାପଡ଼ିଛି। ୨୦୧୯ରେ କଂଗେସ ଦଳ ଛାଡ଼ି ବିଜେଡିରେ ଯୋଗଦେଇଥିବା ଜନ୍ମେଜୟ ଲେଙ୍କା ଦଳୀୟ ଟିକେଟ ପାଇଁ ଲବିରେ ଅଛନ୍ତି। ସେ ବିଭିନ୍ନ ସମୟରେ କର୍ମୀ ସମ୍ମିଳନୀ ଜରିଆରେ ପତିଆରା ଜାହିର ପାଇଁ ଉଦ୍ୟମ କରୁଛନ୍ତି।
ଭାଜପା ପକ୍ଷରୁ ଗତ ବିଧାନସଭା ନିର୍ବାଚନରେ ଅବତୀର୍ଣ୍ଣ ହୋଇଥିବା ଅମର ନାୟକ ଚଳିତ ବିଧାନସଭା ନିର୍ବାଚନରେ ପ୍ରାର୍ଥୀ ହେବେ ବୋଲି ପୁଣି ଆଶା ବାନ୍ଧି ‘ଗୃହ ସମ୍ପର୍କ’ ଅଭିଯାନ ଆରମ୍ଭ କରିଛନ୍ତି। ତାଙ୍କ ନେତୃତ୍ୱକୁ ବିରୋଧ କରି ଗତ ୧୧ ତାରିଖରେ ଛତିଆଠାରେ ଏକ ବୈଠକ ଅନୁଷ୍ଠିତ ହୋଇଥିଲା। ଏଥିରେ ଭାଜପାର ପୂର୍ବତନ ପ୍ରାର୍ଥୀ ସିମନ୍ତିନୀ ଜେନାଙ୍କ ଯୋଗଦାନ ସୂଚାଇ ଦେଇଛି ଯେ ସେ ଆଶାରେ ଅଛନ୍ତି। ସେହିଭଳି ସମର କେତନ ଲେଙ୍କା ଆଶାୟୀ ଥିବା ଜଣାପଡ଼ିଛି।
କଂଗ୍ରେସର ବର୍ତ୍ତମାନର ପିସିସି ସମ୍ପାଦକ ତଥା ପୂର୍ବତନ ବିଧାୟକ ସୀତାକାନ୍ତ ମହାପାତ୍ରଙ୍କ ପୁଅ ରାଜ ନାରାୟଣ ମହାପାତ୍ର ସଙ୍ଗଠନ କରି ଆଗାମୀ ବିଧାନସଭା ନିର୍ବାଚନରେ ପ୍ରାର୍ଥୀ ପାଇଁ ପ୍ରସ୍ତୁତ ହେଉଥିବା ବେଳେ ଗତ ନିର୍ବାଚନରେ କଂଗ୍ରେସ ଦଳର ପ୍ରାର୍ଥୀ ହୋଇଥିବା ଅଜୟ କୁମାର ସାମଲ ମଧ୍ୟ ଦୌଡ଼ରେ ରହିଛନ୍ତି।
ଅତୀତକୁ ଦେଖିଲେ, ବଡ଼ଚଣା ବ୍ୟତୀତ ଅନ୍ୟ ନିର୍ବାଚନମଣ୍ଡଳୀର ପ୍ରାର୍ଥୀଙ୍କୁ ଏଠାକାର ଭୋଟର ଗ୍ରହଣ କରିନାହାନ୍ତି। ତା’ର ଦୃଷ୍ଟାନ୍ତ ୨୦୦୪ ବିଧାନସଭା ନିର୍ବାଚନରେ ଦେଖିବାକୁ ମିଳିଥିଲା। ବିଜେଡି ପକ୍ଷରୁ ଗୌତମ ରାୟଙ୍କୁ ଯାଜପୁରରୁ ଆଣି ଏଠାରେ ପ୍ରାର୍ଥୀ କରାଯିବା ଯୋଗୁ ଯାଜପୁର ଜିଲାରେ ଏହି ଆସନଟି ବିଜେଡି ହାତରୁ ଖସି ଯାଇଥିଲା। ଫଳରେ କଂଗ୍ରେସର ସୀତାକାନ୍ତ ମହାପାତ୍ର ସେତେବେଳେ ବିଜୟୀ ହୋଇଥିଲେ। ୨୦୦୯ ନିର୍ବାଚନରେ ଏନ୍ସିପିରୁ ପ୍ରାର୍ଥୀ ହୋଇ ଅମର ଶତପଥୀ କଂଗ୍ରେସର ସୀତାକାନ୍ତ ମହାପାତ୍ରଙ୍କୁ ହରାଇଥିଲେ। ସ୍ବାଧୀନ ପ୍ରାର୍ଥୀ ଜନ୍ମେଜୟ ଲେଙ୍କା ୨୫,୪୦୯ ଖଣ୍ଡ ଭୋଟ ପାଇଥିବାବେଳେ ଭାଜପା ପ୍ରାର୍ଥୀ ପବିତ୍ର ମୋହନ ସାମନ୍ତରାୟ ମାତ୍ର ୨,୬୩୩ ଖଣ୍ଡ ଭୋଟ ପାଇଥିଲେ। ସେହିଭଳି ୨୦୧୪ ନିର୍ବାଚନରେ ବିଜେଡିର ଅମର ପ୍ରସାଦ ଶତପଥୀ ବିଜୟୀ ହୋଇଥିଲେ। ସେ କଂଗ୍ରେସର ଜନ୍ମେଜୟ ଲେଙ୍କାଙ୍କୁ ହରାଇଥିଲେ। ସେତେବେଳେ ସ୍ବାଧୀନ ପ୍ରାର୍ଥୀ ଅମର ନାୟକ ୨୬,୨୬୦ ଭୋଟ ପାଇଥିବା ବେଳେ ଭାଜପା ପ୍ରାର୍ଥୀ ସିମନ୍ତିନୀ ଜେନା ୩,୫୬୪ ଭୋଟ ପାଇଥିଲେ। ତେବେ ୨୦୧୯ ନିର୍ବାଚନରେ ବିଜେଡିର ଅମର ପ୍ରସାଦ ଶତପଥୀ ବିଜୟୀ ହୋଇଥିଲେ। ସେ ୬୪,୦୮୪ ଭୋଟ ପାଇଥିବାବେଳେ ତାଙ୍କ ନିକଟତମ ପ୍ରତିଦ୍ବନ୍ଦ୍ୱୀ ଭାଜପାର ଅମର ନାୟକ ୬୨, ୫୯୯ ଭୋଟ ପାଇଥିଲେ। କଂଗ୍ରେସର ଅଜୟ କୁମାର ସାମଲ ପାଇଥିଲେ ମାତ୍ର ୯,୩୨୨ ଭୋଟ। ଦେଖିବାକୁ ଗଲେ ପ୍ରତ୍ୟେକ ନିର୍ବାଚନରେ ସ୍ବାଧୀନ ପ୍ରାର୍ଥୀ ଏଠାରେ ନିର୍ଣ୍ଣାୟକ ଭୂମିକା ଗ୍ରହଣ କରିଥିଲେ ମଧ୍ୟ ବିଜୟୀ ହୋଇ ପାରିନାହାନ୍ତି।