ରସୁଲପୁର,୨୨।୧୦(ଡି.ଏନ.ଏ.): ରସୁଲପୁର ବ୍ଲକରେ ଜୈବିକ ପଦ୍ଧତିରେ ପଶୁପକ୍ଷୀଙ୍କ ଖାଦ୍ୟ ପ୍ରସ୍ତୁତିକୁ ଗୁରୁତ୍ୱ ଦିଆଯାଉଛି। ଗ୍ରାମ୍ୟ ଉନ୍ନତି ଫାଉଣ୍ଡେଶନ ପକ୍ଷରୁ ଏନେଇ ଚାଷୀଙ୍କୁ ପ୍ରୋତ୍ସାହିତ କରାଯାଉଛି। ଉକ୍ତ କାର୍ଯ୍ୟକ୍ରମର ସ୍ଥିତି ଅନୁଧ୍ୟାନ ପାଇଁ ସଂସ୍ଥା ମୁଖ୍ୟ ପରିଚାଳନା ଅଧିକାରୀ ଭିଶାଲ ମେସି ବ୍ଲକ ଅଧୀନ ଓଡ଼ିଶୋ ଗ୍ରାମର ଚାଷୀ ଶିଶିର ରାଉତଙ୍କ ଫାର୍ମ ହାଉସ ବୁଲି ଦେଖିଥିଲେ। ରାଉତଙ୍କ ପକ୍ଷରୁ ପଶୁପକ୍ଷୀଙ୍କ ପାଇଁ ଜୈବିକ ଖାଦ୍ୟ ଆଜୋଲା ମଂଜି ଉତ୍ପାଦନ ପ୍ରଣାଳୀକୁ ଅନୁଧ୍ୟାନ କରି ସେ ଖୁସି ପ୍ରକଟ କରିଥିଲେ। ପଶୁପକ୍ଷୀଙ୍କ ପାଇଁ ବଜାରରେ ଉପଲବ୍ଧ ହେଉଥିବା କୃତ୍ରିମ ଖାଦ୍ୟର ସ୍ଥାନ ନେଇପାରିବ ଜୈବିକ ଖାଦ୍ୟ ଆଜୋଲା ମଂଜି। ମଂଜି ଉତ୍ପାଦନ ପାଇଁ ଛାତ ଉପରେ ଓ କ୍ଷେତରେ କୁଣ୍ଡ ନିର୍ମାଣ କରି ସେଥିରେ ଗୋବର, ସ୍ବଳ୍ପ ପଟାସ ଓ ସୁପର ମିଶ୍ରଣ ପାଣିରେ ଆଜୋଲା ମଂଜି ବୁଣି ଜୈବିକ ଖାଦ୍ୟ ଉତ୍ପାଦନ କରାଯାଇ ପାରିବ। ଏହାକୁ ପଶୁପକ୍ଷୀଙ୍କ ଖାଦ୍ୟ ଭାବେ ବ୍ୟବହାର କରାଯାଇପାରିବ। ଏହି ଖାଦ୍ୟ ବ୍ୟବହାର ଯୋଗୁ କୁକୁଡ଼ାଙ୍କ ଓଜନ ବୃଦ୍ଧି ଘଟିବ। ଦୁହାଁଳିଆ ଗାଈଙ୍କ ଖାଦ୍ୟ ଭାବରେ ବ୍ୟବହାର କେଲ କ୍ଷୀର ଉତ୍ପାଦନ ବୃଦ୍ଧି ଘଟିବ ବୋଲି ମେସି କହିଥିଲେ। ଏହାପରେ ମେସି ହାତୀ ଘାସ ଚାଷ, ଫସଲରେ କେମିକାଲ ବ୍ୟବହାର, ଠିକ୍ ପରିଚାଳନାର ବିଭିନ୍ନ ଦିଗ ଉପରେ ଚାଷୀଙ୍କ ସହ ଆଲୋଚନା କରିଥିଲେ। ପରେ ଅରତିଆ ଗାଁର ବାଓପ୍ଲକ ମାଛଚାଷ କେନ୍ଦ୍ର ଅନୁଧ୍ୟାନ କରିଥିଲେ। ଫାଉଣ୍ଡେସନର ସିଏସଆର ଶାଖା ପକ୍ଷରୁ ଆସୋସିଏଟ ଜେନେରାଲ ମ୍ୟାନେଜର ସୁଶାନ୍ତ ରଥ, ଗ୍ରାମ୍ୟ ଉନ୍ନତିର ଆଞ୍ଚଳିକ ପରିଚାଳକ ବିଜ୍ଞାନ ମହାକୁଲ, ଏରିଆ ମ୍ୟାନେଜର ସୁମିତ ରାୟ, କ୍ଷେତ୍ରାଧିକାରୀ ପ୍ରବୀଣ ମଲିକ ପ୍ରମୁଖ ଯୋଗଦେଇ ଚାଷୀଙ୍କୁ ଜୈବିକ ଚାଷର ବିଭିନ୍ନ ଦିଗ ସମ୍ପର୍କରେ ବୁଝାଇଥିଲେ।