ନୂଆଦିଲ୍ଲୀ,୩।୩(ପି.ଟି.): ସିମିଳିପାଳ-ହଦଗଡ଼-କୁଲଡିହା ହାତୀ କରିଡରର ପରିବେଶ ସମ୍ବେଦନଶୀଳ ଅଞ୍ଚଳରେ ଖଣି ଖନନ ଲାଗି ଅନୁମତି ଦେବା ପୂର୍ବରୁ ବିସ୍ତୃତ ବନ୍ୟପ୍ରାଣୀ ପରିଚାଳନା ଯୋଜନା କାର୍ଯ୍ୟକାରୀ କରିବାକୁ ସୁପ୍ରିମକୋର୍ଟ ବୁଧବାର ଓଡ଼ିଶା ସରକାରଙ୍କୁ ନିର୍ଦ୍ଦେଶ ଦେଇଛନ୍ତି। ବନ୍ୟପ୍ରାଣୀ (ସୁରକ୍ଷା) ଆଇନ, ୧୯୭୨ର ଧାରା ୩୬ଏ ଅନୁଯାୟୀ ପାରମ୍ପରିକ ହାତୀ କରିଡରକୁ ସଂରକ୍ଷଣ ରିଜର୍ଭ ଘୋଷଣା ପ୍ରକ୍ରିୟା ତ୍ୱରାନ୍ବିତ କରିବା ପାଇଁ ଜଷ୍ଟିସ୍ ଏଲ୍.ଏନ୍. ରାଓ ଏବଂ ବି.ଆର୍. ଗଭାଇଙ୍କ ଖଣ୍ଡପୀଠ ରାଜ୍ୟ ସରକାରଙ୍କୁ ନିର୍ଦ୍ଦେଶ ଦେଇଛନ୍ତି। ସେହି ଅନୁଯାୟୀ ୯୭ଟି ଖଣି କାର୍ଯ୍ୟକୁ ଅନୁମତି ଦେବା ପୂର୍ବରୁ ଜାତୀୟ ବନ୍ୟପ୍ରାଣୀ ବୋର୍ଡ (ଏନ୍ବିଡବ୍ଲ୍ୟୁଏଲ୍) ଷ୍ଟାଣ୍ଡିଂ କମିଟି ପ୍ରସ୍ତାବିତ ବିସ୍ତୃତ ବନ୍ୟପ୍ରାଣୀ ପରିଚାଳନା ଯୋଜନା କାର୍ଯ୍ୟକାରୀ କରିବା ଏବଂ ପାରମ୍ପରିକ ହାତୀ କରିଡରକୁ ସଂରକ୍ଷିତ ରିଜର୍ଭ ଘୋଷଣା କରିବାକୁ କୁହାଯାଇଛି।
ସିମିଳିପାଳ-ହଦଗଡ଼-କୁଲଡିହା ହାତୀ କରିଡର ପରିସର ଓ ଏହାର ଚତୁଃପାର୍ଶ୍ୱରେ କୌଣସି ଖଣି କାର୍ଯ୍ୟ କରାଯାଇପାରିବ ନାହିଁ ବୋଲି ୨୦୨୦ ଫେବୃୟାରୀ ୧୮ରେ ନ୍ୟାଶନାଲ ଗ୍ରୀନ୍ ଟ୍ରିବ୍ୟୁନାଲ (ଏନ୍ଜିଟି) ନିର୍ଦ୍ଦେଶ ଦେଇଥିଲେ। ଉକ୍ତ ରାୟ ବିରୋଧରେ ଜଣେ ପଥର ଖଣି ମାଲିକ ସୁପ୍ରିମକୋର୍ଟରେ ଆବେଦନ କରିଥିଲେ। ପରିବେଶ ସମ୍ବେଦନଶୀଳ ଜୋନ୍ ମଧ୍ୟରେ ଆସୁ ନ ଥିବା ଅଞ୍ଚଳରେ ଖଣି କାର୍ଯ୍ୟ ବନ୍ଦ କରିବାର କୌଣସି ଯଥାର୍ଥତା ନାହିଁ ବୋଲି ଖଣି ମାଲିକ ଓ ରାଜ୍ୟ ସରକାରଙ୍କ ପକ୍ଷରୁ କୁହାଯାଇଥିଲା। ସେହିପରି ବନ୍ୟପ୍ରାଣୀ ପରିଚାଳନା ଯୋଜନା ଏବଂ ବନ୍ୟପ୍ରାଣୀ ସୁରକ୍ଷା ଆଇନର ଧାରା ୩୬ଏ କାର୍ଯ୍ୟକାରୀ ନ ହେବା ଯାଏ ପରିବେଶ ସମ୍ବେଦନଶୀଳ ଜୋନ୍ ଚତୁଃପାର୍ଶ୍ୱରେ ଖଣି କାର୍ଯ୍ୟ କରିବାକୁ ଅନୁମତି ଦିଆ ନ ଯାଉ ବୋଲି ‘ରୁରାଲ ଅର୍ଗାନାଇଜେଶନ ଫର୍ ସୋସିଆଲ ଏମ୍ପାଓ୍ବାରମେଣ୍ଟ’ ପକ୍ଷରୁ ଅଦାଲତଙ୍କୁ କୁହାଯାଇଥିଲା।
