ଶାସନରେ ସୁଧାର ଲକ୍ଷ୍ୟ, ୭୭ ମନ୍ତ୍ରୀଙ୍କୁ ୮ ଦଳରେ ବାଣ୍ଟିଲେ ପ୍ରଧାନମନ୍ତ୍ରୀ…

ନୂଆଦିଲ୍ଲୀ,୧୫।୧୧: ଦେଶର ଶାସନବ୍ୟବସ୍ଥାରେ ସୁଧାର ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କେନ୍ଦ୍ର ମନ୍ତ୍ରୀ ପରିଷଦ ସହିତ ପାଞ୍ଚଟି ’ଚିନ୍ତନ ଶିବିର’ରେ ଯୋଗଦେଥିଲେ। ଏହି ଶିବିର ଚାରି ଘଣ୍ଟାରୁ ଅଧିକ ସମୟ ଧରି ଚାଲିଥିଲା। ଏଥିରେ ମନ୍ତ୍ରୀମାନେ ଉପସ୍ଥାପନା କରିଥିବା ବିଭିନ୍ନ ପ୍ରସଙ୍ଗରେ ବିଚାର ବିମର୍ଷ କରି ପ୍ରଧାନମନ୍ତ୍ରୀ ସ୍ବତନ୍ତ୍ର ପଦକ୍ଷେପ ଗ୍ରହଣ କରିଛନ୍ତି। ସୂତ୍ରରୁ ପ୍ରକାଶ ଯେ ୭୭ ମନ୍ତ୍ରୀଙ୍କୁ ଆଠଟି ଦଳରେ ବିଭକ୍ତ କରାଯାଇଛି। ସେଥିମଧ୍ୟରୁ ପ୍ରତ୍ୟେକଙ୍କ ପାଇଁ ଜଣେ ଜଣେ ସମନ୍ବୟକ ଚୟନ କରାଯାଇଛି। ପ୍ରଥମ ଶିବିରରେ କେନ୍ଦ୍ର ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଏବଂ ମନସୁଖ ମାଣ୍ଡବ୍ୟ ବ୍ୟକ୍ତିଗତ ଦକ୍ଷତା ଉପରେ ଉପସ୍ଥାପନା କରିଥିଲେ, ଦ୍ୱିତୀୟରେ ପୀୟୁଷ ଗୋୟଲ ଏବଂ ଗଜେନ୍ଦ୍ର ଶେଖୱାତଙ୍କ ନେତୃତ୍ୱରେ ଅନ୍ୟ ମନ୍ତ୍ରୀମାନେ ହାର୍ଦ୍ଦିକ ସିଂ ପୁରୀ, ଅନୁରାଗ ସିଂ ଠାକୁର ଏବଂ ପ୍ରହ୍ଲାଦ ଯୋଶୀ ପ୍ରମୁଖ ଉପସ୍ଥିତ ଥିଲେ।

ଏହି ସମସ୍ତ ଶିବିରରେ ମୁଖ୍ୟତଃ ମୋଦି ସରକାରଙ୍କ ଦକ୍ଷତା ଏବଂ ବିତରଣ ବ୍ୟବସ୍ଥାରେ ଉନ୍ନତି ଆଣିବା ଉପରେ ଧ୍ୟାନ ଦିଆଯାଇଥିଲା। ସ୍ମୃତି ଇରାନୀ ସମସ୍ତ ୮ଟି ଦଳର ନେତୃତ୍ୱ ନେବେ। ସେ ସମସ୍ତ ମନ୍ତ୍ରଣାଳୟକୁ ଆବଶ୍ୟକ ସୂଚନା ଦେବେ। ମାଣ୍ଡବ୍ୟ କାର୍ଯ୍ୟାଳୟ ତଦାରଖ ପ୍ରଣାଳୀ ଉପରେ ଧ୍ୟାନ ଦେବେ ଏବଂ ହରଦୀପ୍‌ ପୁରୀ ଶିକ୍ଷଣ ଗୋଷ୍ଠୀର ନେତୃତ୍ୱ ନେବେ। ଅନୁରାଗ ସିଂ ଠାକୁର ଅନ୍ୟମାନଙ୍କ କାର୍ଯ୍ୟର ସମୀକ୍ଷା କରିବେ। ସେହିପରି ପୀୟୁଷ ଗୋୟଲ, ଧର୍ମେନ୍ଦ୍ର ପ୍ରଧାନ, ନରେନ୍ଦ୍ର ସିଂ ତୋମାର ଏବଂ ପ୍ରହ୍ଲାଦ ଯୋଶୀଙ୍କ ନେତୃତ୍ୱରେ ଅନ୍ୟାନ୍ୟ ଦଳ ଗଠନ କରାଯାଇଛି।

