ବିଶ୍ୱ ପ୍ରାଣୀଧନ ସମାଜ ପକ୍ଷରୁ ପ୍ରଥମଥର ପାଇଁ ୨୦୦୦ ମସିହାରେ ଓ୍ବାଲର୍ହ ଭେଟେରିନାରି ଡେ’ ବା ‘ବିଶ୍ୱ ପ୍ରାଣୀଧନ ଦିବସ’ ପାଳନ ଆରମ୍ଭ ହୋଇଥିଲା। ଏ ସମ୍ପର୍କରେ ଓଡ଼ିଶା କୃଷି ବୈଷୟିକ ବିଶ୍ୱବିଦ୍ୟାଳୟ (ଓୟୁଏଟି) ଅଧୀନସ୍ଥ ପ୍ରାଣୀ ପ୍ରଜନନ ଏବଂ ପ୍ରସୂତି ବିଭାଗର ସହକାରୀ ପ୍ରାଧ୍ୟାପକ ଡା. ହିମାଂଶୁ ବେହେରା କହନ୍ତି, ”ସମଗ୍ର ବିଶ୍ୱରେ ପ୍ରାଣୀ ଚିକିତ୍ସା କାର୍ଯ୍ୟକୁ ପ୍ରୋତ୍ସାହିତ କରିବା ପାଇଁ ଏହି ଦିବସ ପାଳନ କରାଯାଇଥାଏ। ଏହା ପ୍ରତିବର୍ଷ ଏପ୍ରିଲ ଶେଷ ଶନିବାର ଦିନ ପାଳିତ ହୋଇଥାଏ। ଏହି କ୍ରମରେ ଏବର୍ଷ ଏପ୍ରିଲ ୨୯ରେ ପାଳିତ ହେଉଅଛି। ଚଳିତ ବର୍ଷ ଏହି ଦିବସର ଥିମ୍ ରହିଛି, ‘ପ୍ରାଣୀ ଚିକିତ୍ସା ବୃତ୍ତିରେ ବିବିଧତା, ସମାନତା ଏବଂ ଅନ୍ତର୍ଭୁକ୍ତିକୁ ପ୍ରୋତ୍ସାହିତ କରିବା।’ ଏହାଦ୍ୱାରା ପ୍ରାଣୀ ଚିକିତ୍ସା ଏବଂ ପ୍ରାଣୀ ପାଳନ କ୍ଷେତ୍ରରେ ଅଗ୍ରଣୀ ହୋଇପାରିବା। ମନୁଷ୍ୟ ପରି ପ୍ରାଣୀମାନଙ୍କର ଅଧିକାରକୁ ଶ୍ରେୟ ଦେବା ଆମ ସମସ୍ତଙ୍କର କର୍ତ୍ତବ୍ୟ। ସେଥିପାଇଁ ମହାତ୍ମା ଗାନ୍ଧୀ କହିଛନ୍ତି-‘ପ୍ରାଣୀମାନଙ୍କର ପ୍ରଗତି, ଦେଶର ମହାନତା ମାପ କରିବାର ମୂଳମନ୍ତ୍ର।
ସର୍ବଦା ମନୁଷ୍ୟ, ପ୍ରାଣୀ ଏବଂ ପରିବେଶର ସ୍ବାସ୍ଥ୍ୟ ସଙ୍ଗଠନରେ ଏକ ସ୍ବାସ୍ଥ୍ୟ ଧାରଣା ହୋଇଥାଏ, ଯାହାକି ଏକ ପ୍ରକାରର ସହଯୋଗୀ, ବହୁମୁଖୀ ଏବଂ ବିଭିନ୍ନ ପ୍ରକାରର ବିଷୟବସ୍ତୁର ଆଭିମୁଖ୍ୟ। ତା’ସହ ଏଭଳି ଏକ ସ୍ବାସ୍ଥ୍ୟ ଧାରଣାରେ ପ୍ରାଣୀମାନଙ୍କର ସ୍ବାସ୍ଥ୍ୟ ଏବଂ ପ୍ରାଣୀ ଉତ୍ପାଦନର ଗୁରୁତ୍ୱ ବା ଭୂମିକା ରହିଅଛି। ତେଣୁ ଏହି ପରିପ୍ରେକ୍ଷୀରେ ଆମେ ସମସ୍ତେ ମିଳିତ ଭାବେ ପ୍ରାଣୀ ପାଳନ ଏବଂ ପ୍ରାଣୀ ଚିକିତ୍ସାକୁ ଯଥାସମ୍ଭବ ଅଗ୍ରସର କରିବା। ସମସ୍ତ ବିଦ୍ୟାଳୟ ଏବଂ ମହାବିଦ୍ୟାଳୟରେ ପ୍ରାଣୀ ପାଳନର ଆବଶ୍ୟକତା ଏବଂ ମହାନତାକୁ ମଧ୍ୟ ପ୍ରାଧାନ୍ୟ ଦେବା ଆବଶ୍ୟକ। ପ୍ରାଣୀ ପାଳନ ଦିଗରେ ଦେଶ ଏବଂ ରାଜ୍ୟ ସରକାରଙ୍କ ସମସ୍ତ ଯୋଜନାକୁ କାର୍ଯ୍ୟକାରୀ କରିବା ନାଗରିକ ଭାବେ ଆମମାନଙ୍କର ପ୍ରଥମ କର୍ତ୍ତବ୍ୟ। ତା’ସହ ପ୍ରାଣୀ ପାଳନ କରୁଥିବା ଚାଷୀମାନଙ୍କୁ ମଧ୍ୟ ଆମେ ସମ୍ମାନ କରିବା ଜରୁରୀ।“