ଭୋପାଳ,୨୬।୮ : ଖାର୍ଗୋନ ଜିଲାର ୪୩ ବର୍ଷିୟ ସଚିନ ଶର୍ମା, ଟୋନି ନାମରେ ମଧ୍ୟ ଜଣାଶୁଣା। ସେ ମୋଟର ୱିଣ୍ଡିଂ କାମ କରନ୍ତି। ତାଙ୍କର ପ୍ରକୃତ ପରିଚୟ ତାଙ୍କୁ ବନ୍ୟପ୍ରାଣୀ ସଂରକ୍ଷଣ ପାଇଁ ପ୍ରେରଣା ଭାବରେ ଏହି କ୍ଷେତ୍ରରେ ପ୍ରତିଷ୍ଠିତ କରିଛି। ବନ୍ୟପ୍ରାଣୀ ସୁରକ୍ଷା କ୍ଷେତ୍ରରେ ତାଙ୍କର ଅବଦାନ ୱାଇଲ୍ଡ ଲାଇଫ ୱାର୍ଡେନ ଭାବରେ ମାନ୍ୟତା ପାଇଛି। ତାଙ୍କର କାହାଣୀ ଗତ ୨୨ ବର୍ଷ ଧରି ଜାରି ରହିଛି। ଇତି ମଧ୍ୟରେ ସେ ୧୫ ହଜାରରୁ ଅଧିକ ବନ୍ୟଜନ୍ତୁଙ୍କୁ ଉଦ୍ଧାର କରିଛନ୍ତି ଏବଂ ସେମାନଙ୍କୁ ସୁରକ୍ଷିତ ବାସସ୍ଥାନରେ ଆଶ୍ରୟ ଦେଇଛନ୍ତି। ଏଥିରେ ଜଙ୍ଗଲ ବିଭାଗ ମଧ୍ୟ ତାଙ୍କୁ ଆବଶ୍ୟକ ସହାୟତା ପ୍ରଦାନ କରୁଛନ୍ତି।
ଜିଲାର ବଡ଼ବାହର ଗୁରୁ ନାନକ ମାର୍ଗରେ ରହୁଥିବା ଟୋନି ଶର୍ମା ପିଲାଦିନରୁ ବନ୍ୟ ପ୍ରାଣାମାନଙ୍କ ପ୍ରତି ବିଶେଷ ଆକର୍ଷିତ ହୋଇଥିଲେ। ସେଥିପାଇଁ ସେ ନିଜ ଜୀବନକୁ ବନ୍ୟପ୍ରାଣୀଙ୍କ ସୁରକ୍ଷା ପାଇଁ ସମ୍ପୂର୍ଣ୍ଣ ଉତ୍ସର୍ଗ କରିଛନ୍ତି । ସେ ସାପ ଧରିବାରେ ପାରଙ୍ଗମ। ବନ୍ୟପ୍ରାଣୀଙ୍କୁ ଉଦ୍ଧାର କରିବା ପାଇଁ ସେ କୌଣସି ପାରିଶ୍ରମିକ ନେଇ ନ ଥାନ୍ତି।
ପାଠପଢ଼ା ସମାପ୍ତ କରିବା ପରେ ସେ ତାଙ୍କ ଇଞ୍ଜିନିୟର ପିତା ଜୟପ୍ରକାଶ ଶର୍ମାଙ୍କ ସହ ମୋଟର ୱିଣ୍ଡିଂ କାମ ଆରମ୍ଭ କରିଥିଲେ।
ଦିନେ ସେ ବାଟରେ ଏକ ଆହତ ପାରା ପାଇଲେ, କିନ୍ତୁ କିଛି ଦିନ ମଧ୍ୟରେ ପାରାଟି ମରିଗଲା। ଏହି ଘଟଣା ତାଙ୍କୁ ଦୁଃଖିତ କରିଥିଲା ଏବଂ ସେ ନିଷ୍ପତ୍ତି ନେଇଥିଲେ ବନ୍ୟପ୍ରାଣୀଙ୍କ ସେବା କରିବା ଆରମ୍ଭ କରିବେ। ତାଙ୍କ କାର୍ଯ୍ୟ ମଧ୍ୟରେ ସେ ଅଧିକାଂଶ ସାପ ଉଦ୍ଧାର କରିଥିଲେ। ସାପ ଧରିବାରେ ବଡ ବିପଦ ରହିଥିଲା ଏବଂ ତାଙ୍କୁ ତାଲିମ ଦେବା ପାଇଁ କେହି ନ ଥିଲେ। ଏହି ପରିସ୍ଥିତିରେ, ସେ ନିଜକୁ ନିଜେ ଶିଖିବା ଆରମ୍ଭ କଲେ
। ସେ ବହି ପଢ଼ି ଏବଂ ଡିସକଭରି ଚ୍ୟାନେଲରେ ସାପ ଧରିବା କାର୍ଯ୍ୟକ୍ରମ ଦେଖି ଶିଖିଲେ । ସାପମାନଙ୍କୁ ଧରିବା ପାଇଁ ଏକ ବାଡିର ଆବଶ୍ୟକତା ଥିଲା। ଯାହାକୁ ସେ କୌଣସି ସ୍ଥାନରେ ପାଇ ନ ଥିଲେ। ସେ ନିଜେ ସେହି ବାଡ଼ି ତିଆରି କରି ସାପ ଉଦ୍ଧାର କାର୍ଯ୍ୟ ଜାରି ରଖିଲେ।ସେ ସାପ ପ୍ରଜାତିର କୋବ୍ରା, କ୍ରାଇଟ, ଢମଣା, ରସେଲ ଭାଇପର, ସ୍ବସ୍କେଲ୍ଡ ଭାଇପର ସହିତ ଅନେକ ବିଷାକ୍ତ ସାପ ଏବଂ ପାଇଥନ ମଧ୍ୟ ଉଦ୍ଧାର କରିଛନ୍ତି। ଏହା ବ୍ୟତୀତ ସେ ଭାଲୁ, ନୀଳଗାଈ, ଶୃଗାଳ, କୁମ୍ଭୀର, ବଣୁଆ ଘୁଷୁରୀ, ଭାଲୁ, ବିଛା ସମେତ ଅନ୍ୟ ବଣୁଆପ୍ରାଣୀଙ୍କୁ ମଧ୍ୟ ଉଦ୍ଧାର କରିଛନ୍ତି। ସେ ଚିତାବାଘ ଏବଂ ବାଘ ଉଦ୍ଧାରକାରୀ ଦଳରେ ମଧ୍ୟ କାର୍ଯ୍ୟ କରିଛନ୍ତି। ସେ ୯ ଟି କୁମ୍ଭୀରକୁ ଉଦ୍ଧାର କରି ପୁନର୍ବାର ସେମାନଙ୍କ ପ୍ରାକୃତିକ ବାସସ୍ଥାନରେ ଛାଡି ଦେଇଛନ୍ତି।
ତାଙ୍କ କାର୍ଯ୍ୟରେ ଅନୁପ୍ରାଣିତ ହୋଇ ଜଙ୍ଗଲ ବିଭାଗ ତାଙ୍କୁ ୨୦୧୮ ରେ ଜିଲା ମାନବ ବନ୍ୟପ୍ରାଣୀ ୱାର୍ଡେନ ପଦରେ ନିଯୁକ୍ତ କରିଥିଲେ। ସେ \ବନ୍ୟପ୍ରାଣୀଙ୍କ ସୁରକ୍ଷା ପାଇଁ ନିଜର ଜୀବନକୁ ଉତ୍ସର୍ଗ କରିଥିବାବେଳେ ବହୁ ଯୁବବର୍ଗଙ୍କୁ ଉଦ୍ଧାର କୌଶଳ ତାଲିମ ଦେଉଛନ୍ତି।