ପ୍ରତ୍ୟେକ ମନ୍ତ୍ରୀଙ୍କ କାର୍ଯ୍ୟାଳୟରେ ଏକ ପୋର୍ଟାଲ ବିକାଶିତ କରାଯିବ। ଯାହା କେନ୍ଦ୍ରର ପ୍ରମୁଖ ଯୋଜନା ଏବଂ ନୀତିଗୁଡିକର କାର୍ଯ୍ୟଦକ୍ଷତା ଉପରେ ଅପଡେଟ୍‌ ସୂଚନା ପ୍ରଦାନ କରିବ। ସମ୍ପୃକ୍ତ ମନ୍ତ୍ରୀମାନଙ୍କ ଦ୍ୱାରା ନିଆଯାଇଥିବା ନିଷ୍ପତ୍ତି ଉପରେ ନଜର ରଖିବା ପାଇଁ ଏକ ଡ୍ୟାସବୋର୍ଡ ଏବଂ ବୈଠକ ନିର୍ଦ୍ଧାରଣ ଏବଂ ଚିଠି ପରିଚାଳନା ପାଇଁ ଏକ ବ୍ୟବସ୍ଥା ମଧ୍ୟ ଗଠନ କରାଯାଇଛି।

ସମସ୍ତ ଜିଲା, ରାଜ୍ୟ ତଥା ମନ୍ତ୍ରଣାଳୟର ପ୍ରୋଫାଇଲ ପ୍ରସ୍ତୁତ କରିବାକୁ ଏବଂ ହିତାଧିକାରୀଙ୍କ କାର୍ଯ୍ୟକ୍ରମକୁ ବିକଶିତ କରିବାକୁ ମନ୍ତ୍ରୀମାନଙ୍କୁ ମଧ୍ୟ କୁହାଯାଇଛି। ଅନୁସନ୍ଧାନ, ଯୋଗାଯୋଗ ଏବଂ ଅନ୍ୟାନ୍ୟ ପ୍ରମୁଖ କ୍ଷେତ୍ର ଉପରେ ଅତି କମରେ ତିନିଜଣ ଯୁବ ବୃତ୍ତିଗତଙ୍କ ଏକ ଦଳ ଗଠନ ପାଇଁ କୁହାଯାଇଛି।

‘ସାବକା ସାଥ, ସବକା ବିକାଶ, ସାବକା ବିଶ୍ୱାସ’ ନୀତି ଆପଣେଇ ମୋଦି ସରକାର ଆଗକୁ ବଢ଼ିିବାକୁ ଚାହୁଁଛନ୍ତି। କ୍ୟାବିନେଟରେ ନୂଆ ଭାବେ ସାମିଲ ହୋଇଥିବା ମନ୍ତ୍ରୀମାନଙ୍କ ପାଇଁ ଏହି ଚିନ୍ତନ ଶିବିରଗୁଡ଼ିକ ବେଶ୍‌ ଗୁରୁତ୍ୱପୂର୍ଣ୍ଣ ବୋଲି କୁହାଯାଉଛି।

ସଂସଦର ଗତ ମୌସୁମୀ ଅଧିବେଶନରେ ପ୍ରଧାନମନ୍ତ୍ରୀ ପ୍ରଥମ ଥର ପାଇଁ ରାଜ୍ୟସଭାରେ ସମୟ ବିତାଇବା ସହିତ ଗୃହରେ ବିତର୍କ ଶିଖିବାକୁ ମନ୍ତ୍ରୀମାନଙ୍କୁ କହିଥିଲେ। ଗଣମାଧ୍ୟମ ସହ କଥାବାର୍ତ୍ତା କରିବା ପରିବର୍ତ୍ତେ କାର୍ଯ୍ୟ ଉପରେ ଧ୍ୟାନ ଦେବାକୁ ପ୍ରଧାନମନ୍ତ୍ରୀ ତାଙ୍କ କ୍ୟାବିନେଟ ସହକର୍ମୀଙ୍କୁ ନିର୍ଦ୍ଦେଶ ଦେଇଛନ୍ତି।