ଇସଲାମାବାଦ,୫।୩ : ତୋସାଖାନା ମାମଲାରେ ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କୁ ଗିରଫ କରିବା ପାଇଁ ପୋଲିସ ଇସଲାମାବାଦରେ ତାଙ୍କ ବାସଭବନରେ ପହଞ୍ଚିଛି। ପାକିସ୍ତାନ ଗଣମାଧ୍ୟମ ଅନୁସାରେ ଇମ୍ରାନଙ୍କୁ ଗିରଫ କରିବା ପାଇଁ ପୋଲିସର ପାଖରେ ୱାରେଣ୍ଟ ଥିବା କୁହାଯାଉଛି। ଇମ୍ରାନଙ୍କ ଘର ବାହାରେ ତାଙ୍କ ସମର୍ଥକଙ୍କ ସମାବେଶ ହୋଇଛି। ପୋଲିସ ସହ ସମର୍ଥକମାନେ ମୁହାଁମୁହିଁ ହୋଇଛନ୍ତି।
ପାକିସ୍ତାନ ତେହେରିକ-ଇ-ଇନସାଫ ନେତା ଫୱାଦ ଖାନ କହିଛନ୍ତି ଯେ ପୋଲିସ ଏବଂ ସରକାର ପରିସ୍ଥିତିକୁ ଠିକ ଭାବରେ ବୁଝିବା ଉଚିତ। ଇମ୍ରାନଙ୍କ ଗିରଫଦାରୀ ସହିତ ଅବସ୍ଥା ଆହୁରି ଖରାପ ହୋଇପାରେ। ସେ କହିଛନ୍ତି ମୁଁ ପାକିସ୍ତାନ ବିରୋଧୀ ସରକାରଙ୍କୁ ଚେତାବନୀ ଦେଇଛି। ସରକାର ଏବଂ ପ୍ରଶାସନ ପାକିସ୍ତାନକୁ ଅସୁବିଧାରେ ପକାଇବା ଉଚିତ ନୁହେଁ। ଜମାନ ପାର୍କରେ ପହଞ୍ଚିବା ପାଇଁ ସେ ଦଳର କର୍ମୀଙ୍କୁ ଅପିଲ କରିଛନ୍ତି।
ସୂଚନାଯୋଗ୍ୟ, ଅର୍ଥ ହେରଫେର ମାମଲାରେ ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କ ବିରୋଧରେ ଏକ ପାକିସ୍ତାନୀ କୋର୍ଟ ଜାମିନ ବିହୀନ ୱାରେଣ୍ଟ ଜାରି କରିଥିଲେ। ଅପରପକ୍ଷରେ ଅନ୍ୟ ଦୁଇଟି ମାମଲାରେ କୋର୍ଟଙ୍କ ପକ୍ଷରୁ ତାଙ୍କୁ ଜାମିନ ପ୍ରଦାନ କରାଯାଇଥିଲା। ସେ ତିନୋଟି ମାମଲାରେ ଫେଡେରାଲ ଇନଭେଷ୍ଟିଗେଶନ ଏଜେନ୍ସି କୋର୍ଟରେ ହାଜର ହୋଇଥିଲେ। ଅର୍ଥ ହେରଫେର ମାମଲାରେ ଇମ୍ରାନଙ୍କ ବିରୋଧରେ ଅତିରିକ୍ତ ସେସନ୍ସ ଜଜ ଜାଫର ଇକବାଲ ଜାମିନ ବିହୀନ ଗିରଫ ପରୱାନା ଜାରି କରି ସେ କୋର୍ଟରେ ହାଜର ହୋଇ ନ ଥିବାରୁ ମାର୍ଚ୍ଚ ୭ ପର୍ଯ୍ୟନ୍ତ ଶୁଣାଣି ସ୍ଥଗିତ ରଖିଥିଲେ।
ତାଙ୍କ ଅନୁପସ୍ଥିତି କାରଣରୁ ଏହି ମାମଲାରେ ତାଙ୍କ ଅଭିଯୋଗ ପୂର୍ବରୁ ଦୁଇଥର ସ୍ଥଗିତ ରଖାଯାଇଥିଲା। ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାନ ଦାମୀ ଗ୍ରାଫ ହାତଘଣ୍ଟା ସମେତ ଉପହାର କିଣିବା ନେଇ ବିବାଦ ଘେରରେ ରହିଛନ୍ତି, ଯାହାକୁ ସେ ତୋସାଖାନା ନାମକ ଏକ ରାଜ୍ୟ ଜମା ବିଭାଗଠାରୁ ରିହାତି ମୂଲ୍ୟରେ ପ୍ରଧାନମନ୍ତ୍ରୀ ଭାବରେ ଗ୍ରହଣ କରିଥିଲେ ଏବଂ ଲାଭରେ ବିକ୍ରି କରିଥିବା ଅଭିଯୋଗ ହୋଇଥିଲା।