ଭୁବନେଶ୍ୱର, ୨୨।୩(ସୁନିତ୍ ମିଶ୍ର): ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ୨୦୧୪ରେ ଶାସନକୁ ଆସିବା ପରେ ଆଇଟି ତଥା ପ୍ରଯୁକ୍ତି ବିଜ୍ଞାନ କ୍ଷେତ୍ରରେ ଭାରତବର୍ଷରେ ଏକ ବୈପ୍ଳବିକ ପରିବର୍ତ୍ତନ ଆସିଛି। ଓଡ଼ିଶାରେ ମଧ୍ୟ ଏହାର ପ୍ରଭାବ ସ୍ପଷ୍ଟ ପରିଲକ୍ଷିତ ହେଉଛି। ୨୦୧୪ରେ ୭,୫୬୨ଟି ମୋବାଇଲ ଟାୱାର ଓଡ଼ିଶାରେ ଥିବାବେଳେ ଏବେ ପାଖାପାଖି ୪ ଗୁଣରୁ ଅଧିକ ଟାୱାର ଅର୍ଥାତ୍ ୨୭ ହଜାର ୫୧୩ଟି ବସିଛି। ସେହିପରି ବ୍ରଡ୍ ବ୍ୟାଣ୍ଡ ସଂଯୋଗ ମାତ୍ର ୬ ଲକ୍ଷରୁ କମ୍ ଥିବାବେଳେ ଆଜି ୨ କୋଟି ୩୬ ଲକ୍ଷ ଲୋକଙ୍କ ପାଖରେ ବ୍ରଡ୍ ବ୍ୟାଣ୍ଡ ସଂଯୋଗ ପହଞ୍ଚିପାରିଛି।
ଓଡ଼ିଶାର ୫୧ ହଜାର ୧୭୬ଟି ଗଁାରୁ ୪୬ ହଜାର ୮୦୧ଟି ଗଁାକୁ ଇଣ୍ଟରନେଟ୍ ସଂଯୋଗୀକରଣ କରାଯାଇଛି। ଗତ ୧୦ ବର୍ଷରେ ଓଡ଼ିଶାର ୩ ହଜାର ଆଦିବାସୀ ଗଁାରେ ଟାୱାର ସ୍ଥାପନ ହୋଇଛି ବୋଲି ଭାଜପା ବିଧାୟକ ସୂର୍ଯ୍ୟବଂଶୀ ସୂରଜ କହିଛନ୍ତି। ଭାଜପା ରାଜ୍ୟ କାର୍ଯ୍ୟାଳୟଠାରେ ଗୁରୁବାର ଅନୁଷ୍ଠିତ ଖବରଦାତା ସମ୍ମିଳନୀରେ ସୂର୍ଯ୍ୟବଂଶୀ କହିଛନ୍ତି, ଓଡ଼ିଶାର ଅନେକ ଆଦିବାସୀ ଅଞ୍ଚଳରେ ଗମନାଗମନ, ମାଲ ପରିବହନ ବ୍ୟବସ୍ଥା ବର୍ତ୍ତମାନ ସୁଦ୍ଧା ସମ୍ଭବ ହୋଇପାରିନାହିଁ। କିନ୍ତୁ ସେ ଗଁାରେ ମଧ୍ୟ ଟାୱାର ବସିଛି। ଆଇଟି ପାଇଁ ଅପାର ସମ୍ଭାବନା ଥିବା ଓଡ଼ିଶାରେ ରାଜନୈତିକ ଇଚ୍ଛାଶକ୍ତିର ଅଭାବ ଯୋଗୁ ସଂକଳ୍ପର ସିଦ୍ଧି ହୋଇପାରୁନାହିଁ ବୋଲି ସୂର୍ଯ୍ୟବଂଶୀ କହିଛନ୍ତି।
