ଇସଲାମାବାଦ,୮।୨ : ପାକିସ୍ତାନର ଲୋକଙ୍କୁ ଦୁଇବେଳା ରୁଟି ମିଳିବା କଷ୍ଟକର ହେବାରେ ଲାଗିଛି। ସମଗ୍ର ଦେଶ ଅର୍ଥନୈତିକ ସଙ୍କଟ ଦେଇ ଗତି କରୁଛି। ଦେଶ ଦେବାଳିଆ ପଥରେ ଅଛି। ଦେଶର ବୈଦେଶିକ ମୁଦ୍ରା ପ୍ରାୟ ଶେଷ ହୋଇଛି। ଯଦି ଋଣ ଦିଆଯାଇ ନ ଯାଏ, ତେବେ ପାକିସ୍ତାନ ଦେବାଳିଆ ହୋଇଯିବ। ଏଭଳି ପରିସ୍ଥିତିରେ ମଧ୍ୟ ନିଜ ଦେଶରେ ସଂସ୍କାର ଆଣିବା ପରିବର୍ତ୍ତେ ପାକିସ୍ତାନର ନେତାମାନେ କଶ୍ମୀରର ପ୍ରସଙ୍ଗରେ ମନ୍ତବ୍ୟ ଦେବାରେ ବ୍ୟସ୍ତ ଅଛନ୍ତି।
ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାନ କଶ୍ମୀର ସମ୍ପର୍କରେ ଏକ ବିବୃତ୍ତି ଦେଇଛନ୍ତି। ଏଥିରେ ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ କହିଛନ୍ତି ଯେ ଯେତେବେଳେ ସେ କଶ୍ମୀରର ସ୍ବତନ୍ତ୍ର ସ୍ଥିତିକୁ ପୁନଃସ୍ଥାପିତ କରିବେ ସେତେବେଳେ ଭାରତ ସହ ସମ୍ପର୍କରେ ଅଗ୍ରଗତି ହେବ। ତେବେ ଇମ୍ରାନ ଭାରତକୁ ପ୍ରଶଂସା କରିବାକୁ ଭୁଲି ନାହାଁନ୍ତି।
ଲାହୋରରେ ଥିବା ତାଙ୍କ ବାସଭବନରେ ଇମ୍ରାନ ଖାନ ବିଦେଶୀ ଗଣମାଧ୍ୟମ ସହ କଥା ହୋଇ କହିଛନ୍ତି, କଶ୍ମୀରର ସ୍ବତନ୍ତ୍ର ମାନ୍ୟତା ଭାରତ ରଦ୍ଦ କରିଦେଇଛି। ବର୍ତ୍ତମାନ ଭାରତ ସହ ଆଲୋଚନା କରିବାର ଏକମାତ୍ର ଉପାୟ ହେଉଛି ମୋଦି ସରକାର ପ୍ରଥମେ ଏହାର ପୁରୁଣା ସ୍ଥିତି ଫେରାଇ ଆଣିବା।
ଗଣମାଧ୍ୟମ ପ୍ରଶ୍ନ କରିଥିଲା ଯେ ପାକିସ୍ତାନରେ ଆଇନ ଶୃଙ୍ଖଳା ଖରାପ। ଦେଶ କିପରି ଆଗକୁ ବଢ଼ିବ? ଏହାର ଜବାବରେ ପାକିସ୍ତାନ ତେହେରିକ-ଇ-ଇନସାଫ ନେତା ଇମ୍ରାନ କହିଛନ୍ତି ଯେ ଯଦି ଆଇନର ସ୍ଥିତି ନ ରହିଲେ ପାକିସ୍ତାନର ଭବିଷ୍ୟତ ରହିବ ନାହିଁ। ସେ ଆହୁରି ମଧ୍ୟ ଭାରତର ଉଦାହରଣ ଦେଇଛନ୍ତି। କହିଛନ୍ତି, ଆଇନର ସ୍ଥିତି ସୁଦୃଢ଼ ଥିବାରୁ ଭାରତ ଆଜି ଅଗ୍ରଗତି କରୁଛି।
ଦେଶରେ ସମ୍ବିଧାନର ସୁରକ୍ଷା କରିବା ନ୍ୟାୟପାଳିକାର ଦାୟିତ୍ୱ ବୋଲି ଇମ୍ରାନ ତ୍ନ କହିଛନ୍ତି। ସେ ନିଜର ଅଯୋଗ୍ୟତା ଘୋଷଣା ଉପରେ ସରକାର, ନ୍ୟାୟପାଳିକା ଏବଂ ସେନା ମୁଖ୍ୟଙ୍କୁ ଟାର୍ଗେଟ କରିଥିଲେ। ଖାନ କହିଛନ୍ତି, ମୋତେ ରାଜନୀତିରୁ ଦୂରେଇ ରଖିବା ପାଇଁ ଏକ ବଡ଼ ଷଡଯନ୍ତ୍ର ହୋଇଥିଲା। ଦେଶର ସମସ୍ତ ଶକ୍ତିଶାଳୀ ଲୋକମାନେ ଏଥିରେ ସାମିଲ ହୋଇଥିଲେ।
ତାଙ୍କ ଅଯୋଗ୍ୟତା ପାଇଁ ସେନା ମୁଖ୍ୟ ଅସୀମ ମୁନିର ସମ୍ପୃକ୍ତ କି ନାହିଁ ବୋଲି ପଚରାଯାଇଥିବା ବେଳେ ଇମ୍ରାନ କହିଛନ୍ତି ଯେ ସେ ଦୁଇ ମାସ ଧରି ଅଫିସରେ ଅଛନ୍ତି ଏବଂ ମୁଁ ତାଙ୍କୁ ସନ୍ଦେହର କରିବାର ଆବଶ୍ୟକତା ନାହିଁ। ଖାନ ଏହା ମଧ୍ୟ ଅଭିଯୋଗ କରିଛନ୍ତି ଯେ ତାଙ୍କର ରାଜନୈତିକ ପ୍ରତିଦ୍ୱନ୍ଦ୍ୱୀ ତଥା ତିନିଥର ପ୍ରଧାନମନ୍ତ୍ରୀ ନୱାଜ ସରିଫ ତାଙ୍କୁ ଅଯୋଗ୍ୟ ଘୋଷଣା କରିବାକୁ ଚାହୁଁଛନ୍ତି। ଇମ୍ରାନ ଦାବି କରିଛନ୍ତି ଯେ ନୱାଜ ବ୍ରିଟେନରୁ ଫେରିବା ପାଇଁ ଏକ ସର୍ତ୍ତ ରଖିଛନ୍ତି ଯେ ତାଙ୍କୁ ଅଯୋଗ୍ୟ ଘୋଷିତ କରାଯାଉ।