ଭୁବନେଶ୍ୱର,୩୦।୧୧ (ଅଭୟ ଦାଶ): ବର୍ତ୍ତମାନ ସମୟରେ ଭାରତୀୟ ରେଳ ଯାତ୍ରୀ ପରିବହନର ଏକ ପ୍ରମୁଖ ମାଧ୍ୟମ ପାଲଟିଛି। ରେଳପଥରେ ଗମନାଗମନ କରୁଥିବା ଯାତ୍ରୀଙ୍କୁ ଗୁଣାତ୍ମକ ମାନର ଯାତ୍ରୀସେବା ଯୋଗାଇଦେବାକୁ ପୂର୍ବତଟ ରେଳପଥ ପକ୍ଷରୁ ବ୍ୟାପକ ଯୋଜନା ଓ ପଦକ୍ଷେପ ନିଆଯାଇଛି। ଅପରପକ୍ଷରେ ପୂର୍ବତଟ ରେଳପଥ ନେଟ୍ଓ୍ବର୍କରେ ଜାରି ରହିଥିବା ଯାତ୍ରୀସେବା ପୂର୍ବାପେକ୍ଷା ଯଥେଷ୍ଟ ଉନ୍ନତ ହୋଇଛି। ପୂର୍ବରୁ ଯାତ୍ରୀଙ୍କୁ ଦିଆଯାଉଥିବା ବେଡ୍ରୋଲ ସେଟ୍ଗୁଡିକର ମାନ ସନ୍ତୋଷଜନକ ଥିଲାବେଳେ ବର୍ତ୍ତମାନ ସମୟରେ ଦିଆଯାଉଥିତ୍ବା ବେଡ୍ରୋଲ ବେଶ୍ ଗୁଣାତ୍ମକ ଓ ପରିଷ୍କାର ପରିଚ୍ଛନ୍ନ ରହିଛି। କାରଣ ପୂର୍ବତଟ ରେଳପଥ ରେଳ ନେଟ୍ଓ୍ବର୍କରେ ବର୍ତ୍ତମାନ ଉନ୍ନତ ଲିଲେନ୍ ଓ୍ବାଶିଂ ସିଷ୍ଟମର ପ୍ରୟୋଗ ସହ ଯାତ୍ରୀମାନଙ୍କ ସ୍ବଚ୍ଛତା ଓ ଆରାମକୁ ବିଶେଷ ପ୍ରାଧାନ୍ୟ ଦିଆଯାଉଛି। ଏପରିକି ଶୀତତାପ ନିୟନ୍ତ୍ରିତ କୋଚ୍ରେ ଯାତ୍ରା କରୁଥିବା ପ୍ରତ୍ୟେକ ଯାତ୍ରୀ ପରିଷ୍କାର ପରିଚ୍ଛ୍ନନ୍ନତା ସହ ସ୍ବଚ୍ଛତା ଏବଂ ସୁପରିଚାଳିତ ଲିଲେନ୍ ଗ୍ରହଣ କରିଥାନ୍ତି। ଉଲ୍ଲେଖଯୋଗ୍ୟ, ପୂର୍ବତଟ ରେଳପଥ ଅଞ୍ଚଳରେ ବର୍ତ୍ତମାନ ୨୪୨୮ଏଲ୍ଏଚ୍ବି କୋଚ୍ ( ୧୩୨୭ ଏସି ଏବଂ ୧୧୦୧ ନନ୍-ଏସି କୋଚ୍) ସହ ୯୩୮ ଆଇସିଏଫ୍ କୋଚ ( ୨୩୯ ଏସି ଏବଂ ୬୯୯ ନନ୍-ଏସି କୋଚ୍)ର କୋଚ ଚଳାଚଳ କରୁଛି। ଏପରିକି ରେଳ ବୋର୍ଡର ନିର୍ଦ୍ଦେଶାବଳୀ ଅନୁଯାୟୀ ସମସ୍ତ ଶୀତତାପ ନିୟନ୍ତ୍ରିତ କୋଚ୍ରେ ଲିଲେନ୍ ରଖିବା ସହ ଯାତ୍ରୀମାନଙ୍କୁ (ଯାତ୍ରୀଙ୍କୁ ଦିଆଯାଇଥିବା ବେଡ୍ରୋଲ ସେଟ୍ରେ ୨ଟି ବେଡ୍ସିଟ୍, ଗୋଟିଏ କମ୍ବଳ, ଗୋଟିଏ ଫେସ୍ ଟାଓ୍ବେଲ, ଗୋଟିଏ ତକିଆ କଭର ଏବଂ ଗୋଟିଏ ତକିଆ) ପରିଷ୍କାର ଓ ତାଜା ସାମଗ୍ରୀ ଯୋଗାଇ ଦିଆଯାଉଛି। ସେହିପରି ଯାତ୍ରୀ ସେବାକୁ ଉନ୍ନତ କରିବା ପାଇଁ ରେଳପଥ ବର୍ତ୍ତମାନ ସତେଜ ଓ ପରିଷ୍କାର ବେଡ୍ରୋଲ ଯୋଗାଇଦେଉଛି। ପୂର୍ବରୁ ଦିଆଯାଇଥିବା କମ୍ବଳ ୩ ମାସରେ ଥରେ ବଦଳା ଓ ସଫା ହେଉଥିଲାବେଳେ ବର୍ତ୍ତମାନ ଏହା ପ୍ରତି ମାସରେ ଅତ୍ୟାଧୁନିକ ପ୍ରଣାଳୀରେ ସଫା କରିବା ସହ ବଦଳାଯାଉଛି। ଏପରିକି ଅତ୍ୟାଧୁନିକ ପ୍ରଣାଳୀରେ ବେଡ୍ରୋଲ ସାମଗ୍ରୀର ସଫେଇ ସାଙ୍ଗକୁ ଅନ୍ୟାନ୍ୟ ଆନୁଷଙ୍ଗିକ କାର୍ଯ୍ୟ ମଧ୍ୟ କରାଯାଉଛି।
