ଇସଲାମାବାଦ୍, ୨୬।୬ :ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କୁ ହତ୍ୟା କରିବାର ଷଡଯନ୍ତ୍ରର ଗୁଜବ ମଧ୍ୟରେ ଜଣେ କର୍ମଚାରୀ ଇସଲାମାବାଦର ବେନିଗାଲା ଅଞ୍ଚଳରେ ତାଙ୍କ ଘରର ଶୋଇବା ଘରେ ଗୁପ୍ତଚର କ୍ୟାମେରା ଲଗାଇଥିବା ଅଭିଯୋଗରେ ଧରାପଡିଛନ୍ତି।
ପାକିସ୍ତାନୀ ଗଣମାଧ୍ୟମ ରିପୋର୍ଟ ଅନୁଯାୟୀ, ଏହି କର୍ମଚାରୀଙ୍କୁ ଇମ୍ରାନ ଏବଂ ସ୍ତ୍ରୀ ବୁଶାରାଙ୍କ ଶୋଇବା ଘରେ ଗୁପ୍ତଚର କ୍ୟାମେରା ଲଗାଇବା ପାଇଁ ଟଙ୍କା ଦିଆଯାଇଥିଲା। ଯେତେବେଳେ ଅନ୍ୟ ଜଣେ କର୍ମଚାରୀ ତାଙ୍କୁ କ୍ୟାମେରା ଲଗାଉଥିବାର ଦେଖିଲେ, ସେମାନେ ଇମ୍ରାନ ଖାନଙ୍କୁ ଜଣାଇଥିଲେ। ଏହା ପରେ ପୂର୍ବତନ ପ୍ରଧାନମନ୍ତ୍ରୀଙ୍କ ସୁରକ୍ଷାରେ ମୁତୟନ ଥିବା ସୁରକ୍ଷାକର୍ମୀମାନେ ତାଙ୍କୁ ଧରିଥିଲେ। ସୁରକ୍ଷା କର୍ମୀମାନେ ତାଙ୍କୁ ଫେଡେରାଲ ପୋଲିସକୁ ହସ୍ତାନ୍ତର କରିଛନ୍ତି।
ଏହି ଘଟଣା ଏପରି ଏକ ଘଟିଛି ଯେତେବେଳେ ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କୁ ହତ୍ୟା କରିବା ପାଇଁ ଷଡଯନ୍ତ୍ର ରଚାଯିବା ନେଇ ଖବର ପ୍ରସାରିକ ହେଉଛି। ସମ୍ପୃକ୍ତ ବ୍ୟକ୍ତି ଧରାଯିବା ପରେ ବେନିଗାଲା ଚାରିପାଖରେ ସୁରକ୍ଷାକୁ କଡାକଡି କରାଯାଇଛି। ଇମ୍ରାନଙ୍କ ପାର୍ଟି ପିଟିଆଇର ଅନେକ ଲୋକ ସନ୍ଦେହ କରୁଛନ୍ତି ଯେ ସେମାନଙ୍କ ନେତାଙ୍କ ଜୀବନ ବିପଦରେ।
ଇମ୍ରାନଙ୍କ ପାର୍ଟି ପିଟିଆଇର ନେତା ଶାହବାଜ ଗିଲ କହିଛନ୍ତି ଯେ କ୍ୟାମେରା ଲଗାଇବାକୁ ଉଦ୍ୟମ ବିଷୟରେ ଆମେ ସମସ୍ତ ସୁରକ୍ଷା ଏଜେନ୍ସିକୁ ସୂଚନା ଦେଇଛୁ। ଏହି ଷଡଯନ୍ତ୍ରରେ ପ୍ରଧାନମନ୍ତ୍ରୀ ଶାହବାଜ ଶରିଫ ସରକାର ମଧ୍ୟ ସମ୍ପୃକ୍ତ ବୋଲି ସେ ଅଭିଯୋଗ କରିଛନ୍ତି।
ଏକ ସାକ୍ଷାତକାରରେ ଗିଲ ଦାବି କରିଛନ୍ତି ଯେ ଇମ୍ରାନ ଖାନଙ୍କ ଘର ସଫା କରୁଥିବା ଜଣେ କର୍ମଚାରୀଙ୍କୁ ଗୁପ୍ତଚର କ୍ୟାମେରା ଲଗାଇବା ପାଇଁ ଟଙ୍କା ଦିଆଯାଇଥିଲା। ଏହା ଅତ୍ୟନ୍ତ ଘୃଣ୍ୟ ଏବଂ ଦୁର୍ଭାଗ୍ୟଜନକ। ଏହା ଏକ ଲଜ୍ଜାଜନକ ଘଟଣା ବୋଲି ସେ କହିଛନ୍ତି।