ଉଲ୍ଲେଖଯୋଗ୍ୟ ଯେ ୨୦୦୧ ଜାନୁୟାରୀ ୨୯ରେ ଓଡ଼ିଶା ସରକାର ଜାରି କରିଥିବା ବିଜ୍ଞପ୍ତିରେ ମୟୂରଭଞ୍ଜ, ବାଲେଶ୍ୱର, ଭଦ୍ରକ ଏବଂ କେନ୍ଦୁଝରର କେତେକ ଅଞ୍ଚଳକୁ ହାତୀ ସଂରକ୍ଷଣ ଅଞ୍ଚଳ ଘୋଷଣା କରାଯାଇଥିଲା। କେନ୍ଦ୍ରୀୟ ଯୋଜନା ‘ପ୍ରୋଜେକ୍ଟ ଏଲିଫ୍ୟାଣ୍ଟ’ ଅଧୀନରେ ମୟୂରଭଞ୍ଜ (ସିମିଳିପାଳ-କୁଲଡିହା-ହଦଗଡ଼) ହାତୀ ରିଜର୍ଭ ଭାବେ ଘୋଷିତ ହୋଇଥିଲା। ସେହିପରି ବନ୍ୟପ୍ରାଣୀଙ୍କ ଆବାସସ୍ଥଳରେ ଅଣଜଙ୍ଗଲ କାର୍ଯ୍ୟ କରାଯାଉଥିବାରୁ କେନ୍ଦ୍ର ଜଙ୍ଗଲ ଓ ପରିବେଶ ମନ୍ତ୍ରଣାଳୟ ୨୦୧୧ ଫେବୃୟାରୀ ୧୫ରେ ଏକ ଗାଇଡ୍ଲାଇନ ଜାରି କରିଥିଲେ, ଯେଉଁଥିରେ ଜାତୀୟ ଉଦ୍ୟାନ ଏବଂ ଅଭୟାରଣ୍ୟର ୧୦ କିଲୋମିଟର ପରିଧି ମଧ୍ୟରେ କୌଣସି ପ୍ରକଳ୍ପକୁ ପରିବେଶ ମଞ୍ଜୁରୀ ପ୍ରଦାନ ପାଇଁ ଏନ୍ବିଡବ୍ଲ୍ୟୁ ଷ୍ଟାଣ୍ଡିଂ କମିଟିର ସୁପାରିସ ଆବଶ୍ୟକ ବୋଲି କୁହାଯାଇଥିଲା।
କୁଲଡିହା ବନ୍ୟପ୍ରାଣୀ ଅଭୟାରଣ୍ୟ ସୀମାଠାରୁ ୨ କିଲୋମିଟର ଦୂରତା ମଧ୍ୟରେ ୯୭ ପଥର ଖଣି ଖନନ ଲାଗି ଓଡ଼ିଶା ସରକାର ଏନ୍ବିଡବ୍ଲ୍ୟୁଏଲ୍ ଷ୍ଟାଣ୍ଡିଂ କମିଟିକୁ ପ୍ରସ୍ତାବ ଦେଇଥିଲେ। ତେବେ ଉକ୍ତ ଅଞ୍ଚଳରେ ବିସ୍ତୃତ ବନ୍ୟପ୍ରାଣୀ ପରିଚାଳନା ଯୋଜନା କାର୍ଯ୍ୟକାରୀ କରାଯିବା ସର୍ତ୍ତରେ ଷ୍ଟାଣ୍ଡିଂ କମିଟି ଏଥିପାଇଁ ମଞ୍ଜୁରୀ ଦେବାକୁ ରାଜି ହୋଇଥିଲେ। ସେହି ଅନୁଯାୟୀ ବାଲେଶ୍ୱର ବନ୍ୟପ୍ରାଣୀ ଡିଭିଜନର ଡିଏଫ୍ଓ ପ୍ରସ୍ତୁତ କରିଥିବା ବନ୍ୟପ୍ରାଣୀ ପରିଚାଳନା ଯୋଜନାକୁ ରାଜ୍ୟ ସରକାର ଅନୁମୋଦନ କରିଥିଲେ।