ଭାରତୀୟ ରେଳପଥ କ୍ରମାଗତ ଭାବେ ମାନବ ସମ୍ବଳ (କର୍ମଚାରୀ ନିଯୁକ୍ତି ବୃଦ୍ଧି) ବୃଦ୍ଧି ଦିଗରେ କାର୍ଯ୍ୟ କରୁଛି। ଏପରିକି ୨୦୧୪ରୁ୨୪ ( ୨୦୧୪-୨୦୨୪ ବର୍ଷ) ମଧ୍ୟରେ ରେଳ ବୋର୍ଡ ମୋଟ ୫ ଲକ୍ଷ କର୍ମଚାରୀଙ୍କୁ ନିଯୁକ୍ତ ଦେଇଥିବାବେଳେ ପୂର୍ବ ୧ ଦଶନ୍ଧି ମଧ୍ୟରେ (୨୦୦୪-୨୦୧୪ ବର୍ଷ) କେବଳ ୪ଲକ୍ଷ କର୍ମଚାରୀ ରେଳପଥରେ ନିଯୁକ୍ତି ପାଇଥିଲେ। ଏପରିକି ପୂର୍ବ ୧ ଦଶନ୍ଧି ତୁଳନାରେ ଭାରତୀୟ ରେଳପଥ ଦ୍ୱାରା ପ୍ରଦାନ କରାଯାଇଥିବା ନିଯୁକ୍ତିରେ ଏହା ୨୫% ମାନବ ସମ୍ବଳ ବୃଦ୍ଧି ହୋଇଛି ବୋଲି ରେଳବାଇ ବୋର୍ଡ ପକ୍ଷରୁ ବିସ୍ତୃତ ଭାବେ ଘୋଷଣା କରାଯାଇଛି।
ଉଲ୍ଲେଖଯୋଗ୍ୟ, ଭାରତୀୟ ରେଳପଥ ଇତିହାସରେ ପ୍ରଥମ ଥର ପାଇଁ ଏକ ନିଯୁକ୍ତି କ୍ୟାଲେଣ୍ଡର ପ୍ରକାଶ ପାଇଛି। ଏହି କ୍ୟାଲେଣ୍ଡର ସୂଚୀ ଅନୁଯାୟୀ ରେଳପଥର ସମସ୍ତ ଖାଲି ପଦବୀ ପାଇଁ ବିଜ୍ଞପ୍ତି ଜାରି କରାଯାଇଥିଲା। ଏହି କ୍ୟାଲେଣ୍ଡରର ଯୋଜନା ଅନୁଯାୟୀ ୨୦୨୪ ଫେବୃଆରୀରେ ମୋଟ ୧୮,୭୯୯ ଆସିଷ୍ଟାଣ୍ଟ ଲୋକୋ ପାଇଲଟ୍ (ଏଏଲ୍ପି) ପଦବୀ ପାଇଁ ଘୋଷଣା କରାଯାଇଥିଲା। ଏପରିକି ଏଏଲ୍ପି ପଦବୀ ପାଇଁ ନିଯୁକ୍ତି ପରୀକ୍ଷା ସାରା ଦେଶରେ ୫ଦିନ ଧରି କରାଯାଇଥିଲା। ଏହି ପରୀକ୍ଷା ମୋଟ ୨୯ ରାଜ୍ୟ, ୧୫୬ ସହର, ୩୪୬ କେନ୍ଦ୍ର ଏବଂ ୩ ଶିଫ୍ଟରେ ଅନୁଷ୍ଠିତ ହୋଇଥିଲା। ସେହିଭଳି କମ୍ପ୍ୟୁଟର ଆଧାରିତ ପରୀକ୍ଷା (ସିବିଟି) କଠୋର ତତ୍ତ୍ୱାବଧାନରେ କରାଯାଇଥିଲାବେଳେ ପ୍ରାର୍ଥୀଙ୍କ ସତ୍ୟତା ନିଶ୍ଚିତ କରିବାକୁ ୯୨% ପ୍ରାର୍ଥୀଙ୍କ ପାଇଁ ଆଧାର ଆଧାରିତ ପରିଚୟ ଯାଞ୍ଚ କରାଯାଇଥିଲା। ଏପରିକି ମୋଟ ୧୮,୭୯୯ ପଦବୀ ପାଇଁ ୧୮.୪ ଲକ୍ଷ ଆଶାୟୀ ପ୍ରାର୍ଥୀ ଆବେଦନ କରିଥିଲେ।