ଇସଲାମାବାଦ,୭।୫: ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାନ କ୍ଷମତାରୁ ହଟାଯିବା ପରେ ନୂଆ ନୂଆ ଦାବି କରୁଛନ୍ତି। ବର୍ତ୍ତମାନ ସେ ଆଇଏସଆଇର ବରିଷ୍ଠ ଅଧିକାରୀ ମେଜର ଜେନେରାଲ ଫୈସଲ ନାସିରଙ୍କ ବିରୋଧରେ ଗୁରୁତର ଅଭିଯୋଗ ଆଣିଛନ୍ତି। ବରିଷ୍ଠ ଖବରଦାତା ଅରଶଦ ଶରିଫଙ୍କ ହତ୍ୟାରେ ଫୈସଲ ନାସିର ସମ୍ପୃକ୍ତ ଥିବା ପିଟିଆଇ ମୁଖ୍ୟ ଦାବି କରିଛନ୍ତି। ସେ କହିଛନ୍ତି, ଆଇଏସଆଇ ଅଧିକାରୀ ମେଜର ଜେନେରାଲ ଫୈସଲ ନାସିର ତାଙ୍କୁ ଦୁଇଥର ହତ୍ୟା କରିବାକୁ ଚେଷ୍ଟା କରିଥିଲେ। ଲାହୋରର ଏକ ରାଲିରେ ସମ୍ବୋଧିତ କରିବା ସମୟରେ ଏହି ବିବୃତ୍ତି ଦେଇଥିଲେ ଇମ୍ରାନ। ସେ ଆହୁରି କହିଛନ୍ତି, ମେଜର ଜେନେରାଲ ଫୈସଲ ନାସିରମୋତେ ଦୁଇଥର ହତ୍ୟା କରିବାକୁ ଚେଷ୍ଟା କରିଥିଲେ। ଏଥିସହ ଅରଶଦ ଶରିଫଙ୍କ ହତ୍ୟାରେ ମଧ୍ୟ ଜଡିତ ଅଛନ୍ତି।
ସୂଚନାଯୋଗ୍ୟ, କେନିଆରେ ଜଣେ ଖବରଦାତାଙ୍କ ହତ୍ୟା ପରେ ପାକିସ୍ତାନରେ ବ୍ୟାପକ ହିଂସା ଦେଖାଦେଇଥିଲା। ୨୩ ଅକ୍ଟୋବର ୨୦୨୨ର ବିଳମ୍ବିତ ରାତିରେ ଅରଶଦ ଶରିଫଙ୍କୁ କେନିଆ ପୋଲିସ ହତ୍ୟା କରିଥିଲା। ତେବେ ଭୁଲ ପରିଚୟ ଯୋଗୁ ତାଙ୍କୁ ଗୁଳି କରାଯାଇଥିଲା ବୋଲି ପୋଲିସ କହିଥିଲା। କିନ୍ତୁ ତାଙ୍କୁ ସୁଚିନ୍ତିତ ଭାବେ ହତ୍ୟା କରାଯାଇଥିବା ଖବରଦାତାଙ୍କ ପରିବାର ସର୍ବଦା ଅଭିଯୋଗ କରିଛନ୍ତି।