ଖୋର୍ଦ୍ଧା ଅଫିସ,୧୩ା୧: ଖୋର୍ଦ୍ଧା ଜିଲା ଏଡ୍ସ ନିୟନ୍ତ୍ରଣ କମିଟି ବୈଠକ ମଙ୍ଗଳବାର ଜିଲାପାଳଙ୍କ ସମ୍ମିଳନୀ କକ୍ଷରେ ଅନୁଷ୍ଠିତ ହୋଇଯାଇଛି। ଏଥିରେ ଜିଲାପାଳ ସନତ ମହାନ୍ତି ଅଧ୍ୟକ୍ଷତା କରିଥିଲେ। ଜିଲାର ସମସ୍ତ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର(ସିଏଚ୍ସି)ରେ ଏଡ୍ସ ପରୀକ୍ଷା ବ୍ୟବସ୍ଥା ରହିଛି। ଚିହ୍ନଟ ରୋଗୀଙ୍କ ଚିକିତ୍ସା ଏବଂ ସାମାଜିକ ସୁରକ୍ଷା ପ୍ରତି ଗୁୁରୁତ୍ୱ ଦିଆଯାଉଛି। ସ୍ବାସ୍ଥ୍ୟକର୍ମୀଙ୍କୁ ଏଚ୍ଆଇଭି ପଜିଟିଭ୍ ଚିହ୍ନଟ ଏବଂ ସିଫିଲିସ ପରୀକ୍ଷା ଲାଗି ତାଲିମ ଏବଂ କିଟ୍ ଯୋଗାଇ ଦିଆଯିବ। ସ୍ବାସ୍ଥ୍ୟକେନ୍ଦ୍ରରେ ଆବଶ୍ୟକ ଉପକରଣ ଏବଂ ରେଫ୍ରିଜରେଟର ବ୍ୟବସ୍ଥା କରାଯାଇଛି। ଗ୍ରାମୀଣସ୍ତରରେ ଗର୍ଭବତୀଙ୍କ ସ୍ବାସ୍ଥ୍ୟ ପରୀକ୍ଷା ପ୍ରତି ଗୁୁରୁତ୍ୱ ଦିଆଯାଉଛି ବୋଲି ମୁଖ୍ୟ ଚିକିତ୍ସାଧିକାରୀ ବିଶ୍ୱରଞ୍ଜନ ପତି କହିଛନ୍ତି। ଅନ୍ୟମାନଙ୍କ ମଧ୍ୟରେ ଅତିରିକ୍ତ ସିଡିଏମ୍ଓ ଦ୍ୱାରିକାନାଥ ଶତପଥୀ, ଜନସ୍ବାସ୍ଥ୍ୟ ଅଧିକାରୀ ପ୍ରଶାନ୍ତ କୁମାର ଦାଶ, ସହକାରୀ ଜନସ୍ବାସ୍ଥ୍ୟ ସଞ୍ଚାର ଅଧିକାରୀ ପ୍ରଦ୍ୟୁମ୍ନ ମିଶ୍ରଙ୍କ ସମେତ ବିଭିନ୍ନ ବିଭାଗୀୟ ଅଧିକାରୀ ଉପସ୍ଥିତ ଥିଲେ। ଖୋର୍ଦ୍ଧା ଜିଲାରେ ୨୦୦୨ରୁ ଅକ୍ଟୋବର ୨୦୨୦ ସୁଦ୍ଧା ଏଡ୍ସରେ ୨୧୫ଜଣଙ୍କ ମୃତ୍ୟୁ ହୋଇଛି। ୨୦୦୨ରୁ ୨୦୧୯ ୧୭ବର୍ଷରେ ୨୦୦ ଜଣଙ୍କ ମୃତ୍ୟୁ ହୋଇଥିବା ବେଳେ ଗତ ଜାନୁୟାରୀରୁ ଅକ୍ଟୋବର ମଧ୍ୟରେ ୧୫ଜଣଙ୍କ ମୃତ୍ୟୁ ଘଟିଥିବା ଜିଲା ମୁଖ୍ୟ ଚିକିତ୍ସାଳୟରୁ ସୂଚନା ମିଳିଛି। ବର୍ତ୍ତମାନ ସୁଦ୍ଧା ଜିଲାର ୧୦ଟି ବ୍ଲକରେ ୧୭୭୬ ଏଡ୍ସ ରୋଗୀ ରହିଛନ୍ତି। ସେମାନଙ୍କ ମଧ୍ୟରୁ ବାଲିଅନ୍ତା ବ୍ଲକର ୨୧, ବାଲିପାଟଣା ୩୧, ବାଣପୁରରେ ୩୧, ବେଗୁନିଆରେ ୬୦, ଭୁବନେଶ୍ୱର ବ୍ଲକରେ ୧୦୫୨, ବୋଲଗଡ଼ରେ ୩୬, ଚିଲିକାରେ ୧୦୬, ଜଟଣୀ ୧୬୬, ଖୋର୍ଦ୍ଧାରେ ୧୭୨, ଟାଙ୍ଗୀର ୧୦୧ଜଣ ରହିଛନ୍ତି। ଜିଲାରେ ମୋଟ ୧୭୭୬ଜଣଙ୍କ ମଧ୍ୟରୁ ୧୬୩୦ଜଣ ମଧୁବାବୁ ପେନସନ ଯୋଜନାରେ ସାମିଲ ହୋଇଛନ୍ତି।