ଇସଲାମାବାଦ,୭ ।୩: ପାକିସ୍ତାନ ଗୃହମନ୍ତ୍ରୀ ରାଣା ସନାଉଳ୍ଲାହ ସୋମବାର ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାଁଙ୍କୁ ନେଇ ଏକ ବଡ ଦାବି କରିଛନ୍ତି । ସେ କହିଛନ୍ତି ଗୋଟିଏ ଦିନ ପୂର୍ବରୁ ତୋଶାଖାନା ମାମଲାରେ ଗରିଫ ହେବା ଭୟରେ ଇମ୍ରାନ ଖାଁ ଲାହୋରରେ ଥିବା ତାଙ୍କ ଘରର ପାଚେରି ଫଟାଇ ପଳାଇ ଯାଇଛନ୍ତି । ସୂଚନାଯୋଗ୍ୟ, ଇମ୍ରାନଙ୍କୁ ଗିରଫ କରିବାକୁ ରବିବାର ଇସଲାମାବାଦ ପୋଲିସ ଲାହୋର ପହଞ୍ଚିଥିଲା । ହେଲେ ଏହି ସମୟରେ ଇମ୍ରାନ ତାଙ୍କ ଘରେ ନ ଥିଲେ । ସେଠାରେ ତାଙ୍କ ଲିଗାଲ ଟିମ ଆଶ୍ୱାସନା ଦେଇଥିଲେ କି ଇମ୍ରାନ ୭ ମାର୍ଚ୍ଚରେ କୋର୍ଟରେ ଉପସ୍ଥିତ ହେବେ ।
ପାକିସ୍ତାନ ମିଡିଆର ସୂଚନା ଅନୁଯାୟୀ, ଏବେ ରାଣା ସନାଉଲ୍ଲାହ କହିଛନ୍ତି, ଇମ୍ରାନଙ୍କୁ ଗିରଫ କରିବାକୁ ପହଞ୍ଚିଥିବା ପୋଲିସ ନାକେଦମ ହୋଇଛି । ସେ ସମୟରେ ଲାହୋରରେ ନାଟକ ଭଳି ପରିସ୍ଥିତି ଉପୁଜିଥିଲା । ଏମିତିକି ଶୁଣିବାକୁ ମିଳିଥିଲା କି ଇମ୍ରାନ ଲୁଚିବା ପାଇଁ ତାଙ୍କ ପଡୋଶୀ ଘରକୁ ଚାଲିଯାଇଛନ୍ତି । କିଛି ସମୟ ପରେ ସେ ସାମ୍ନାକୁ ଆସିଥିଲେ ଓ ଏକ ବଡ ଭାଷଣ ଦେଇଥିଲେ । ମନ୍ତ୍ରୀ ଆହୁରି ମଧ୍ୟ କହିଛନ୍ତି ସତରେ ଯଦି ପୋଲିସ ଇମ୍ରାନଙ୍କୁ ଗିରଫ କରିବାକୁ ଚାହୁଁଥିଲା ତେବେ ଏହା ସଠିକ ରଣନୀତି ନ ଥିଲା ।
