ନୂଆଦିଲ୍ଲୀ,୨୬।୫: ବିଶ୍ୱରେ ସର୍ବାଧିକ ପାମ୍ ତୈଳ ଆମଦାନୀ କରୁଥିବା ଭାରତ ଅନେକ ମାତ୍ରାରେ ଏହା ହ୍ରାସ କରିବା ସମ୍ଭାବନା ଦେଖାଦେଇଛି। ଡିଲରମାନଙ୍କ ପକ୍ଷରୁ ଦିଆଯାଇଥିବା ସୂଚନା ଅନୁସାରେ ଭାରତର ପାମ୍ ତୈଳ ଆମଦାନୀରେ ୧୯% ହ୍ରାସ ଘଟି ୧୧ ବର୍ଷରେ ସର୍ବନିମ୍ନ ସ୍ତରରେ ପହଞ୍ଚିପାରେ। ବର୍ତ୍ତମାନ ସୋୟା ତୈଳ ଶସ୍ତା ହୋଇଥିବା ସହ ଇଣ୍ଡୋନେସିଆର ପାମ୍ ତୈଳ ରପ୍ତାନି ଉପରେ କଟକଣା କାରଣରୁ ଏଭଳି ପରିସ୍ଥିତି ଦେଖାଦେଇଛି। ସରକାରଙ୍କର ସୋୟା ତୈଳର ଡ୍ୟୁଟି ଫ୍ରି ଆମଦାନୀର ଅନୁମତି କାରଣରୁ ସୋୟାବିନ୍ ତୈଳର ବଜାର ଭାଗୀଦାରି ବୃଦ୍ଧି ଘଟିବା ସମ୍ଭାବନା ଦେଖାଦେଇଛି। ବିଶ୍ୱର ସର୍ବବୃହତ୍ ଭେଜିଟେବଲ୍ ଅଏଲ୍ ଆମଦାନୀକାରୀ ପକ୍ଷରୁ ପାମ୍ ତୈଳ କ୍ରୟ ହ୍ରାସ ଦ୍ୱାରା ମାଲେସିଆର ପାମ୍ ତୈଳ ଦର ଉପରେ ପ୍ରଭାବ ପଡ଼ିପାରେ।
ଭାରତ ସୋୟାବିନ୍ ତୈଳ ଆମଦାନୀରେ ଆଖିଦୃଶିଆ ବୃଦ୍ଧି କରିବା ସହ ଆମେରିକାର ସୋୟାବିନ୍ ତୈଳ ଦରକୁ ସମର୍ଥନ କରିପାରେ। ଗଣମାଧ୍ୟମ ସୂଚନା ଅନୁସାରେ ଅକ୍ଟୋବର ୩୧ରେ ଶେଷ ହେବାକୁ ଥିବା ମାର୍କେଟିଂ ବର୍ଷ ୨୦୨୧-୨୨ରେ ଦେଶର ପାମ୍ ତୈଳ ଆମଦାନୀ ହ୍ରାସ ଘଟି ୬.୭ ମିଲିୟନ ଟନ୍ ରହିପାରେ। ୨୦୧୦-୧୧ ବର୍ଷ ପରେ ଏହି ଆମଦାନୀ ହାର ସର୍ବନିମ୍ନ । ଏହାଛଡ଼ା ତୈଳ ଡିଲରମାନଙ୍କ ସୂଚନା ଅନୁସାରେ ଚଳିତ ବର୍ଷ ସୋୟାବିନ୍ ତୈଳ ଆମଦାନୀରେ ପୂର୍ବ ବର୍ଷ ଅପେକ୍ଷା ୫୭% ବୃଦ୍ଧି ଘଟି ୪୫ଲକ୍ଷ ଟନ୍ରେ ପହଞ୍ଚିପାରେ। ସୂଚନାଯୋଗ୍ୟ, କେନ୍ଦ୍ର ସରକାର ମଙ୍ଗଳବାର ରନ୍ଧନ ତୈଳ ଦର ଉପରେ ଲଗାମ ଲଗାଇବା ପାଇଁ ଚଳିତ ଆର୍ଥିକ ବର୍ଷ ଏବଂ ଆଗାମୀ ଆର୍ଥିକ ବର୍ଷରେ ଅଶୋଧିତ ସୋୟାବିନ୍ ତୈଳ ଏବଂ ଅଶୋଧିତ ସୂର୍ଯ୍ୟମୁଖୀ ତୈଳ ୨-୨ ମିଲିୟନ ଟନ୍ ଡ୍ୟୁଟି ଫ୍ରି ଆମଦାନୀର ଅନୁମତି ଦେଇଛନ୍ତି। ଡ୍ୟୁଟି ଷ୍ଟ୍ରକ୍ଚର ସୋୟାବିନ୍ ତୈଳ କ୍ରୟକୁ ପାମ୍ ତୈଳଠାରୁ ଅଧିକ ଆକର୍ଷକ କରିଦେଇଥିବା ଭେଜିଟେବଲ ଅଏଲ୍ ବ୍ରୋକ୍ରେଜ ଏବଂ କନ୍ସଲ୍ଟାନ୍ସି ଫାର୍ମ ସନ୍ବିନ୍ ଗ୍ରୁପ୍ର ମୁଖ୍ୟ ଚିଫ୍ ଏକ୍ଜିକ୍ୟୁଟିଭ୍ ସନ୍ଦୀପ ବାଜୋରିଆ କହିଛନ୍ତି।