ଭୁବନେଶ୍ୱର,୨୯ା୧୦: ଓଡ଼ିଶାର ପର୍ଯ୍ୟଟନ କ୍ଷେତ୍ରକୁ ବିଶ୍ୱସ୍ତରୀୟ କରିବା ପାଇଁ ରାଜ୍ୟ ସରକାର ଆବଶ୍ୟକ ପଦକ୍ଷେପ ସାଙ୍ଗକୁ ଜାତୀୟସ୍ତରର ଭିତ୍ତିଭୂମି ମଧ୍ୟ ପ୍ରସ୍ତୁତ କରୁଥିବା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କହିଛନ୍ତି। ଓଡ଼ିଶା ସରକାରଙ୍କ ପର୍ଯ୍ୟଟନ ବିଭାଗ ଏବଂ ଶିଳ୍ପ ସଂଘ ଫିକିର ମିଳିତ ସହଯୋଗରେ ଶୁକ୍ରବାରଠାରୁ ଆରମ୍ଭ ହୋଇଥିବା ୩ ଦିନିଆ ଓଡ଼ିଶା ଟ୍ରାଭେଲ ବଜାର-୨୦୨୨କୁ ଉଦ୍ଘାଟନ କରି ମୁଖ୍ୟମନ୍ତ୍ରୀ କହିଛନ୍ତି, ସରକାର ୧୭ଟି ପ୍ରମୁଖ ଅଗ୍ରାଧିକାର ପର୍ଯ୍ୟଟନ କ୍ଷେତ୍ର ଚିହ୍ନଟ କରିଛନ୍ତି। ସେଥିରେ ବେଳାଭୂମି, ଜୈବ ବିବିଧତା ଅଞ୍ଚଳ, ଐତିହାସିକ ସ୍ଥାପତ୍ୟ,ଧାର୍ମିକ ଓ ସାଂସ୍କୃତିକ ଗୁରୁତ୍ୱ ବହନ କରୁଥିବା ସ୍ଥାନଗୁଡିକ ସାମିଲ ରହିଛି। ଏହା ସବୁବର୍ଗଙ୍କୁ ଏକ ସ୍ବତନ୍ତ୍ର ପର୍ଯ୍ୟଟନ ଅନୁଭୂତି ପ୍ରଦାନ କରିବ। ବିଶେଷକରି ପର୍ଯ୍ୟଟନ ଅନୁଭବକୁ ଆହୁରି ସମୃଦ୍ଧ କରିବା ଲାଗି ବୋଟ୍ ପର୍ଯ୍ୟଟନ, କ୍ୟାମ୍ପିଂ,ଐତିହାସିକ ରାଜପ୍ରାସାଦରେ ରହଣି, ଜଳଭିତ୍ତିକ ପର୍ଯ୍ୟଟନ ଆଦି କ୍ଷେତ୍ରରେ ମଧ୍ୟ ନିବେଶ କରାଯାଉଛି ଏବଂ ତାହାକୁ ସଂସ୍ଥାର ରୂପ ପ୍ରଦାନ କରିବାକୁ ମଧ୍ୟ ଉଦ୍ୟମ କରାଯାଉଛି ବୋଲି ନବୀନ ମତବ୍ୟକ୍ତ କରିଛନ୍ତି। ସେହିଭଳି ପର୍ଯ୍ୟଟନ କ୍ଷେତ୍ର ଲାଗି ସରକାର ମାଷ୍ଟର ପ୍ଲାନ୍ ଭିତ୍ତିକ ବିକାଶ ଉପରେ ଗୁରୁତ୍ୱ ଦେଉଛନ୍ତି। ଏହା ରାଜ୍ୟକୁ ଉତ୍କୃଷ୍ଟ ବ୍ରାଣ୍ଡ୍,ବ୍ୟବସାୟ କାର୍ଯ୍ୟରେ ଭ୍ରମଣ କରୁଥିବା ବ୍ୟକ୍ତି ଏବଂ ଉତ୍କୃଷ୍ଟ ଆତିଥେୟତା ଖୋଜୁଥିବା ବିଶ୍ୱର ବିଭିନ୍ନ ପ୍ରାନ୍ତର ଲୋକମାନଙ୍କୁ ଆକୃଷ୍ଟ କରିବ। ଏହି ପରିପ୍ରେକ୍ଷୀରେ ନବୀନ ପଟ୍ଟନାୟକ ଟୁର୍ ଅପରେଟରମାନଙ୍କୁ କହିଛନ୍ତି, ବର୍ତ୍ତମାନ ଭାରତର ସବୁଠୁ ଚଳଚଞ୍ଚଳ ରାଜ୍ୟ ମଧ୍ୟରୁ ଓଡ଼ିଶା ଅନ୍ୟତମ, ଯେଉଁଠାରେ ବହୁତ କିଛି ଘଟଣା ଘଟୁଛି। ସେଥିପାଇଁ ଏହି ସୁନ୍ଦର ରାଜ୍ୟରେ ସକ୍ରିୟ ଯୋଗଦାନ କରିବା ଲାଗି ସେ ସେମାନଙ୍କୁ ଆମନ୍ତ୍ରଣ କରିଛନ୍ତି। ପ୍ରଦର୍ଶନୀର ପ୍ରାରମ୍ଭିକ କାର୍ଯ୍ୟକ୍ରମକୁ ପର୍ଯ୍ୟଟନ ମନ୍ତ୍ରୀ ଅଶ୍ୱିନୀ ପାତ୍ର ଉଦ୍ଘାଟନ କରିଥିଲେ। ଅନ୍ୟମାନଙ୍କ ମଧ୍ୟରେ ଓଡ଼ିଶା ସରକାରଙ୍କ ପର୍ଯ୍ୟଟନ ବିଭାଗର ପ୍ରମୁଖ ସଚିବ ସୁରେନ୍ଦ୍ର କୁମାର,ବିଭାଗୀୟ ନିର୍ଦ୍ଦେଶକ ସଚିନ ରାମଚନ୍ଦ୍ର ଯାଦବ,ବିଭାଗୀୟ ଓଏସ୍ଡି ଅଂଶୁମାନ ରଥଙ୍କ ସମେତ ଫିକିର ଟ୍ରାଭେଲ,ପର୍ଯ୍ୟଟନ ଓ ଆତିଥେୟତା କମିଟିର ସହ ଅଧ୍ୟକ୍ଷ ଏବଂ ସ୍ବସ୍ତି ହୋଟେଲ୍ସର ସିଏମ୍ଡି ଜେ. କେ. ମହାନ୍ତି ପ୍ରମୁଖ ଉପସ୍ଥିତ ଥିଲେ।