ଇସଲାମାବାଦ୍, ୧୯।୧୦: ପାକିସ୍ତାନରେ ପ୍ରଧାନମନ୍ତ୍ରୀ ଇମ୍ରାନ୍ ଖାଁଙ୍କ ସରକାର ଲାଗି ସମସ୍ୟା ବଢ଼ିବାରେ ଲାଗିଛି। ଇମ୍ରାନ୍ଙ୍କୁ କ୍ଷମତାଚ୍ୟୁତ କରିବା ପାଇଁ ବିରୋଧୀ ଦଳଗୁଡ଼ିକ ଏକଜୁଟ ହେବାରେ ଲାଗିଛନ୍ତି। ଦେଶରେ ବିଭିନ୍ନ ସ୍ଥାନରେ ପ୍ରଦର୍ଶନ ଜାରି ରହିଛି। ବିରୋଧୀଙ୍କ ପ୍ରଦର୍ଶନରେ ବ୍ୟତିବ୍ୟସ୍ତ ହୋଇ ଇମ୍ରାନ୍ଙ୍କ ନିର୍ଦ୍ଦେଶରେ ପୂର୍ବତନ ପ୍ରଧାନମନ୍ତ୍ରୀ ନଓ୍ବାଜ ଶରିଫ୍ଙ୍କ ଜ୍ୱାଇଁ ସଫଦର ଅଓ୍ବାନଙ୍କୁ ଗିରଫ କରାଯାଇଛି। ଏକ ହୋଟେଲରୁ ତାଙ୍କୁ ପୋଲିସ ଗିରଫ କରିଛନ୍ତି। ଏସମ୍ପର୍କରେ ନଓ୍ବାଜଙ୍କ ଝିଅ ତଥା ପାକିସ୍ତାନ ମୁସଲିମ୍ ଲିଗ୍ର ଉପାଧ୍ୟକ୍ଷା ମରୀୟମ୍ ନଓ୍ବାଜ ଶରିଫ୍ ସୋମବାର ଟୁଇଟ୍ କରି ସୂଚନା ଦେଇଛନ୍ତି। ସେମାନେ ହୋଟେଲ ଥିବା ସମୟରେ ପୋଲିସ କବାଟ ଭାଙ୍ଗି ଜୋର୍ ଜବରଦସ୍ତ ରୁମ୍ରେ ପଶି ସଫଦରଙ୍କୁ ଗିରଫ କରିଥିବା ମରୀୟମ୍ କହିଛନ୍ତି। ଇମ୍ରାନ୍ଙ୍କୁ ହଟାଇବା ପାଇଁ ୧୧ଟି ରାଜନୈତିକ ଦଳ ଏକଜୁଟ ହୋଇଥିବା କୁହାଯାଉଛି। ଏହାକୁ ନେଇ ଇମ୍ରାନ୍ଙ୍କ ଚିନ୍ତା ବଢ଼ିବାରେ ଲାଗିଛି।