କ୍ୱିଭ୍, ୧।୭ : ତିନି ମାସରୁ ଅଧିକ ସମୟ ଧରି ରୁଷିଆ ଆକ୍ରମଣ ସହ ସଂଗ୍ରାମ କରୁଥିବା ୟୁକ୍ରେନ କୃଷ୍ଣ ସାଗରରେ ଏକ ଗୁରୁତ୍ୱପୂର୍ଣ୍ଣ ବିଜୟ ହାସଲ କରିଛି। ୟୁକ୍ରେନ୍ ଦ୍ୱାରା ରୁଷିଆ ଯୁଦ୍ଧ ଜାହାଜ ଏବଂ ନୌସେନା ବେସ ଉପରେ ଲଗାତାର ଆକ୍ରମଣ ହେବାରୁ ବାଧ୍ୟ ହୋଇ ରୁଷୀୟ ସୈନ୍ୟ ମାନେ କୃଷ୍ଣ ସାଗରର ସ୍ନେକ ଦ୍ୱୀପକୁ ଖାଲି କରିଛନ୍ତି। ଏହା ଦ୍ୱାରା ଏଣିକି ୟୁକ୍ରେନ ବନ୍ଦରରୁ ରପ୍ତାନି ଉପରେ ଜାରି ରହିଥିବା ରୁଷିଆର ଅବରୋଧ ଶେଷ ହେବାର ଆଶା ରହିଛି।
ଅପରପକ୍ଷରେ ରୁଷିଆ ଦାବି କରିଛି ଯେ ଏହା ସ୍ନେକ ଦ୍ୱୀପକୁ ଜାଣିଶୁଣି ସଦ୍ଭାବନା ସ୍ଥାପନ କରିବା ଉଦ୍ଦେଶ୍ୟରେ ଖାଲି କରିଛି। ଇତିମଧ୍ୟରେ ୟୁକ୍ରେନକୁ ସାମରିକ ସହଯୋଗ ଭାବରେ ଆମେରିକା ଅତିରିକ୍ତ ୮୦୦ ମିଲିୟନ ଡଲାର ସହାୟତା ଘୋଷଣା କରିଛି।
ୟୁକ୍ରେନରେ ମାନବିକ ସହାୟତା କାର୍ଯ୍ୟକ୍ରମରେ ହସ୍ତକ୍ଷେପ ନକରିବା ପାଇଁ ରୁଷିଆର ବୈଦେଶିକ ମନ୍ତ୍ରଣାଳୟ ଏହି ଦ୍ୱୀପରୁ ସନ୍ୟଙ୍କୁ ପ୍ରତ୍ୟାହାର କରୁଛି ବୋଲି କହିଛି।
ୟୁକ୍ରେନ ରାଷ୍ଟ୍ରପତି ଭୋଲୋଡିମିର ଜେଲେନସ୍କିଙ୍କ ଚିଫ୍ ଅଫ ଷ୍ଟାଫ ଆନ୍ଦ୍ରେୟ ୟେରମାକ ଟୁଇଟ କରି କହିଛନ୍ତି, ଆର୍ଟିଲିରି ଏବଂ କ୍ଷେପଣାସ୍ତ୍ର ଆକ୍ରମଣ ଯୋଗୁ ରୁଷିଆ ସୈନ୍ୟମାନଙ୍କୁ ପଳାୟନ କରିବାକୁ ପଡିଛି।
