ରସୁଲପୁର,୧୫ା୩(ଡି.ଏନ.ଏ.): ରସୁଲପୁର ବ୍ଲକ ଅଧୀନ ୨୮ ପଞ୍ଚାୟତର ଉନ୍ନୟନ କାର୍ଯ୍ୟକୁ ନେଇ ମଙ୍ଗଳବାର ଏକ ମାସିକିଆ ସମୀକ୍ଷା ବୈଠକ ପଞ୍ଚାୟତ ସମିତି ଅଧ୍ୟକ୍ଷ ଅରୁଣ କୁମାର ରାଉତଙ୍କ ପୌରୋହିତ୍ୟରେ ଅନୁଷ୍ଠିତ ହୋଇଯାଇଛି। ବୈଠକରେ ପାନୀୟ ଜଳ ଯୋଗାଣକୁ ଗୁରୁତ୍ୱ ଦିଆଯିବା ସହ ବୃଦ୍ଧି ପାଉଥିବା ରୌଦ୍ରତାପରୁ ଜନସାଧାରଣଙ୍କୁ ସୁରକ୍ଷା ଦେବା ଦିଗରେ ବ୍ୟାପକ ସଚେତନତା ସୃଷ୍ଟି କରିବାକୁ ସରପଞ୍ଚମାନଙ୍କୁ ପରାମର୍ଶ ଦିଆଯାଇଛି। ମାର୍ଚ୍ଚ ଶେଷ ସୁଧା ପଞ୍ଚାୟତରେ ଅଚଳ ହୋଇପଡ଼ିଥିବା ପାଇପଲାଇନ ଓ ନଳକୂପ ଆଦିକୁ ତୁରନ୍ତ ସଚଳ କରାଇବାକୁ ନିର୍ଦ୍ଦେଶ ଦିଆଯାଇଛି। ଭାରପ୍ରାପ୍ତ ଗ୍ରାମ ପଞ୍ଚାୟତ ସମ୍ପ୍ରସାରଣ ଅଧିକାରୀ ପ୍ରଫୁଲ କୁମାର ଜେନା ପ୍ରାରମ୍ଭିକ ସୂଚନା ଦେଇ ପଞ୍ଚାୟତର ବିଭିନ୍ନ ସ୍ଥାନରେ ଜଳଛତ୍ର ଖୋଲିବାକୁ କହିଥିଲେ। ଏଥିସହିତ କେନ୍ଦ୍ରୀୟ ଓ ରାଜ୍ୟ ଅର୍ଥ କମିଶନ ଅନୁଦାନ ବ୍ୟୟ ସମ୍ପର୍କରେ ଆଲୋଚନା କରିଥିଲେ।
ଏବିଡିଓ ଦିବ୍ୟକାନ୍ତି ମିଶ୍ର ଇ-ପଞ୍ଚାୟତ ସଭା ଓ ହରିଶ୍ଚନ୍ଦ୍ର ଯୋଜନାକୁ ଠିକ୍ ଭାବରେ କାର୍ଯ୍ୟକାରିତା ଉପରେ ଗୁରୁତ୍ୱ ଦେଇଥିଲେ। ସାମାଜିକ ନିରାପତ୍ତା ଯୋଜନାରେ ବାର୍ଦ୍ଧକ୍ୟ, ଦିବ୍ୟାଙ୍ଗ, ବିଧବାଙ୍କୁ ଭତ୍ତା ମିଳିବାରେ ଉପୁଜୁଥିବା ଦ୍ୱନ୍ଦ୍ୱ ଦୂର କରିବା ସହ ନୂତନ ହିତାଧିକାରୀଙ୍କୁ ଭତ୍ତା ଯୋଜନାରେ ସାମିଲ କରିବା, ପ୍ରଧାନମନ୍ତ୍ରୀ ଆବାସ ଯୋଜନାରୁ ବାଦ୍ ପଡିଥିବା ହିତାଧିକାରୀଙ୍କୁ ସାମିଲ କରିବା, ନୂତନ ହିତାଧିକାରୀଙ୍କୁ ରାଶନ କାର୍ଡରେ ସାମିଲ କରିବା, ପୂର୍ବରୁ କାର୍ଡଧାରୀମାନଙ୍କ ସହ ପରିବାରର ନୂତନ ହିତାଧିକାରୀଙ୍କୁ ସାମିଲ କରିବା ଆଦି ବିଷୟ ଉପରେ ସରପଞ୍ଚମାନେ ମତ ରଖିଥିଲେ। ଏମ୍ଜିଏନ୍ଆର୍ଇଜିଏସ୍ ପାଉଣା ପୈଠ ପାଇଁ ଉିଦ୍ଦିଷ୍ଟ ଡିଏସ୍ସି(ଡିଜିଟାଲ ସିଗ୍ନେଚର ସାର୍ଟିଫିକେଟ)କୁ ଠିକ୍ ଭାବେ ପରିଚାଳନା କରିବା ଓ ଦେୟ ପୈଠ ସମୟରେ ଭଲ ଭାବରେ ଯାଞ୍ଚ କରିବା ପରେ ସରପଞ୍ଚମାନେ ପେମେଣ୍ଟ୍ ମୋଡକୁ ଯିବାକୁ ବିଡିଓ ଅବନିକାନ୍ତ ସାହୁ ପରାମର୍ଶ ଦେଇଥିଲେ। ସ୍ବଚ୍ଛଭାରତ ମିଶନ ଜରିଆାରେ କାର୍ଯ୍ୟକାରୀ ହେଉଥିବା ବିଭିନ୍ନ ଯୋଜନାର ସଫଳ ରୂପାୟନ ଉପରେ ଗୁରୁତ୍ୱ ଦିଆଯାଇଥିଲା। ପ୍ରତ୍ୟେକ ଯୋଜନାକୁ କାର୍ଯ୍ୟକାରୀ କରିବା ଓ ଉନ୍ନୟନ କାର୍ଯ୍ୟ ଅଗ୍ରଗତି ସମୟରେ ସୃଷ୍ଟି ହେଉଥିବା ସମସ୍ୟା ସମ୍ପର୍କରେ ବିଭିନ୍ନ ପଞ୍ଚାୟତରୁ ଆସିଥିବା ପ୍ରସ୍ତାବ ଉପରେ ଅଧ୍ୟକ୍ଷ ରାଉତ ମତ ରଖିବା ସହ ତା’ର ସମାଧାନର ଉପାୟ ସମ୍ପର୍କରେ ପରାମର୍ଶ ଦେଇଥିଲେ। ଭାରପ୍ରାପ୍ତ ଗ୍ରାମ ପଞ୍ଚାୟତ ସମ୍ପ୍ରସାରଣ ଅଧିକାରୀ ଜେନା ଧନ୍ୟବାଦ ଦେଇଥିଲେ।