ନୂଆପଡ଼ା ଅଫିସ୍,୨୮।୪: ନୂଆପଡ଼ା ଜିଲାରେ ଦୁଇ ମାସ ହୋଇଗଲା ବାଘ ଆତଙ୍କ ଥମିବାର ନାଁ ନେଉନାହିଁ। ଗୋଟିଏ ପରେ ଗୋଟିଏ ଗୃହପାଳିତ ପ୍ରାଣୀକୁ ଶିକାର କରି ଚାଲିଛି କଲରାପତରିଆ ବାଘ। ସଦର ରେଞ୍ଜ ଆମାନାରା ସେକ୍ସନ ତରିଆ ମହୁଆଭଟା ଗାଁରେ ପୁଣି ଏକ ବାଛୁରୀକୁ ବାଘ ମାରି ଖାଇଛି। ବୁଧବାର ଗୋରୁ ଜଙ୍ଗଲରୁ ଚରିବୁଲି ଆସିବା ପରେ ସନ୍ଧ୍ୟାରେ ଗୁହାଲରେ ମାଲିକମାନେ ସୁରକ୍ଷିତ ଭାବରେ ବାନ୍ଧି ରଖିଥିଲେ। ଗୁରୁବାର ସକାଳେ ଉଠି ଦେଖିବା ବେଳକୁ ଗାଁର ଭାଗିରଥି ରାଉତଙ୍କ ଗୁହାଳରେ ଏକ ବାଛୁରୀ ମରି ପଡିଛି। ମୃତ ବାଛୁରୀର ଶରୀର ଯେଉଁ ପ୍ରକାର କ୍ଷତ ବିକ୍ଷତ ହୋଇଛି, ତାହା ସ୍ପଷ୍ଟ ଜଣାପଡୁଛି କି ବାଘ ମାରି ଖାଇଛି। ଏହି ବାଛୁରୀକୁ ବାଘ ଗତ ୧୫ ତାରିଖରେ ଆକ୍ରମଣ କରିଥିଲା। ଗ୍ରାମବାସୀ ଆକ୍ରମଣ ସମୟରେ ହୋହାଲା କରିବାରୁ ବାଘ ବାଛୁରୀକୁ ଛାଡି ଜଙ୍ଗଲ ଭିତରକୁ ଚାଲିଯାଇଥିଲା। ଗ୍ରାମବାସୀ ଗୁରୁତର ଭାବେ ଉଦ୍ଧାର କରି ଉପଯୁକ୍ତ ଚିକିତ୍ସା କରିବାରୁ ବାଛୁରୀ ସୁସ୍ଥ ରହିଥିଲା। ସେହି ବାଛୁରୀକୁ ବାଘ ପୁଣି ଆକ୍ରମଣ କରି ମାରି ଖାଇଦେଲା। ନୂଆପଡ଼ା ଜିଲାରେ ମାର୍ଚ୍ଚ ୧ ରୁ ବାଘ ଆତଙ୍କ ଆରମ୍ଭ ହୋଇ ଦୁଇ ମାସ ହୋଇଯିବ ଆତଙ୍କ ଥମିବାର ନାଁ ନେଉନାହିଁ। ବର୍ତ୍ତମାନ ସୁଦ୍ଧା ଦୁଇ ମାସ ମଧ୍ୟରେ ଜଣେ ମଣିଷ ସହ ୨୧ ଟି ଗୃହପାଳିତ ପ୍ରାଣୀ ଶିକାର ହୋଇ ସାରିଲେଣି। ହେଲେ ବନ ବିଭାଗ ବାଘକୁ ଘଉଡାଇବାକୁ ଉଦ୍ୟମ କରୁ ନାହାନ୍ତି କିମ୍ବା ଗୃହପାଳିତ ପ୍ରାଣୀ ହେଉ ବା ମଣିଷକୁ ସୁରକ୍ଷା ଦେବାର ବ୍ୟବସ୍ଥା କରୁନାହାନ୍ତି। ଏହିପରି ଚାଲିଥିଲେ କେତେ ଯେ ଜୀବନ ଚାଲିଯିବ ଆକଳନ କରିହେବ ନାହିଁ। ପାହାଡ ତଳି ଗାଁମାନଙ୍କର ଛାତ୍ରୀଛାତ୍ରଙ୍କ ଭବିଷ୍ୟତ ଅନ୍ଧାରରେ। ସ୍କୁଲ ଯାଇପାରୁ ନାହାନ୍ତି କି କାମ କରିପାରୁ ନାହାନ୍ତି। ଜୀବନ ଜୀବିକା ଉପରେ ପ୍ରଭାବ ପଡୁଥିଲେ ମଧ୍ୟ ବନ ବିଭାଗ ପକ୍ଷରୁ କୌଣସି ପଦକ୍ଷେପ ନିଆଯାଉନାହିଁ। ବର୍ତ୍ତମାନ ଚାଷ କାର୍ଯ୍ୟ ସମୟ ଆସି ଯାଉଛି। ବାଘ ଆତଙ୍କରେ ଜମି ସବୁ ପଡିଆ ପଡିବ। ଶେଷରେ ଲୋକେ ଅଭାବୀ କାରଣରୁ କାମ ଅନ୍ବେଷଣରେ ଦାଦନ ଶ୍ରମିକ ହୋଇ ବାହାରକୁ ଚାଲିଯାଇ ବାଘ ଆତଙ୍କରୁ ମଧ୍ୟ ଅଧିକ ଯନ୍ତ୍ରଣା ପାଇ ଘରକୁ ଫେରିବେ। ଏଥିପାଇଁ ଦାୟୀ କିଏ ବୋଲି ସାଧାରଣରେ ପ୍ରଶ୍ନବାଚୀ ସୃଷ୍ଟି ହେଉଛି। ରବି ଚାଷ ବା ଖରା ଦିନିଆ ଚାଷ ଯାହା କରିଥିଲେ, ବାଘ ଆତଙ୍କରେ ଚାଷୀ ଛାଡିଦେଲେ। ବାଘ ଆତଙ୍କ କାରଣରୁ ଅନେକ ଚାଷୀଙ୍କୁ କ୍ଷତି ସହିବାକୁ ପଡିଛି ା ଖରା ଦିନ ବର୍ଷାରେ ଚାଷୀ ଜମିରେ ହଳ କରି ଚାଷ ଜମିକୁ ଉର୍ବର କରି ରଖିଥାଏ। ଠିକ ଚାଷ ସମୟ ଆସିଲେ ତଳି ପକା ଆରମ୍ଭ କରିଥାଏ। ଚଳିତବର୍ଷ ତାହା ହୋଇପାରୁ ନାହିଁ। ଚିନ୍ତାରେ ଚାଷୀ ଘାରି ହେଉଛନ୍ତି। ଗରିବ ଶ୍ରେଣୀର ଲୋକମାନଙ୍କୁ ଚଳିବା ମୁସକିଲ ହୋଇପଡିଗଲାଣି। ଯେଉଁମାନେ ଦିନ ମଜୁରିଆ କାମ କରି ପରିବାର ପ୍ରତିପୋଷଣ କରୁଥିଲେ। ସେମାନେ ବର୍ତ୍ତମାନ ବାହାର ରାଜ୍ୟକୁ ଯିବା ପାଇଁ ସଜବାଜ ହେଉଥିବା ମଧ୍ୟ ଅଭିଯୋଗ ହେଉଛି। କେବଳ ବନ ବିଭାଗ ଗାଁଗାଁ ବୁଲି ଡାକବାଜି ଯନ୍ତ୍ର ସାହାର୍ଯ୍ୟରେ ଲୋକଙ୍କୁ ସଚେତନ କରାଇ ବାଘର ଗତିବିଧି ଉପରେ ନଜର ରଖାଯାଇଛି ବୋଲି କହୁଛି। ଲୋକଙ୍କ ଜୀବନଜୀବିକାରେ ସୁଧାର ଆସୁନାହିଁ। ଏଥି ପ୍ରତି ବିଭାଗୀୟ ଉଚ୍ଚ କର୍ତ୍ତୃପକ୍ଷ ଦୃଷ୍ଟି ଦେବା ପାଇଁ ସାଧାରଣରେ ଦାବି ହେଉଛି।