ନୂଆଦିଲ୍ଲୀ,୨।୧୨: ମମତା ବାନାର୍ଜୀଙ୍କ ପରେ ବର୍ତ୍ତମାନ ତାଙ୍କର ସ୍ବତନ୍ତ୍ର ନିର୍ବାଚନ ରଣନୀତିଜ୍ଞ ପ୍ରଶାନ୍ତ କିଶୋର (ପିକେ) କଂଗ୍ରେସକୁ ପୁଣି ଟାର୍ଗେଟ କରିଛନ୍ତି। ୨୦୨୪ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ବନାମ ମୁଖ୍ୟମନ୍ତ୍ରୀ ମମତା ବାନାର୍ଜୀ ରଣନୀତି ସ୍ଥିର କରୁଥିବା ପିକେ କଟାକ୍ଷ କରି କହିଛନ୍ତି ଯେ, ଗତ ୧୦ ବର୍ଷ ମଧ୍ୟରେ କଂଗ୍ରେସର ସମ୍ମୁଖୀନ ହୋଇଥିବା ୯୦ ପ୍ରତିଶତ ନିର୍ବାଚନରେ ପରାଜିତ ହୋଇଛି। କିଛି ମାସ ପୂର୍ବରୁ ପିକେ କଂଗ୍ରେସରେ ଯୋଗଦେବା ନେଇ କଳ୍ପନା ଜଳ୍ପନା ଚାଲିଥିଲା।
କିନ୍ତୁ ଯେତେବେଳେ ସେ କଂଗ୍ରେସ ନେତୃତ୍ୱ ଉପରେ ସିଧାସଳଖ ଆକ୍ରମଣ ଆରମ୍ଭ କରିଥିଲେ ସେତେବେଳେ ପିକେ କଂଗ୍ରେସରେ ଯୋଗଦେବା ନେଇ କଳ୍ପନା ଜଳ୍ପନାର ଅନ୍ତ ଘଟିଥିଲା। ପିକେ ଏହା ପୂର୍ବରୁ ରାହୁଲ ଗାନ୍ଧୀଙ୍କୁ ମଧ୍ୟ ଟାର୍ଗେଟ୍ କରି ସାରିଛନ୍ତି। ଅକ୍ଟୋବରରେ ଗୋଆରେ ଏକ କାର୍ଯ୍ୟକ୍ରମରେ ସେ କହିଥିଲେ ଯେ ଭାଜପା ଅନେକ ଦଶନ୍ଧି ଧରି କ୍ଷମତାରେ ରହିବାର ଆଶା ରହିଛି। କିନ୍ତୁ ରାହୁଲ ଗାନ୍ଧୀ ଏକଥା ଜମାରୁ ବୁଝି ପାରୁ ନାହାନ୍ତି। ସେ ଏକ ପ୍ରଶ୍ନ-ଉତ୍ତର ଅଧିବେଶନରେ ସେ କହିଥିଲେ, ଭାଜପା ଭାରତୀୟ ରାଜନୀତିର କେନ୍ଦ୍ର ହେବାକୁ ଯାଉଛି। ପିକେ କହିଥିଲେ ଯେ ଲୋକମାନେ ରାଗିଛନ୍ତି ମାତ୍ର ସେମାନେ ମୋଦିଙ୍କୁ ହଟାଇବେ ବୋଲି ଭାବନ୍ତୁ ନାହିଁ।
ସେମାନେ ମୋଦିଙ୍କୁ ହଟାଇ ପାରନ୍ତି କିନ୍ତୁ ବିଜେପି କେନ୍ଦ୍ରରୁ ହଟୁ ନାହିଁ। ଏହା ପୂର୍ବ ଭଳି ସମାନ ସ୍ଥାନରେ ରହିବ। ଗୋଟିଏ ଦିନ ପୂର୍ବରୁ ମମତା ବାନାର୍ଜୀ ମଧ୍ୟ କଂଗ୍ରେସକୁ ଟାର୍ଗେଟ କରିଥିଲେ। ମୁମ୍ବାଇରେ ଏକ କାର୍ଯ୍ୟକ୍ରମରେ ଯୋଗଦେଇ ସେ ରାହୁଲ ଗାନ୍ଧୀଙ୍କ ଉପରେ ମନ୍ତବ୍ୟ ଦେଇଥିଲେ।
ମମତା କହିଥିଲେ ଯେ ବିଦେଶରେ ଅଧା ସମୟ ଏବଂ ଦେଶରେ ଅଧା ସମୟ ରହୁଥିବା ନେତାମାନେ ଭାଜପାର ମୁକାବିଲା କରି ପାରିବେ ନାହିଁ। ସେମାନେ କିପରି ଲଢ଼େଇ କରିବେ ତାହା ଜାଣନ୍ତି ନାହିଁ। କେବଳ ଏତିକି ନୁହେଁ କଂଗ୍ରେସ ନେତୃତ୍ୱାଧୀନ ମିଳିତ ମଞ୍ଚର ଅସ୍ତିତ୍ୱକୁ ଦିଦି ଅସ୍ବୀକାର କରିଥିଲେ। ସେ କହିଥିଲେ ୟୁପିଏ କ’ଣ? ବର୍ତ୍ତମାନ କୌଣସି ୟୁପିଏ ନାହିଁ।