ଓ୍ବାଶିଂଟନ,୨୮।୯ : ୨୦୨୦ ମସିହାରେ, କର୍କଟ କାରଣରୁ ଅକାଳ ମୃତ୍ୟୁ ଘଟିଥିବା ଲୋକଙ୍କ ମଧ୍ୟରୁ ୭୦ ପ୍ରତିଶତଙ୍କୁ ଜୀବିତ ରଖାଯାଇ ପାରିଥାନ୍ତା। ଏହି ରୋଗୀଙ୍କ ମଧ୍ୟରୁ ୩୦ ପ୍ରତିଶତ ଲୋକଙ୍କ ପାଇଁ ଚିକିତ୍ସା ଉପଲବ୍ଧ ଥିଲା। ଦ ଲାନସେଟ ଗ୍ଲୋବାଲ ହେଲଥରେ ପ୍ରକାଶିତ ଏକ ଡାକ୍ତରୀ ଅଧ୍ୟୟନରେ କୁହାଯାଇଛି ୨୦୨୦ ରେ ବିଶ୍ୱର ପ୍ରାୟ ୫୩ ଲକ୍ଷ ଲୋକଙ୍କର କର୍କଟରେ ମୃତ୍ୟୁ ଘଟିଛି।
ସେମାନଙ୍କ ମଧ୍ୟରୁ ୨୯ ଲକ୍ଷ ପୁରୁଷ ଏବଂ ୨୩ ଲକ୍ଷ ମହିଳା ଅଛନ୍ତି। ମୃତ୍ୟୁ ଘଟିଥିବା ମହିଳାଙ୍କ ମଧ୍ୟରୁ ପ୍ରାୟ ୧୩ଲକ୍ଷଙ୍କର ତମାଖୁ, ମଦ୍ୟପାନ, ମେଦବହୁଳତା ଏବଂ ସଂକ୍ରମଣ ଯୋଗୁ ଜୀବନ ଯାଇଛି। ଅନ୍ତର୍ଜାତୀୟ ଏଜେନ୍ସି ଫର ରିସର୍ଚ୍ଚ ଅନ କ୍ୟାନସରରୁ କର୍କଟ ମୃତ୍ୟୁହାର ଉପରେ ଗ୍ଲୋବୋକାନ ୨୦୨୦ତଥ୍ୟ ବ୍ୟବହାର କରି ଗବେଷକମାନେ ମତ ଦେଇଛନ୍ତି ଶୀଘ୍ର ଚିହ୍ନଟ ଏବଂ ଚିକିତ୍ସା ଦ୍ୱାରା ଲକ୍ଷ ଲକ୍ଷ ଲୋକଙ୍କ ମୃତ୍ୟୁକୁ ରୋକା ହୋଇପାରିବ।
ମହିଳାମାନଙ୍କ କ୍ଷେତ୍ରରେ ବାର୍ଷିକ ପ୍ରାୟ ୧୫ଲକ୍ଷ ମୃତ୍ୟୁକୁ ଏଡାଯାଇପାରିବ । ମହିଳାମାନଙ୍କ କ୍ଷେତ୍ରରେ ସ୍ତନ ଏବଂ ଗର୍ଭାଶୟ କର୍କଟ ହୋଇଥାଏ। ପ୍ରତିବର୍ଷ ପ୍ରାୟ ୭୦ ବର୍ଷରୁ କମ ତିନି ଲକ୍ଷ ମହିଳା ଫୁସଫୁସ କର୍କଟରେ ପୀଡିତ ହେଉଛନ୍ତି। ଏମାନଙ୍କ ସହିତ ୧.୬୦ ଲକ୍ଷ ମହିଳାଙ୍କର କଲୋରେକ୍ଟାଲ କର୍କଟ କାରଣରୁ ମୃତ୍ୟୁ ଘଟୁଛି। ଅନେକ ଦଶନ୍ଧି ଧରି ଅନେକ ଉଚ୍ଚ ଆୟକାରୀ ଦେଶରେ ସ୍ତନ କର୍କଟ ମୃତ୍ୟୁ ଅପେକ୍ଷା ମହିଳାମାନଙ୍କ ମଧ୍ୟରେ ଫୁସଫୁସ କର୍କଟ ମୃତ୍ୟୁ ହାର ଅଧିକ ଥିଲା ।
ଅଧ୍ୟୟନରେ କୁହାଯାଇଛି ମହିଳାମାନଙ୍କଠାରେ କର୍କଟ ରୋଗର କାରଣ ଏବଂ ବିପଦ କାରଣଗୁଡ଼ିକ ଉପରେ ଅଧିକ ଅନୁସନ୍ଧାନର ଆବଶ୍ୟକତା ରହିଛି। କାରଣ ପୁରୁଷଙ୍କଠାରେ କର୍କଟ ରୋଗ ହେବାର ଆଶଙ୍କା କମ । ଏହା ସହିତ, ସ୍ତନ ପ୍ରତିରୋପଣ, ତ୍ୱଚାକୁ ସଫା କରୁଥିବା ଉତ୍ପାଦ ଏବଂ କେଶ ଉତ୍ପାଦ ମଧ୍ୟ କର୍କଟ ରୋଗର କାରଣ ସାଜୁଛି।
ନିକଟରେ ପ୍ରକାଶିତ ଲାନସେଟ ଆୟୋଗର ଏକ ନୂତନ ରିପୋର୍ଟରେ ଦର୍ଶାଯାଇଛି ଲିଙ୍ଗଗତ ଅସମାନତା ଏବଂ ଭେଦଭାବ ମହିଳାଙ୍କ ଅଧିକାର ତଥା କର୍କଟ ରୋଗର କାରଣକୁ ଏଡ଼ାଇବା ପାଇଁ ସୁଯୋଗ ଉପରେ ପ୍ରଭାବ ପକାଇଥାଏ। ଏହା ମଧ୍ୟ ସେମାନଙ୍କର ସମୟାନୁବର୍ତ୍ତୀ ଅନୁସନ୍ଧାନ ଏବଂ ଯତ୍ନରେ ବାଧା ସୃଷ୍ଟି କରିଥାଏ ।