କେନ୍ଦୁଝର,୧୨।୮(ସ୍ବ.ପ୍ର.)-କେନ୍ଦୁଝର ଜିଲାରେ ହାତୀ ମଣିଷ ଲଢ଼େଇ ଲାଗି ରହିଛି। କେତେବେଳେ ନିରୀହ ମଣିଷଙ୍କ ଜୀବନ ଯାଉଛି ତ କେତେବେଳେ ମଣିଷଙ୍କ ଆକ୍ରୋଶରୁ ଟଳି ପଡ଼ୁଛନ୍ତି ହାତୀ। ୨୨ ବର୍ଷ ମଧ୍ୟରେ ଜିଲାରେ ୧୨୧ ହାତୀଙ୍କ ମୃତ୍ୟୁ ହୋଇଥିବାରୁ ସେମାନଙ୍କ ସୁରକ୍ଷା ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ବିଶେଷ କରି ଗତ ୨୦ ଦିନରେ ୪ଟି ମାଈ ହାତୀଙ୍କ ଅସ୍ବାଭାବିକ ମୃତ୍ୟୁ ବନ ବିଭାଗ ପାଇଁ ଚିନ୍ତାର କାରଣ ହୋଇଛି ା ମୃତ୍ୟୁର କାରଣ ଜଣାପଡ଼ି ନ ଥିବାବେଳେ ବନ୍ୟପ୍ରାଣୀ ସ୍ବାସ୍ଥ୍ୟକେନ୍ଦ୍ର (ଭେଟେରିନାରୀ କଲେଜ), ପଶୁ ରୋଗ ରିସର୍ଚ୍ଚ ସଂସ୍ଥାନ ତଥା ନନ୍ଦନକାନନର ପ୍ରାଣୀ ଚିକିତ୍ସକ ଓ ଗବେଷକମାନେ ଗସ୍ତ କରି କାରଣ ଖୋଜୁଛନ୍ତି। ପୂର୍ବରୁ ମରିଥିବା ହାତୀଙ୍କ ବ୍ୟବଚ୍ଛେଦ ପରେ ଅବଶେଷକୁ ପରୀକ୍ଷା ପାଇଁ ପଠାଯାଇଥିଲା। ମାତ୍ର ଅଦ୍ୟାବଧି ରିପୋର୍ଟ ଆସିନାହିଁ।
ପ୍ରକାଶ ଯେ, ୨୦୧୬-୧୭ ବର୍ଷକୁ ଛାଡି ଦେଲେ ପ୍ରତ୍ୟେକ ବର୍ଷ କେନ୍ଦୁଝର ବନଖଣ୍ଡରେ ହାତୀ ମୃତ୍ୟୁ ଘଟୁଛି। ୨୦୦୧-୦୨ରୁ ଅଦ୍ୟାବଧି (୨୦୨୧-୨୨) ଅଗଷ୍ଟ ୧୧ ସୁଦ୍ଧା କେନ୍ଦୁଝର ବନ ଖଣ୍ଡରେ ସମୁଦାୟ ୧୨୧ ହାତୀଙ୍କ ମୃତ୍ୟୁ ହୋଇଥିବା ଜଣାପଡିଛି। ଫଳରେ ହାତୀମାନଙ୍କ ସୁରକ୍ଷାକୁ ନେଇ ବନ୍ୟପ୍ରାଣୀ ପ୍ରେମୀଙ୍କ ମଧ୍ୟରେ ଅସନ୍ତୋଷ ଦେଖାଦେଉଛି। ବନ ବିଭାଗ ତଥ୍ୟରୁ ଜଣାପଡ଼ିଛି, ୨୦୦୧-୦୨ ରେ ୮, ୨୦୦୨-୦୩ ରେ ୧୨, ୨୦୦୩-୦୪ରେ ୪, ୨୦୦୪-୦୫ ରେ ୧୨, ୨୦୦୫-୦୬ ରେ ୩, ୨୦୦୬-୦୭ ରେ ୬, ୨୦୦୭-୦୮ ରେ ୬, ୨୦୦୮-୦୯ ରେ ୮, ୨୦୦୯-୧୦ ରେ ୪, ୨୦୧୦-୧୧ରେ ୯, ୨୦୧୧-୧୨ ରେ ୪, ୨୦୧୨-୧୩ ରେ ୯, ୨୦୧୩-୧୪ ରେ ୪, ୨୦୧୪-୧୫ ରେ ୪, ୨୦୧୫-୧୬ ରେ ୬, ୨୦୧୭-୧୮ରେ ୨, ୨୦୧୮-୧୯ରେ ୩, ୨୦୧୯-୨୦ରେ ୬, ୨୦୨୦-୨୧ରେ ୭ ଓ ୨୦୨୧-୨୨ (ଅଗଷ୍ଟ ୧୧ ସୁଦ୍ଧା) ୪ ହାତୀଙ୍କ ମୃତ୍ୟୁ ହୋଇଛି। ୨୦୧୬-୧୭ ପରେ ଗତ ୫ ବର୍ଷ ମଧ୍ୟରେ ମୃତ୍ୟୁ ସଂଖ୍ୟା ବଢ଼ି ବଢ଼ି ଚାଲିଥିବାରୁ ହାତୀପ୍ରେମୀଙ୍କ ମଧ୍ୟରେ ଉଦ୍ବେଗ ପ୍ରକାଶ ପାଇଛି।
ଖଣିଖାଦାନ, ଶିଳ୍ପ, ଜଙ୍ଗଲ ମଧ୍ୟରେ ରାସ୍ତାଘାଟ ନିର୍ମାଣ, କାଠ ମାଫିଆଙ୍କ ପ୍ରାଦୁର୍ଭାବ, ଜଙ୍ଗଲାଞ୍ଚଳ ଜବରଦଖଲ ଆଦି କାରଣରୁ ବ୍ୟାପକ ଜଙ୍ଗଲ ନଷ୍ଟ ହେବା ସହ ହାତୀମାନଙ୍କ ଆଶ୍ରୟସ୍ଥଳ, ଚଲାପଥ ଓ କରିଡର ସବୁ ନଷ୍ଟ ହୋଇଯାଇଛି। ଫଳରେ ହାତୀମାନେ ପଥ ଭ୍ରଷ୍ଟ ହୋଇ ଏଣେତେଣେ ଘୂରି ବୁଲୁଛନ୍ତି। ଖାଦ୍ୟାଭାବ ଦେଖାଦେଉଥିବାରୁ ଜନବସତିମୁହାଁ ହୋଇ ଫସଲ ହାନି ଘଟାଉଛନ୍ତି ା ଫଳରେ ମଣିଷ ଓ ହାତୀ ମଧ୍ୟରେ ତିକ୍ତତା ବଢୁଛି ା ଦାନ୍ତ ମାଫିଆମାନେ ହାତୀମାନଙ୍କୁ ବିଦ୍ୟୁତ୍ ଆଘାତ ଦେଇ ବା ଗୁଳି କରି ମାରି ଦେଉଥିବା ଅଭିଯୋଗ ହେଉଛି ା ଅନେକ ସମୟରେ ପଥ ଭ୍ରଷ୍ଟ ହାତୀମାନେ ରାସ୍ତା ବା ରେଳ ଲାଇନ ପାର ହେବା ବେଳେ ଦୁର୍ଘଟଣାର ଶିକାର ହୋଇ ମୃତାହତ ହେଉଛନ୍ତି।
ଏନେଇ କେନ୍ଦୁଝର ଡିଏଫ୍ଓ ଅଜିତ ଶତପଥୀ କହିଛନ୍ତି, ହାତୀମାନଙ୍କ ସୁରକ୍ଷା ପାଇଁ ବନ ବିଭାଗ ପକ୍ଷରୁ ବ୍ୟାପକ ପଦକ୍ଷେପ ଗ୍ରହଣ ସହ ଲୋକଙ୍କୁ ସଚେତନ କରାଯାଉଛି। ଜନବସତି ଅଞ୍ଚଳରୁ ସେମାନଙ୍କୁ ଘଉଡ଼ାଇବା ପାଇଁ ବ୍ୟବସ୍ଥା କରାଯାଉଛି। ହାତୀଙ୍କ ଗତିବିଧି ଉପରେ ନଜର ରଖାଯାଉଛି। ଏଥିପାଇଁ ସ୍କ୍ବାଡ୍ ଗଠନ କରାଯିବା ସହ ବନ ବିଭାଗ କର୍ମଚାରୀଙ୍କୁ ମୁତୟନ କରାଯାଇଛି। ଆକ୍ରମଣକାରୀ ବା ଶିକାରୀଙ୍କ ବିରୋଧରେ ଆଇନ ଅନୁଯାୟୀ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଛି।