ଗୁଆହାଟୀ, ୧୩।୯ : ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ୱ ସରମା ବିଧାନସଭାରେ କହିଛନ୍ତି ଯେ ଗତ ୬ବର୍ଷ ମଧ୍ୟରେ ବହୁ ସଂଖ୍ୟାରେ ଯୁବବର୍ଗ ଉଗ୍ରବାଦୀ ସଂଗଠନରେ ଯୋଗ ଦେଇଥିବା ବେଳେ ଅନେକ ଆତ୍ମସମର୍ପଣ କରିଛନ୍ତି। ଏହି ସମୟ ମଧ୍ୟରେ ୧୫ ଶହ ରୁ ଅଧିକ ଯୁବବର୍ଗ ଉଗ୍ରବାଦୀ ସଂଗଠନ ସହ ଜଡିତ ହୋଇଥିବା ସେ କହିଛନ୍ତି। ବିଧାନସଭା ଅଧିବେଶନରେ ମୁଖ୍ୟମନ୍ତ୍ରୀ କଂଗ୍ରେସ ବିଧାୟକ ଦେବବ୍ରତ ସୈକିଆଙ୍କ ପ୍ରଶ୍ନର ଉତ୍ତର ଦେଇ ଏହି ସୂଚନା ପ୍ରଦାନ କରିଛନ୍ତି।
୨୦୧୬ ରୁ ୨୦୨୨ ପର୍ଯ୍ୟନ୍ତ ତଥ୍ୟ ମୁଖ୍ୟମନ୍ତ୍ରୀ ବିଧାନସଭାରେ ପ୍ରଦାନ କରିଛନ୍ତି। ମୁଖ୍ୟମନ୍ତ୍ରୀ କହିଛନ୍ତି ୨୦୧୬ ପରଠାରୁ ବର୍ତ୍ତମାନ ପର୍ଯ୍ୟନ୍ତ ୧୫୬୧ ଜଣ ଯୁବବର୍ଗ ପାଞ୍ଚଟି ଉଗ୍ରବାଦୀ ସଂଗଠନ ସହ ଜଡିତ ଅଛନ୍ତି। ସେ କହିଛନ୍ତି, ୮୧୧ ଜଣ ଯୁବବର୍ଗ ଏନଡିଏଫବି, ୧୬୪ ଯୁବବର୍ଗ ଏନଏଲଏଫବି (ବୋଡୋ), ୩୫୧ ପିଡ଼ିସିକେ, ୨୦୩ ଉଲ୍ଫା ଏବଂ ୩୨ ଯୁବବର୍ଗ ୟୁପିଆରଏଫରେ ଯୋଗ ଦେଇଛନ୍ତି।
ମୁଖ୍ୟମନ୍ତ୍ରୀ କହିଛନ୍ତି ଯେ ଗତ ଛଅ ବର୍ଷ ମଧ୍ୟରେ ୨୩ ଟି ସନ୍ତ୍ରାସବାଦୀ ସଂଗଠନର ୭୯୩୫ ଯୁବବର୍ଗ ସରକାରଙ୍କ ନିକଟରେ ଆତ୍ମସମର୍ପଣ କରିଛନ୍ତି। ଏହା ପରେ ସେମାନଙ୍କୁ ମୁଖ୍ୟ ସ୍ରୋତରେ ସାମିଲ କରାଯାଇଛି। ସେଥିମଧ୍ୟରୁ ୪୫୧୬ ଜଣ ଏନଡିଏଫବିରୁ, ୪୬୫ ଏନଏଲଏଫବିରୁ, ୯୧୫ କେପିଏଲଟିରୁ, ୩୮୮ ପିଡ଼ିସିକେ, ୩୭୮ ଉଲ୍ଫା, ୨୪୬ କେଏଲଏନଏଏଲଏଫ, ୧୮୧ଡିଏନଏଲଏ ରୁ, ୧୭୮ ଏଡିଏଫରୁ ଏବଂ ଅବଶିଷ୍ଟ ଯୁବବର୍ଗ ଅନ୍ୟ ସଂଗଠନରୁ ଆସିଥିବା ଜଣାପଡ଼ିଛି।
ଗତ ୬ ବର୍ଷ ମଧ୍ୟରେ ଜିହାଦି କାର୍ଯ୍ୟକଳାପରେ ୮୪ଜଣଙ୍କୁ ଗିରଫ କରାଯାଇଛି। ସେମାନେ ଜମାତ-ଉଲ-ମୁଜାହିଦ୍ଦିନ ବାଂଲାଦେଶ, ହିଜବୁଲ ମୁଜାହିଦ୍ଦିନ ଏବଂ ଅନସରୁଲ୍ଲା ବଙ୍ଗଳା ଦଳ ଭଳି ସଂଗଠନ ସହ ଜଡିତ ଥିଲେ। ସେ କହିଛନ୍ତି, ଏହି ୧୦ ଜଣଙ୍କ ମଦ୍ରାସା ସହ ଯୋଗାଯୋଗ ଥିବା ଜଣାପଡ଼ିଛି।